NEW YORK, AP.- Detektivenan di New York a revisá akusashonnan pa abusu seksual kontra e produktor di Hollywood Harvey Weinstein.
E bosero di departamento di Polis di siudat Peter Donald a bisa djaweps ku e investigadornan kier purba determiná si tin denunsiánan adishonal kontra Weinstein.
Te ainda nan no a haña mas keho, pero departamento a pidi kualkier ku tin informashon riba Weinstein pa drenta den kontakto ku e departamento.
Mas di un desena di muhé, inkluyendo aktrisnan manera Angelina Jolie, Ashley Judd i Gwyneth Paltrow, a bisa den artíkulonan resien di New York Times i revista New Yorker, ku Weinstein a molestiá òf abusá seksualmente di nan. Weinstein a wòrdu retirá djadumingu di The Weinstein Co., e studio ku el a fundá huntu ku su ruman.
Detektivenen den e unidat spesial pa víktimanan di departamento di Polis di New York a haña e instrukshon di identifiká i papia ku kualkier víktima potensial, inkluyendo muhénan ku a papia tokante nan insidentenan ku Weinstein den un artíkulo resien di New Yorker, segun un funshonario na altura di e tema.
Den e reportahe di New Yorker, eks aktris Lucia Evans a bisa ku Weinstein a oblig’é pa hasi sèks oral na 2004 na momentu ku e tabata un studiante universitario.
