Sinòpsis no tin niun nòmber i ta laga espasio pa kada hende yega na su konklushon
WILLEMSTAD.-E kompania Deloite, riba enkargo di Banko Sentral di Kòrsou i Sint Maarten (CBCS), a hasi un investigashon riba loke a sosodé den Girobank. Manera ta konosí Girobank ta e banko ku a kibra na Kòrsou i e proseso di likidashon ta kanando ainda bou di Giro Settlement Holding.
Deloite a presentá e resultado di e investigashon na gerensia di CBCS den un Rapòrt fechá 21 yüli 2023, ku konklushon di echonan. Deloite mes ta indiká ku ta un grupo relativamente chikí ta dispone di e Rapòrt kompletu di echonan.
EXTRA ta tuma nota ku den e sinòpsis no tin niun nòmber di personanan embolbi di un manera òf otro. Si ta asina ku a indiká e diferente personanan pa medio di e funshon òf funshonnan ku nan a okupá den e trayekto ku ta embolbi Girobank. E sinòpsis no ta kontené konklushon ni tampoko a kalifiká e funshonamentu òf e falta di funshonamentu di personanan ku tabata embolbi. Ta e intenshon ku kada hende ku tuma nota di e sinòpsis por yega na su propio konklushon a base di e informashon ku ta keda suministrá. Mas detaye den edishon di EXTRA.
