Segun akusado amigunan malu a trese outo den su kura pa e drecha
WILLEMSTAD.- Un pareha a presentá dilanti wes den korte di promé instansia, pa ladronisia i kómplise di ladronisia di vários outo i tambe pa inkubrimentu i benta di vehíkulonan hòrtá. Durante un entrada hudisial ku polis a realisá na kas di e pareha den área di Koraal Specht, a haña vários outo hòrtá ku tabata na benta.
Ta trata di e hòmber Jerrely V. (45) i e muhé S.E. (40).
Pa Loke ta trata Jerrely Ministerio Públiko ta akus’é di a hòrta un vehíkulo marka Kia Rio dia 27 di mei 2023 na altura di supermerkado Boulevard.
El a hasi esaki dor di kibra e bentana di e outo parti patras, bula bai dilanti na e stür i asina logra kue e outo bai kuné. Tambe e ta keda akusá di a hòrta otro vehíkulo marka Kia Rio dia 18 di yüni 2023 na e mesun manera.
Pa loke ta trata e di 4 i di 5 akusashon, Jerrely ta keda akusá di a hòrta dos otro Kia Rio fo’i dos diferente viktima riba e dianan 22 di yüni i 2 di yüli 2023.
Aki el a bai ku telefòn i perfume ku tabata den un di e vehíkulonan, ku despues polis a haña tantu e telefòn komo e perfume na kas di e pareha, durante un entrada hudisial. Durante tratamentu di e kaso e pareha a presentá den sala di korte pa responsabilisá nan mes pa ku nan aktonan.
Jerrely ta enkarselá, miéntras su señora ta den libertat kondishonal, pendiente tratamentu di e kaso.
Wes a kuminsá ku e muhé S.E, puntrando e si e sa di e telefòn ku polisnan a haña den nan kas, ku despues a resultá di tabata un telefòn hòrtá.
E akusado a bisa, ku Jerrely a bin kas ku un telefòn ku e lo mester a kumpra riba kaya. E no a mira nada robes i a kue un chip hinka den e telefòn pa nan uz’e pa nan negoshi di benta i kompra di outo.
El a bisa ku si e tabata sa ku ta trata di telefòn hòrtá, e lo no a uza e telefòn. Segun e akusado, e akusashonnan di kómplise di ladronisia di outo no ta kuadra.
Jerrely na su turno a duna di konosé ku e no ta un ladron di outo.
El a bisa ku ta promé bia ku e ta kai sera i ku ta amigunan malu ku a bin su kas bin hiba outo a hink’e den e problema aki.
Segun e akusado, e ta mekániko i algun amigu a pidié pa drecha e outonan pa hür.
Segun e akusado, e ta traha duru pa e kria su yunan. El a ninga di tabata sa ku e telefòn ku a haña den su kas tabata hòrtá. Segun e akusado, un dia despues di a sali trabou pa bai kas, el a topa un mucha hòmber deskonosí na parada di bus na Punda ku a ofresé e telefòn pa 250 florin.
Debí ku e no tabatin telefòn el a opta pa kumpra esaki. Si e tabata sa ku ta telefòn hòrtá e lo no a kumpr’é.
Pa loke ta trata e ladronisia di dia 2 di yüli 2023, e viktima a deklará na polis ku riba e dia ei el a para e outo na Boulevard na Maripampun i a kana bai e skol Sta Rosa di Lima, ku ta keda nèt den bisindario. Ora el a regresá, el a mira ku su outo no tabata tei.
Polis a wak e kámaranan di seguridat i a mira un hende hòmber kana bai den e bisindario di e Kia Rio kolo blanku, pa despues kibra esaki su glas, drenta den e outo i bai kuné.
Polis a rekonosé e akusado na su kana, postura i e slòfnan ku e hòmber tabatin e dia ei bisti i kual nan a haña den e bibienda durante entrada hudisial. E akusado a bisa ku riba e video no por mira kara di e sospechoso i ku no por bisa ku e ta esun ku a kometé e akto.
