Korte Rotterdam a trata kaso asesinato Antiano
ROTTERDAM.-A surgi un situashon hopi serio den sala di korte na Rotterdam, Hulanda na momentu ku un persona a choka e akusado den kaso di asesinato di e produktor di muzik konosí komo Siki Martina. Korte di Rotterdam ta splika ku djaweps mainta e hòmber Marvin, primu di e víktima Siki Martina a aktua di forma sorprendente i choka e akusado Christopher L. den sala di korte.
Marvin ku ta primu di Siki tambe ta pendiente tratamentu di su kaso, pasobra Marvin mester responsabilisá su mes dilanti hustisia hulandes 10 di novèmber próksimo pa e echo ku el a tira bèk riba e akusadonan despues ku nan a tira Siki mata dia 10 di yüli 2022. E kaso aki a tuma lugá na e stashon di metro na Coolhaven na Rotterdam. Riba e dia ei a tira Siki mata ku un bala ku a alkanse na altura di su barika.
Korte a trata e kaso kontra di e akusadonan Christopher (32) i Ruchelo C. (33) ku ta keda akusá di e tira riba Siki ku resultado fatal. Te ainda no ta konosí kua di e akusadonan a los e tiru ku a resultá fatal. Segun OM, tur kos ta mustra ku den e tiroteo ku a surgi riba e dia enkuestion e úniko ku no a tira tabata Siki, pero e otronan si a tira riba otro. E pareha di Siki kende ta e kantante Sarita Lorena i mama di e víktima a hiba palabra den korte.
