Polis ta konfiská vehíkulo despues ku shofùr tabata pone ‘fever’

WILLEMSTAD.- Djamars último den oranan lat di anochi  polisnan mester a bai Weg naar Fuik  pa ponementu di ‘Fever’.

Na momento ku polisnan a presentá na e sitio tabatin algun vehíkulo ku a kore bai. Polis a logra duna un di e shofùrnan òrdu pa para, pero esaki no a duna oido i a sigui kore bai.

Polis a start un persekushon i un dado momentu e shofùr a yega na un kaminda ku e no por a sigui i no tabatin otro opshon i mester a para.

Momento ku e agentenan a atendé ku e shofùr i a bai pa konfiská e outo, algun persona ku tabata presente a lanta fuertemente kontra di e polisnan.

Pero na final e agentenan a logra dominá e situashon i a konfiská e vehíkulo.

Ku tur probabilidat e shofùr lo keda persiguí pa hustisia pa motibu ku e no a sigui e órden di polis despues di a kometé un echo kontra di lei. Tambe tin ku bai wak si e ta rekuperá su vehíkulo bèk.