Turismo ta un sektor ku kontinuamente ta krese, tantu na nivel internashonal komo na Kòrsou. E manera kon un turista ta eksperensiá nos isla, ta krea un impreshon ku por keda pa semper. Pa e motibu aki, protekshon di turista ta keda un tópiko di gran importansia. Pa elaborá riba e tema di protekshon di turista, a tene un kòmbersashon ku Imro Zwerwer, hefe di komunikashon di polis i kende ta tambe hefe interino di Politur. Resientemente, Politur a pasa den un kambio i a transformá su struktura kompletamente. Politur ta dediká spesífikamente na turismo i su enfoke ta dirigí direktamente riba e turista.

Historia di Politur

Imro ta konta ku Politur ta eksistí pa 14 aña. El a keda establesé entre 2011 i 2012, un temporada kaminda turismo tabata kresiendo rápido. Den mesun époka, tabatin vários kaso di atentado kontra turistanan, manera atrako i kibramentu di outo. Dor di e diferente atentado kontra turista, a bin ku e idea pa krea un organisashon ku por duna un man spesífikamente den e área di protekshon di turista. Imro ta sigui bisa ku Politur a kuminsá ku agentenan di polis. Mas o ménos 12 agente di Kuerpo Polisial Kòrsou tabata fiha pa traha spesífikamente riba seguridat i mantenshon di òrdu públiko den sektor di turismo. Nan a keda den e struktura pa algun aña, pero eventualmente, Kuerpo Polisial mes a haña skarsedat di personal i a yama nan bèk na nan puesto original. E agentenan aki a demostrá ku Politur a yuda suavisá e atentadonan kontra turista i meresé di sigui eksistí. Esei a habri e kaminda pa buska un alternativa nobo. Asina, Politur a forma bira un fundashon. Despues ku e agentenan a sali for di e struktura, a surgi e pregunta: kon nos por logra tin un personal pa Politur sin ta dependé di polis? Importante pa komprendé: e trabou ku Politur ta hasi ta un trabou polisial. E ta partí di mantenshon di òrdu públiko, spesífikamente dirigí riba tur sektor relashoná ku turismo.

Ku e kambio, un proseso di selekshon públiko a keda habrí pa identifiká un kompania ku por duna e servisio. Tres kompania di seguridat privá a keda evaluá a base di kriterio estrikto di polis. Na final, un kompania a gana e despacho i e personal di Politur a bira un trabou ehekutá pa un kompania eksterno. Aunke ku e trabou tabata ehekutá pa un kompania eksterno, e personal tabata integrá den operashonnan di Politur.

Transformashon

Na Aprel di e aña akí, e struktura a kambia un bia mas, pa duna e posibilidat pa e personal di seguridat ku tabata traha via di e kompania, por pasa direktamente den e fundashon di Politur. Tur a aseptá, pasó nan gusta e trabou i nan ta kontribuí den un desaroyo importante di e isla.

Na e momentu aki, Politur tin 11 agente ku ta traha den e área di turismo diariamente. Aunke nan no ta polis formal, nan a sigui un formashon intensivo di 8 luna, inkluso stazje i ta keda kategorisá komo ‘buitengewone agenten’ (polis ekstraordinario). E formashon a inkluí tópikonan esensial pa por aktua den situashonnan básiko, inkluso tuma denunsia simpel di turista, traha prosèsverbal i dokumentá aksidentenan. Nan ròl ta fundamental den mantené un ambiente di seguridat i konfiansa pa turistanan na Kòrsou.

Preventivo, yudansa agudo i e kuido despues

“Komo Politur, nos tin tres tarea básiko ku ta primordial,” Imro ta bisa. E promé ta preventivo: e agentenan ta patruyá na outo, baiskel i tambe kana den zona turístiko, manera playa, Otrobanda i tur otro área kaminda turista ta frekuentá. E visibilidat ta importante pa e turista, pero tambe pa personanan ku tin mal intenshon. E presensia di Politur ta mustra un señal ku tin bista riba nan i ku ta mihó nan move for di e sitio.

