Charis Nicholson i Rubiella Thielman

Na ougùstùs último un grupo di hóben hende muhé a drenta e proyekto di Un Komienso Nobo. I awor ta turno pa nos hende hòmbernan hóben. E inskripshonnan a habri kaba i ta sera na desèmber. I p’esei nos a papia ku Charis Nicholson i Rubiella Thielman kendenan a konta un tiki mas di e proyekto i kiko e hóbennan por spera. Un Komienso Nobo no ta un proyekto nobo pero den pasado e tabata konosí komo Social Vormings Traject pero awor e nòmber ta Un Komienso Nobo. For di mart 2022 nan a kuminsá kuné i tin total di 6 grupo ku a pasa den dje. Kuater tabata hende hòmber i dos tabata grupo di hende muhé.

Proyekto pe hóben sin skol i sin trabou

Rubiella Thielman i Charis Nicholson a splika ku un komienso Nobo ta un proyekto di Gobièrnu di Kòrsou huntu ku Marine basis i ta un proyekto interministerial kaminda ta hasi uso di e servisionan di Marine kazèrne. E proyekto ta spesífikamente pa hóbennan entre 18 pa 24 aña i awor aki el a habri kaba i ta buskando e hóbennan hende hòmber. E proyekto ta pa e hóbennan ku no a kaba skol i ku no ta trahando. No ta intenshon pa kita niun hóben for di trabou ni skol. Tambe si e hóben a kometé un delito chikitu i tin un karchi kastigu ménos di un aña e ta bon biní. E proyekto ta dura un aña largu i na final di dje e hóben lo haña un trabou i mantené esaki.

Siña pa drenta trabou

E proyekto ta wòrdu partí den 4 luna i e sobrá lunanan e hóben ta bai siña pa e drenta trabou. E promé 4 luna e hóben ta siña di disiplina, siña komuniká, diferente hèrmènt pa traha i despues di 4 luna e ta bai e trayekto di labor kaminda e ta skohe un fishi i ta yud’é pa haña un trabou i siñ’é métodonan pa e mantené e trabou. Un Komienso Nobo ta kompletamente na papiamentu.

Diferente disiplina envolví

Teniendo na kuenta grandura di e proyekto mester bisa ku tin diferente disiplina envolví. Ta dependé kiko e hóben skohe i kua direkshon e ke bai, lo hasi uso di e organisashonnan ku ta yuda. Ya kaba a pasa den 6 grupo kaba i awor ta e di shete grupo. E muchanan muhé ta den nan fase di 4 luna i na desèmber ta pasa den e trayekto di labor.

Tèst di eskoho

Mirando e diferente trayektonan di labor ku tin, a ripará ku e hóbennan mayoria bia ke bai den e direkshon di horeka, bartènder, waiter. Banda di ta tene kuenta ku e  demanda laboral, e hóben tambe ta pasa un tèst di eskoho, pa wak kiko ta nan afinidat, kiko nan ta sinti nan mihó i kiko nan por. Tin bia e hóben ta pensa leu, kisas e no a kaba VSBO i ke bira polis. Pero nan ta masha realístiko i ta wak kiko e hóben por traha den dje. A base di e tèst di eskoho ta skohe e direktor pa e hóben.

Mas mucha hòmber ku mucha muhé

Kua grupo tin mas interes pe, mucha muhé òf mucha hòmber? Segun Charis i Rubiella, e grupo di mucha hòmber semper ta mas grandi i tin mas interes pe. Kisas teniendo na kuenta ku e proyekto ta tuma lugá na base di Marine kazèrne, ta pone ku e hòmber ta relashoná su mes mas lihé ku nan. I banda di esei ta haña ku esnan ku ta kai for di enseñansa ta mucha hòmber. I outomátikamente ta e mucha hòmber ku mas interes tin pa e proyekto.

