WILLEMSTAD – Awe mainta trempan polis a bin topa Un Hyundai Elantra blanku di start den Kanga. Den e outo tabatin un hòmber boka abou ku no tabata duna señal di bida. Mesora a pidi tur e demas outoridat nan pa yega serka i investigá e kaso. Dr. Maduro ku ta esun enkargá pa polis pa konstatá morto a presentá na e sitio. Departamento di TFO i reshèrshi tambe a akudí pa investigá e kaso. Na kurpa di e hòmber por mira ku e tin vários paña bisti riba otro.
Update;
E hòmber ku awe mainta polis a haña morto den un outo den Kanga a resultá di ta Shairon Filomeno Paulina nasé na Kòrsou dia 25 yüni 1982. Polis no kier a duna mas informashon di e kaso aki pero a indiká ku e ta bou di investigashon. Sinembargo informashonnan ku EXTRA ta dispone ta indiká ku e hòmber aki lo ta esun ku e dia promé den anochi lat a bai tira atrako na Kong Xing minimarket na Mahuma. Un polis na sivil ku tambe tabata na e toko a tuma nota kiko tabata pasando i a los tiru di atvertensia pero e atrakadó a sigui kore bai i el a los tiru dirigí. For di ayera nochi kaba tabatin informashon ku e atrakadó tabata herida. Esaki ta informashonnan adishonal ku EXTRA ta dispone di dje pero ku polis no a konfirmá.
Polis ta informa ku riba òrdu di Fiskal di Ministerio Públiko a konfiská e kurpa pa mas investigashon.
Kastigu di bida largu
Shairon Paulina, kende te ku 25 di novèmber 2021 tabata sintando un kastigu di prizòn di bida largu, a haña libertat kondishonal. T’asina ku Shairon a ser kondená pa bida largu pa loke ta trata e kaso di tiramentu na Fort Waakzaamheid na aña 2000, despues di tin alrededor di 20 aña será, el a ser poné den libertat kondishonal pa Korte, pa motibu ku segun splikashon di hues, si sigui ehekutá e restu dje kastigu, esei lo no tin un ophetivo rasonabel mas.
Un di e kondishonnan ta ku Shairon pa restu di su bida no mag di kometé aktonan kastigabel, sino por reintrodusí e kastigu di bida largu den prisòn. Tambe pa un transkurso di seis luna Shairon lo tabata bou di supervishon elektróniko i pa tres aña e lo ser guiá pa rehabilitashon sosial.