Un otro parti di e tarea ta yudansa agudo (‘noodhulp’). Mesun kos ku polis normal ta duna yudansa den komunidat, Politur tambe ta duna yudansa den e sektor di turismo. Ora ku un turista ta envolví den un aksidente di tráfiko, òf kualke otro insidente, Politur ta sali na lugá. Tin vários kaso kaminda turista a kai for di seru na Christoffel, turista ku a hoga òf ku mester intermediashon urgente den situashon di tenshon. Den e tipo di kasonan manera esaki, e agente di Politur ta siña manehá ku empatia i tuma akshon na tempu.

Un di e parti mas importante ta e kuido despues (‘nazorg’), e sosten emoshonal i logístiko despues di un evento. Si un turista a keda atraká i posiblemente asta maltratá, no por laga e turista su so. Politur ta sigui atendé e turista despues. Si e mester bai hospital, Politur ta bai ku e turista i keda serka dje. Turistanan ku ta bini ku krusero por pèrdè i tambe outo, papelnan òf otro kos. Politur ta bai konsulado ku nan, pa yuda nan rekonstruí nan dokumentonan i guia nan den tur paso: imigrashon, formulario i asta wak ku nan a pasa imigrashon i ta riba e buelo.

Ekspanshon di kapasidat humano

Kòrsou ta un isla chikí, pero nos tin hopi bishitante. E aña akí ya nos ta serka di yega 700 mil bishitante. I e sifranan di Politur ta sigui oumentá tur dia. Ku mas bishitante, ta bin mas insidente: turista ku ta pidi ousilio, kaso di pèrdidá òf krímen. Manera a menshoná anterior, aktual tin 11 agente, esaki no ta sufisiente pa kubri di Bándariba te Baándabou, Imro ta splika.

Basá riba análisis, ta probá ku despues di 12 or/1 or di mèrdia, aktividat turístiko ta baha. Mayoria turista ta bolbe bèk hotèl òf nan apartamento. No tin hopi kaso ku tin turista envolví den e ora nan ei. Komo no tin hopi akshon, e agente ta traha di mainta te anochi, nan no ta traha warda (‘nachtsdienst’).

Imro ta bisa ku den ougùstùs Politur a habri aplikashon pa agente nobo di Politur. E meta ta pa rekrutá 15 agente nobo. Nan lo sigui un entrenamentu di 8 luna, ora finalisá, Politur lo tin un total di 26 agente sofistiká pa kubri e isla mas efektivamente.

Pa lo ke ta material, tambe tin progreso. “Nos ta hopi gradesido na Minister di Hustisia, señor Hato, ku a pone un montante supstansial disponibel pa Politur por aktualisá nos ekipo,” Imro ta bisa. E flota di outo ku tabata hopi gastá, a kambia kompletu. Awor Politur outo ta visibel, moderno, i funshonal.

Den futuro serka, Politur lo risibí un unifòrm nobo, ku ta krea un impreshon ku e agentenan ta mas aksesibel i mas amabel pa e turista, sin pèrdè e presensia di outoridat.

Ku e fondo disponibel, lo bai renová tambe e edifisio prinsipal, situá riba e tereno di Sambil. “Nos tin tambe un edifisio na Wèspùnt, kaminda tabata warda di polis, ku awor ta bou di renovashon.” Ademas, for di 1e di ougùstùs, un ofisina chikí a habri na Handelskade, Punda.

“Nos ta spera ku pa e próksimo aña, Politur por habri un ofisina na Jan Thiel, pa por kubri henter e isla,” Imro ta bisa.

Politur tin un konekshon magnífiko ku Kuerpo Polisial. E number di emergensia ta 911 òf 917. Tambe, tur vehíkulo di Politur tin radio pa risibí komunikashon di polis sentral. Den parti di anochi, ora Politur no ta operá, polis ta tuma enkargo. E mainta siguiente, Polis ta transferí e kaso bèk na Politur. Imro ta sigui bisa ku e agentenan di Politur por aktua si ta un echo kastigabel. Tur persona por hasi detenshon. Tin kasonan kaminda Politur ta notifiká polis i tanten ku ta warda riba e patruya, Politur ta purba di kalma e situashon.

