Promé Minister sr. Gilmar Pisas: Den 2024 Refineria lo kuminsá drai zetá i krea kupo di trabou bèk

WILLEMSTAD – Den su Diskurso Nashonal 2024 Promé Minister sr. Gilmar Pisas a indika lu esaki ya ta su di tres mensahe, enkabesando Gabinete Pisas II. E mensahe aki a keda dirigí na komunidat, pa ku komienso di un aña nobo.

Ora Promé Minister evaluá e funshonamentu di Gabinete Pisas II su kurason ta yena ku hopi alegria i satisfakshon pa ku kon, kada un di e ministernan ku ta forma parti di e famia di Gabinete Pisas II, a sirbi e komunidat.

“Si, nos a bira komo un famia i den tur famia tin susesonan ku nos ta preferá pa esakinan no a tuma lugá, pero importante ta pa sa kon pa manehá esakinan, hasiendo uso di sano huisio na tur momentu.”

El a sigui indika ku ta bon pa tur hende sa ku kada Minister di Gabinete Pisas II su kurason ta bati tur dia pa nos komunidat. Kada un ta lanta tur dia ku e mesun deseo, energia, amor, dedikashon, kurashi i determinashon pa traha kontinuamente riba un mihó bienestar pa nos komunidat. “Mi ke gradisí kada un minister di Gabinete Pisas II inmensamente, i rekonosé ku boso ta tremendo i danki di kurason pa boso kontribushon.”

Dia 30 di dezèmber último gobièrnu a publiká e relato di fin di aña 2023 di Gabinete Pisas II. Esaki ta un otro inisiativa di e Gobièrnu aktual, debí ku den e Akuerdo di Gobernashon a pone ku lo ta transparente ku komunidat.

“Nos komunidat mester sa kiko su Gobièrnu a hasi, kiko su Gobièrnu a logra den kada aña i kiko su Gobièrnu ke sigui hasi den e siguiente aña. Den e relato di fin di aña 2023 a deskribí tur loke boso Gobièrnu a hasi i alabes kua ta tur e logronan ku kada minister a kosechá. E relato aki a bai pa tur Medio di Komunikashon i e ta disponibel riba e website di Gobièrnu di Kòrsou.”

Promé Minister sr. Gilmar Pisas a kompartí ku komunidat kua ta e metanan mas importante ku ke logra den aña 2024.

Pa ku e Ministerio di Asuntunan General i komo boso Promé Minister nos lo:

1. Pone nos Refineria kuminsá drai zetá i pa krea kupo di trabou bèk pa nos hendenan;
2. Kuminsá ehekutá e akuerdo ku a firma ku Venezuela pa ku tur e debenan di PDVSA ku a keda atras;
3. Finalisá e proseso pa Kòrsou bira miembro asosiá di e organisashon Karibense Caricom;
4. Eliminá Visa pa Repúblika Dominikana;
5. Sigui traha riba e proyekto di teksto di lei konsolidá;
6. Pronto lo firma e MoU pa ku e ret di Gas ku mester bini entre Venezuela i Kòrsou.

Pa ku e Ministerio di Finansa:

1. E Landsbesluit di UBO-register lo drenta na vigor;
2. Kòrsou lo haña un evaluashon positivo durante e “Mutual Evalutaion 2024” di CFATF (Caribbean Financial Action Task Force);
3. Landsverordening op de kansspelen (LOK) lo drenta na vigor;
4. Inkorporá e asina yama Curaçao Gaming Authority pa hasi supervishon via tantu online gaming komo “land based casino’s”;
5. E Landsbesluit depositogarantiestelsel lo drenta na vigor;
6. Belastingdienst lo bai trata “bezwaarschrift “ nan mas lihé;
7. Implementashon di e “Roadmap Financieel Beheer”;
8. Sigui ku e trayekto pa instituí un “Hoge College van Staat” i un “Begrotingskamer” pa por yega na un presupuesto balansá;
9. Baha e interes ku ta pagando riba e fiansanan di likides (e asina yamá Covid-leningen).