No ta proyekto militar

Teniendo na kuenta ku e proyekto ta tuma lugá na kazèrne di Marine, hopi bia nan ta haña ku e hóben ku skohe pa e proyekto, ta bin ku e idea di ke bira un militar. I p’esei nan ta purba duna e informashon bon kla entre otro via e trahadó sosial òf e maestro di skol pa kòrda bisa e hóben ku no ta dienst aki pero ta un proyekto un komienso nobo ku e meta final ta pa e hóben haña trabou i mantené e trabou. E militarnan ta yuda den kaso di disiplina pero e no ta bira militar. Tin hóben ku a kaba e proyekto ku éksito ku a mèldu nan mes pero durante ku nan ta den e proyekto nan tabata bai skol anochi i nan a logra drenta militar. Nan tin dos hóben ku a sali for di e proyekto aki i a mèldu nan mes pa militar pero no ta outomátikamente e proyekto di Un Komienso nobo ta nifiká ku e hóben ta bira militar.

Interesá e hóben ku mester di dje

Ta bishitando medionan di komunikashon pa yega na e hóben. Pero banda di esaki ta usando media sosial i propagá e proyekto spesial pa e hóbennan ku a kai for di enseñansa. I ta hasi e apelashon na e profeshonalnan òf famia tambe ku sa di hóben ku ta kana riba kaya sin trabou i por tuma kontakto ku nan.

Inskripshon a habri

E trayekto aktual a kuminsá kana ku inskripshon. E hóben por app òf yama na 5636626 i tin un tim kla pa duna kontesta pa asina pro haña e informashonnan nesesario. I na desèmber lo ba tin e selekshon pa e hóben por drenta e proyekto ku ta kuminsá dia 3 di mart 2025. Pa por kai den e selekshon mester tin entre 18 pa 24 aña sin ta bai skol i sin trabou. Nan ta hasi tèstnan físiko, skibi karta di motivashon pa sa dikon e hóben ke drenta e proyekto, ta papia ku e hóbennan pa sa nan informashonnan. Despues nan ta hasi tèst di sikólogo i kùr médiko. Esaki pasobra e hóben ta bai hasi tèstnan militar i mester sa si su salú ta oké. I despues ta hasi tèst na FMA. Si e hóben tèst positivo pa droga no ta strob’é drenta e proyekto pero si e drenta e proyekto e no por sigui usa droga. Nan lo bai un guia di FMA pa por stòp tambe si ta droga nan ta usa. I si topa un hóben ku tabata usa òf ta usa droga, ta keda vigil’é durante di e trayekto pa ta sigur ku e ta keda leu di dje. I tambe despues ku e hóben terminá e proyekto, e tim lo keda tira un bista kon ta bayendo. Nan tin hóbennan ku a kaba e proyekto na 2022, 2023 i ketu bai ta kanando positivamente den nan labor.

Ta yud’é logra su meta

Pa e hóben por kana e proyekto ku éksito ta tene kuenta ku lo siguiente; durante di e proyekto e hóben ta haña diferente lès manera hulandes, werkhouding, disiplina, parti sosial, kon ta presentá na trabou, skibi karta di motivashon i CV. I banda di e training di deporte na Marine, nan ta haña tur esakinan i na final nan tin di demostrá di a siña algu i kon nan ta bai implementá den e trayekto laboral. Kaminda e hóben pega e ta haña yudansa i si e mester di sikólogo pa yudansa pa e por sigui riba e kaminda tambe e lo haña. Yudansa pa e hóben logra su meta e lo haña sigur.

Kompensashon a subi

E hóben ku drenta e proyekto ta keda kompensá. Den pasado nan tabata haña 500 florin pa luna pero awor e suma a subi te na 750 florin. I banda di esaki ora e kaba e proyekto eksitosamente i si e no tin reibeweis e lo por pasa su reibeweis riba gastunan di e  proyekto. Awor aki por akapará 24 hóben total den e proyekto di Un Komienso Nobo