Politur den akuerdo ku otro paisnan

Imro ta Indiká ku Santo Domingo ta un di e paisnan ku Politur tin un akuerdo formal kuné. “Nos tin hopi aña ta kolaborá ku nan. Na Santo Domingo, e entidat ta yama Sestur, un organisashon grandi i serio.”

Santo Domingo ta tuma turismo hopi na serio, komo henter e ekonomia ta drai rònt di turismo. Nan ta mira seguridat di turista komo prioridat. E organisashon a yega di bin Kòrsou pa duna nos agentenan entrenamentu i Politur a yega di bai Santo Domingo pa wak kon nan ta operá.”

E modelo ta un konsepto regional ku ta bira kada bes mas fuerte. Resientemente, Imro a bishitá, huntu ku representante di MEO i señor minister Middelhof, un konferensia na Colombia di seguridat den turismo. Imro ta splika ku e konferensia a demostrá ku hopi pais, sea nan ta grandi òf chikí, ta tuma seguridat den turismo na serio.

“Hopi bia nos ta pensa ku nos, komo isla chikí, nos so ta pensa riba seguridat di nos turistanan. Pero no ta asina,” e ta bisa. “Paisnan grandi ku hopi otro produktonan ta mira esaki komo un tema vital. E no ta solamente un tema ekonómiko, e ta un tema di reputashon internashonal. Si un solo insidente ku turista bai viral, e daño na e isla por ta grandi.”

Imro ta menshoná ku Santo Domingo ta integrá turismo den nan sistema edukativo for di chikí. Na skolnan, e mucha ta siña e balor di turismo i dikon mester kuida i protehá turista. Nan ta lanta ku e mentalidat di responsabilidat. Na Kòrsou, un paso semehante a yega. CTB ya a kuminsá ku un programa pa siña e mucha tokante turismo, i awor ku e kambio di Politur, ta planifikando pa drenta skol ku e programa. Den e luna di vakashon, Politur a duna informashon na vários organisashon di mucha pa informá e mucha di Politur i pa konsientisashon. “Ora mucha bira grandi, e tin e mentalidat, di e manera akí bo ta krea un generashon ku ta sinti ku nan tin un responsabilidat pa e pais.

Konsientisashon pa nos mes

Politur ke yega mas leu ku promoshon. E organisashon ke konsientisá nos komunidat riba e importansia real di turismo. Turismo no ta solamente un pilar ekonómiko, e ta e nòmber ku un turista ta laga atras pa nos isla. Huntu ku e partner prinsipal CTB, e organisashon ke sigurá ku promé ku e turista yega Kòrsou, e sa ku tin un organisashon ku lo kuid’é i ta wak su bienestar. E ‘slogan’ riba e outo ta kla: “We care for your safety.” Protekshon di turista ta un prioridat, i nos ta logra esaki dor di ta visibel i fásilmente aksesibel. Ora un hende ta sintié sigur, e ta disfrutá di su bishita hopi mas mihó.

E gratitut mas grandi

Ta bon pa menshoná ku e gratitut mas grandi ta ora un turista bisa: “Mi a sinti mi sigur i lo mi regresá.” Tin kaso kaminda turistanan a pasa un eksperensia negativo, di atrako, maltrato òf pèrdidá. Pero e echo ku un organisashon manera Politur a guia, yuda i a mustra ku Kòrsou ta wak nan bienestar, a krea un memoria positivo den nan mente. Tur turista meresé e tipo di protekshon i kuido aki.

Nos mester realisá ku seguridat di turista ta un responsabilidat kolektivo. Di shofùr ilegal te guia di turista no registrá, tur akshon ku no ta legal òf ku no ta sigur por tin konsekuensianan negativ, pa e turista, pero tambe pa e reputashon di nos isla.

P’esei nos mester sigui traha huntu, pa un Kòrsou sigur i pa e turista por regresá.