NEW YORK, AP.- Ayera un kantidat grandi di hende a marcha den kayanan di Manhattan pa protestá pa e insidentenan resientemente kaminda dos hòmber koló skur a muri na man di polis.
E manifestantenan a reuní promé na Union Square Park kaminda nan a marcha gritando “pueblo uní hamas lo ser dividí” i “nos ke hustisia, hustisia, ki ora nos ker’é, awor”.
E manifestantenan despues a bandoná e parke i a kuminsá marcha riba Fifth Avenue miéntras polisnan tabata lucha pa tene e multitut un banda.
Michael Houston un studiante di Brooklyn di 20 aña a bisa ku ta e rabia i falta di medida a hib’é na protestá tambe.
” Ta e definishon di insensates”, asina Houston a bisa.
Kon por ferwaktu ku algu ta diferente si nada no ta kambiando.
Lawrence Amsterdam di 35 aña tambe studiante di Brooklyn a kondená loke el a yama un inhustisia polisial. “Ta suponé ku un persona ta inosente te ora demostrá su kulpabilidat.
Pero manera e ta mir’é ta asesiná promé i despues hasi pregunta, asina Amsterdam a bisa.
Djárason un polis di Minnesota a mata ku tiru Philando Castile miéntras e hòmber tabata den outo ku un muhé i un mucha den un suburbio di St. Paul.
E insidente a keda transmití ku video bibu bibu via di facebook.
Un dia promé Alton Sterling a muri na Louisiana despues di a keda tumá riba asera pa dos polis blanku.
E insidente aki tambe a keda registrá riba un video tumá ku un telefòn selular.
Obama
Presidente merikano Barack Obama ta pidi polis pa eliminá e parsialidat den su filanan.
Presidente Obama a bisa ku tur merikano tin di sinti nan mes preokupá pa e tiramentunan di polis asina frekuente kontra hende koló skur i hispanonan.
El a menshoná punto pa punto for di un lista di estadístika ku ta mustra e preokupashonnan relashoná ku un parsialidat. Afromerikanonan ta keda tirá pa polis òf arestá mas ku dos biaha ku e merikanonan blanku.
“Ora e insidentenan aki sosodé, un gran kantidat di nos kosuidadanonan ta sinti ku esaki ta debí na nan koló di kueru, ku nan no ta keda tratá igual ku esnan sobrá”, asina Obama a afirmá. “I esei ta hasi doló.
I esei mester preokupá nos tur”.
E diagnóstiko ku e mandatario a hasi riba e problema a reflehá un oumento di e sensashon di frustrashon i disposishon pa papia den públiko relashoná ku e homisidionan kometé pa polis.
