WILLEMSTAD.-E marcha di despedida di karnaval tabata sumamente bunita, animá i ku bastante dekorashon di lus. Asta trèkernan tabata bunita ku lus. Na vários parti di e ruta poblashon tabatin un komportashon korekto, sinembargo tin sierto áreanan ku ayera atrobe tabata motibu di hopi doló di kabes pa outoridatnan.
Den kombersashon ku bosero polisial, dunando un bista preliminar di e situashon, el a indiká ku a registrá basta kaso entre otro di bringamentu i tambe esnan ku no ta sigui òrdu di polis. EXTRA mes a tuma nota ku den Kaya Grandi di Otrobanda den e área di viadukto, Brionplein i Molenplein polisnan tabatin nan man yen pa atendé kasonan di problema. Hopi lamentabel tambe ta e echo ku basta hóben ta konfrontá problema ku polis debí ku nan no ta sigui òrdu di polis.
+++UPDATE+++
Awe mainta polis a duna di konosé ku durante di Gran Marcha di Despedida polis a realisá 11 detenshon.
Tur e detenshonnan aki tabata hende hòmber, di kua nan edat tabata varia entre 17 pa 47 aña. E detenshonnan a tuma lugá entre Rotònde Rafic Hariri i Breedestraat (O) durante di e periodo di djamars 13 di februari 2024 pa 21.45’or i djárason 14 di februari 2024 pa 02.29’or.
E violashonnan di lei tabata:
– No sigui òrdu di outoridat;
– Resistensia di detenshon;
– Maltrato di outoridat;
– Buracheria públiko;
– Violensia públiko;
– Insulto di outoridat.
Di e 11 kasonan aki, 1 persona a keda di dagfar, 3 a risibí ‘nachtlogie’, 1 a hasi transakshon, 2 kaso a keda pendiente di mas investigashon i 4 kaso Ministerio Públiko lo no pèrsiguí e sospechosonan.
