Doñonan di boto den laman mester tene kuenta ku,
WILLEMSTAD.- Durante e último dos dianan ku a pasa tabatin un sistema di weer di atenshon ku a drenta nos área. En general no tabatin nada partikular ku a tuma lugá pero Ministerio di Salubridat, Medio Ambiente i Naturalesa (GMN) ta keda sigui tur desaroyo di aserka pa na momentu ku esaki ta nesesario informá usuarionan di nos playanan i nos piskadónan ku tin boto den laman.
Durante e oranan ku a pasa observadónan di Ministerio di GMN ku kontinuamente ta vigilá nos playanan i nos kosta por a tuma nota di laman ku poulatinamente a kuminsá bira brutu. Por a nota esaki klaramente na Wèstpunt i kosta den área di playanan di Kenepa. Relashoná ku esaki ta manda un atvertensha pa usuarionan di e playanan menshoná pa preferibel no drenta laman. Un atvertensha serio ta bai tambe na doño di botonan ku na e momentunan aki ta den laman pa pone esakinan riba tera pa evitá posibel daño. Ministerio di GMN preventivamente ya a lòs drijflijn na playa di Kenepa Grandi pa evitá ku esaki ta keda destruí. Ministerio di GMN su observadónan ta sigui vigilá e situashon na nos kosta i playanan.
