4300 partisipante repartí den 10 grupo i a kima momo ayera mes
ORANJESTAD.-Aruba tambe a selebrá su karnaval den grandi, den e Parada Grandi ku a pasa den kayanan di Oranjestad. Polis di Aruba ta informa EXTRA ku nan mester a realisá 41 detenshon durante di e marcha ku a kuminsá 10’or di mainta i ku a konta ku alrededor di 4300 partisipante repartí den 10 grupo.
Kuerpo polisial di Aruba a konta ku 230 polis riba pia repartí den e diferente departamentunan manera Polis Uniformá, ME, Motor Unit, K-9 , AE, Mobiel Commando, Flex team, Trafico, planologie, departamento di recherche, personal atministrativo i tambe personal di CEA.
E parada a finalisá 8:33 pm ora ku e ‘last lap’ a yega su final. Pa 9:15 di anochi, den Harbour Arena a kima e momo tambe i asina Aruba su “Carnaval 70” a yega su final.
Pa loke ta trata detenshonnan, polis ta informa ku tabatin detenshon pa entre otro bringamentu, pa no sigui òrdu di polis, buracheria, poseshon di arma blanku i tambe a topa ku un lighter ku paresido na un arma di kandela. Un total di 41 persona a keda detené.
For di sifranan ku polis ta registrá por nota ku na 2023 tabatin 22 detenshon, kompará ku 41 e aña aki.
