WILLEMSTAD.- E proyekto di repartishon di kuminda i pakete ku Siloam ta enkargá kuné, un biaha mas ta bou di hopi preshon pa motibu di fondo. Tin un grupo fiho ku sin mas ta dependé di e servisio i donashon aki den aria di Bándabou, i komo tal si e ser deskontinuá e problema lo bira aun mas serio. Esei EXTRA por a komprondé for di un kòmbersashon ku e kordinadó dje proyekto aki di repartishon di kuminda i pakete, sr. Angel Alvarez. EXTRA mester bisa ku den kurso di aña pasá na sigur dos okashon e proyekto a konfrontá problema te ku mester a baha e kantidat di klientenan ku ta risibí pakete i kuminda pa dia. Pero na dos okashon e fundashon a risibí yudansa for di un donante anónimo fo’i Hulanda i tambe pa medio di un bazar ku a organisá na supermerkado. Ta bon pa bisa si ku Siloam tin un grupo fiho, aunke chikí, ku no ta lagando e grupo aki na kaya, pero e nesesidat ta hopi grandi. Segun e kordinadó, Siloam ta hopi agradesido i kontentu ku e grupito ku ta keda duna su sosten na e proyekto aki.
Sr. Alvarez a splika nos ku e proyekto tin 3 luna kaba ta kanando riba un mínimo. Ku un tiki kreatividat ta dunando kuminda na e grupo aktual no tur dia mas, sino riba djaluna, djárason i djabièrnè. Pa loke ta repartishon di pakete, ta sòru pa entregá di mas o ménos un 200 pakete pa luna i ku kontenidonan variá, dependiendo kiko t’e komestibelnan ku supermerkadonan a koperá kuné.
Un biaha mas sr. Alvarez a splika ku, e hendenan ku ta risibiendo kuminda ta kai den diferente kategoria. Tin hendenan ku simplemente no tin entrada i tin mester di alimento; tin famianan ku tin algu di entrada (penshun/ònderstant) pero ku e no ta yega pa tur nesesidat; i tin e grupo ku ta biba ku sierto limitashonnan físiko òf mental ku no por yuda nan mes i ku mester di yudansa sin mas. Loke tin pensá pa hasi ta p.e. en bes di un kas risibí 6 kuminda, nan ta haña 4, bou dje palabrashon ku lo tin di kompartí algu pa tur hende por haña.
E situashon no ta fásil, ya ku e proyekto den su totalidat no ta enserá kuminda so. Naturalmente tin e ingredientenan, tin e grupo pa kushiná i tin esnan pa kore repartí. Teniendo kuenta ku e situashon, e kòkinan ta haña un kompensashon chikí. Te awor kuminda ta ser repartí djis den serkania di Siloam (Soto, Sa. Cruz, Barber, Tera Kòrá, Jan Kok, aunke tin mas petishon den otro arianan pero no por kumpli ku nan.
Segun sr. Alvarez, e situashon no ta fásil, pero djamars lo sinta ku gerensia pa hasi un evaluashon i wak kon a bai sigui.
