WILLEMSTAD.- Te ku ayera nochi, kuerpo polisial no tabatin ningun informashon tokante dje komersiante ku ayera den oranan lat di mainta a keda sekuestrá na su boka di trabou.
E echo aki a tuma alrededor di 10.35 or ora ku Sentral di Polis a risibí informashon di un kaso di sekuestro ku a tuma lugá na un negoshi na Veeris.
For di informashon ku polis a logra kompilá di testigunan, un vehíkulo a yega na e sitio den kua tabatin tres hòmber ku kapuchon riba kabes i arma di kandela den man.
Nan a baha for di e vehíkulo i bou di menasa a bai ku e propietario di e negoshi den un outo koló kòrá den direkshon di Helmin Magno Wiels Boulevard.
Un tim di reshèrshi ta investigando e kaso aki i e yamada ta bai na komunidat pa si tin persona ku a mira algu sospechoso sea den e área di Veeris rònt di e orario ariba menshoná òf na kualke otro sitio, por fabor di tuma kontakto ku polis mesora na 917 òf 108 si ta deseá di keda anónimo.