Pa ku e Ministerio di Hustisia nos lo:

1. Sigui reklutá mas personal pa organisashonnan di e kadena hudisial;
2. Hasi kambionan na e diferente pòstnan di Brantwer pa asina hende muhé por djòin pa hasi e trabou represivo;
3. Start investigashon pa konstruí un post di Brandweer nobo òf realoká esnan aktual;
4. lmplementá “Actpol Mobiel App” pa Polis;
5. Kumpra mas material moderno i inovativo, sigui digitalisá pa asina sigui fortifiká e kuerpo di Polis;
6. Maneho pa entrega un petishon pa risibi un pèrmit di estadia di mas ku 1 aña lo kambia;
7. Pa ku SDKK (Sentro di Detenshon i Korekshon Kòrsou lo kuminsá ku proyektonan pafó di SDKK, manera kurso di barbero, instalashon di intercom i sigui ku e formashon di prezunan;
8. Yega na un akuerdo ku Korte Komun di Hustisia den kual ta paga alimentashon direktamente na e mayor ku tin ku risibi esaki;
9. Profeshonalisá e punto sentral pa mèldu ku yudansa di UNICEF;
10. Sigui ku e plan “Krese” ku usando fondonan di e fondo di kriminalidat i tambe riba kapitaaldienst;
11. Inverti den e edifisio nobo pa Landsrecherche pa asina baha gastu;
12. Sera un kombenio ku Sint Maarten pa trahadonan por haña formashon na ORV;
13. Traha un “hindernisbaan” pa training di studiante.

Pa ku e Ministerio Tráfiko, Transporte i Planifikashon Urbano nos lo:

1. Kuminsá ehekutá e promé fase di e “Meerjaren Onderhouds Programma” pa drecha i mantené kamindanan;
2. Na Obrasnan Públiko lo bin un departamento speshal pa atendé ku proyektonan grandi di e “Meerjaren Onderhouds Programma”;
3. Pasa dor di e IMSAS (Member State Audit Scheme) audit i tur su retonan ku esaki lo trese kune;
4. E “businesscase” pa un registro di barku nobo lo ta kla;
5. Bin ku 6 bus ku lo kore kompletamente “offgrid”, ku lo benefisiá nos medio ambiente i ku no ta dependé di provishon di koriente di Aqualectra;
6. Inisiá e proyekto piloto di Bus na Barber;
7. Finalisá 850 dossier pa ku otorgamentu di tereno, pa hende por konstruí nan kas, logrando 3.5 mion èkstra pa kaha di Gobièrnu pa medio di erfpacht i hür;
8. Sigui duna permit pa konstrukshon ku e meta pa yega na 1500 pèrmit ku lo krea un invershon ekonómiko di 450 mion florin;
9. Kuminsá implementá e 12 proyektonan den kuadro di e “Programma Grond en Vastgoed (E6/E7)”;
10. Kuminsá ku e proyekto di “waterzuiveringsinstallatie” na Klein Hofje i Tera Kòrá;
11. Krea un maneho pa bibienda di kas i sigui bende kasnan di pueblo;
12. Establesé un strategia cibernétiko pa ku “cybersecurity” i “cybermanagement”.

Pa ku e Ministerio di Desaroyo Sosial, Labor i Bienestar nos lo:

1. Kontinuá ku konstrukshon di kasnan sosial;
2. Logra un oumentu struktural di e montante mensual di penshun di behes;
3. Mehorá di un forma struktural e fasilidatnan sosial, e.o. onderstant, dor di konekt’é ku e montante di e sueldo mínimo;
4. Sigui brinda e servisio adekuá i nesesario na partnernan sosial, esta dunadonan di trabou i sindikatonan, pa salvaguardiá, mantené, promové i kaminda ta nesesario, restablesé pas i trankilidat laboral den sektor privá, konforme stipulashon di e ordenansa di Disputa Laboral (Arbeidsgeschillen Landsverordening 1946).

Pa ku e Ministerio di Salubridat Públiko, Medio Ambiente i Naturalesa nos lo:

1. Habri Post di Dòkternan di Kas (HAP) kaminda por akapará kuido urgente na pashènt pafó di orarionan di ofisina;
2. Den promé mitar di aña 2024, kuminsá ku renobashon di “Curaçao Zoo” (parke di bestia/dierentuin);
3. Kuminsá intensifiká kuido di personanan ku diabétis;
4. Restrukturá e proyekto pa kuido di salu mental;
5. Kraamkliniek lo muda pa nan edifisio nobo na Colon;
6. Sigui baha gastu den salubridat, manera ampliashon di uso di remedi genériko;
7. Implementá sistemanan di ICT pa outomatisá e proseso di kuido;
8. Oumentá e supsidio pa fundashon i institushonnan di kuido ku 6%;
9. Kibra e barera di idioma den salubridat. Entrante yüli 2024 tur dunadó di kuido ku ta komuniká ku pashènt mester ta dominá nos idioma Papiamentu;
10. Pone Fad’s (Fish Aggregating Devices), boei i drecha diferente playa;
11. Drecha Pir di Piskadera;
12. Atendé ku Sargassum na un manera mas agresivo;
13. Un maneho di playa spesífikamente pa kada playa;
14. Protokòl entre e Ministerio di GMN i VVRP pa maneho di playanan;
15. Un maneho mas moderno pa ku kon atendé ku shushi;
16. Kobransa di leges pa botonan ku ta mará den hafnan di piskadó;
17. Lo sigui pone “drijflijnen” na otro playanan pa garantisá seguridat;
18. Efektonan di e team di handhaving lo ta mas visibel;
19. E Lei di Medio Ambiente ta kla pa bai Konseho di Minister i Parlamento.

Pa ku e Ministerio di Desaroyo Ekonómiko nos lo:

1. Premirá un kresementu di 14% di turistanan di estadia;
2. Ampliashon di kantidat di kamber, mehorashon i diversifikashon di e produkto turístiko;
3. Sigui train hendenan lokal pa traha den e sektor turístiko;
4. Enfoká riba oumento di kapasidat di energia duradero di 30% pa 50%;
5. Introdusí un struktura nobo di tarifa tantu pa awa komo elektrisidat pa nos paga un tarifa mas abou pa konsumo di energia;
6. Kuminsá ku “engineering” di e planta di “electrolyze”, pero tambe di e mulinanan di bientu riba laman.
7. Inisiá e proyekto pa baha importashon di 6 produkto agrario dor di stimulá nan produkshon lokal:
8. Inisiá e programa di “Mi NEGOSHI Shared & Support Services” pa duna sosten i guia na empresarionan mikro, chikí i mediano;
9. Sigui fomentá stabilidat di preis dor di sigui stimulá uso di Mi PÒTMÒNI;
10. Introdukshon di Makutu Básiko i SmartCard;
11. Intensivá kòntròlnan di preis;
12. Konsentrá riba implementashon di e Strategia di “Nashonal di Eksportashon (NES)”;
13. Stimulá invershon i inovashon i sigui traha riba atkerí miembresia di WTO i fortifikashon di CINEX;
14. Figurá kambio den lei di HORECA (vergunningslandsverordening), pero
    1. tambe den e lei di establesimentu di negoshi (vestigingsregeling);
15. Sigui traha riba e sistema digital di registrashon;
16. Introdukshon di un Instrumento di Garantia pa pèrkurá pa stimulashon di nos ekonomia ku por generá entre Naf. 400 pa Naf. 800 mion.

Pa ku e Ministerio di Enseñansa, Siensia, Kultura i Deporte nos lo:

1. Amplia i terminá modulonan di digitalisashon, desaroyá material, bini ku aparatonan pa alumno i maestronan;
2. Amplia skolnan ku tres skol mas adishonal;
3. Lanta ofisialmente e unidat di Enseñansa obligatorio (Leerplicht);
4. Adaptá di ley di Enseñansa Obligatorio (Leerplicht);
5. Habri porta di Kas di Kultura;
6. Adaptá e sistema di V en V Stelsel (Vergoeding en Verantwoording stelsel).

Pa ku e Ministerio di Maneho di Gobernashon, Planifikashon i Servisio

Públiko nos lo: 

1. Finalisá SENSO ku éksito;
2. Sigui implementá e programa pa mehorá funshonamentu di aparato públiko, esta VFO (Versterken Functionering Overheid);
3. Sigui invertí den proyekto di digitalisashon;
4. Logra e E-depot na Archivo Nashonal pa informashon por ta permanente disponibel;
5. Inverti den un programa di kapasitashon i training pa nos ambtenarnan.

El a finalisa bisando ku Gabinete Pisas II ta drenta un aña nobo ku konvikshon, firmesa, prepará i ku e perseveransia i determinashon nesesario pa sigui sirbi komunidat i sigui krea mas oportunidat i bienestar pa nos komunidat.

“Ta esaki nos a primintí i ta di e forma aki boso Gobièrnu lo sigui traha. Nos kurason ta na su lugá, fihá riba e bienestar próspero pa nos  komunidat. Abo nos ke sirbi, abo nos ke sigui traha p’é, e bienestar di abo i bo famia ta keda nos meta prinsipal. Gabinete Pisas II su fortalesa i Fé i lo keda bini di Señor i nos lo keda obra den su nòmber. Nos deseo firme ta pa abo sigui kere, sigui tene konfiansa i speransa, ku Gabinete Pisas II a bini ta traha i lo sigui traha pa Abo i bo famia su bienestar. Ku Dios Todopoderoso, den nòmber di Kristu Hesus, lo sigui bendishoná nos komunidat abundantemente, i ku kada kas di famia lo eksperensiá un aña 2024 yená ku harmonia, pas, amor i hopi prosperidat.”