Reyna Joe Aktivá bo energia ku Feng Shui

180

E aña  aki ta aña di konènchi. Nos ta bai den positivismo entre otro ku Feng Shui. Reyna Joe den nos promé programa di Djasabra pa 2023 ta laga nos sera konosí ku Feng Shui i e energia positivo ku nos tur mester tin e aña aki.

Hasi un diferensia

Feng Shui ta yuda tur tur hende; si bo ta interesá pa hasi un diferensia den bo bida, si bo ta interesá pa bai dilanti den bida, si bo ta interesá pa yuda bo yunan i bo pais, Feng Shui ta e mihó hèrmènt. E ta un konosementu antiguo di mas di 4 mil aña  dokumentá. Feng Shui a kuminsá na India i ainda nan ta praktik’é na e pais ei.  Emperadornan chines a deskubrié i ora nan a mira kiko por hasi bai dilanti nan a tuma i praktik’é pero e rais no a kita di India i tampoko e ta hopi diferente di e Feng Shui di awendia. Ounke segun Reyna, mester tene kuidou pasobra nos ta praktiká esun klásiko ku a keda hasi na mundu serka Lillian Too, por sierto serka ken Reyna a sertifiká i e konosementu aki hopi hende, sigur merikanonan a kambi’é na loke nan por komprondé. “Si mi bisa por ehèmpel pone algu kòrá den ost pasobra e lo yuda bu, e ora ei bo ta bisa ta ki ko’i kèns esei ta. I p’esei merikanonan a hasié algu di kon ta pone muebel, mesa i muraya siendo ku e ta algu mas profundo”. Segun Reyna Joe, tur kos den bida por keda di Feng Shui, e ta un manera energétiko spiritual pa organisá bo bida. Tur kos, bo aparensia, manera ku ta kai sinta, tur ta kosnan ku por hasi komo parti di Feng Shui. Por ehèmpel Reyna a sigui menshoná, den kuadro di kon pa kai sinta i aparensia, ku tambe por wak kon pa sinta pa tin amor den bida, kua ta mihó direkshon pa éksito i abundansia, kua mihó direkshon pa siña. Si ke éksito i abundansia bo mester sa kon pa sinta na trabou, pone e stul pa sinta den e bon direkshon pa haña energia di e direkshon ei, pa haña forsa den e direkshon ei, ora hende wak bo nan ta hasié di e forma bon.

Hèrmènt pa bida

I kon pa yega na e kosnan aki. Reyna Joe a bisa ku e ta yuda hende pa wak nan Feng Shui. Reyna ta yam’é mas bien, e karta básiko pa un hende. Ta kosnan ku ta bálido henter bo bida, ku ta basa riba dia, ora, i lugá di nasementu. Tin hende no sa nan ora i no por bai muchu leu pa nan, pero esun ku si sa nan informashonnan ta un hèrmènt pa su bida.

 

Filosofia di bida

I pa kita tur duda ku hende por tin òf kerensia ku tambe ta biba den hende, Reyna Joe a bisa bon kla ku Feng Shui no ta religion. Den su kaso e ta katóliko. Feng Shui ta un hèrmènt, un filosofia di bida, kon ta wak bida. Tin dos pregunta ku mas hende ta bin kuné i esei ta kon ta haña sèn i kon ta haña amor. Hopi bia e hendenan ku ta solamente esei nan ke sa no ta keda serka Reyna pasobra  e no ta gaña niun hende pa e no lanta mal karma pa su mes. El a bisa ku mester kuminsá ku salú pasobra si tin salú por gosa di sèn amor i tur kos. Hopi bes hende no ta wòri ku nan salú pero e hende ku pe si salú ta importante si por traha kuné. I ora ta salú i no solamente salú pa no sinti malu pero salú ta trese salú di sèn, amor, fortifiká e salú básikamente i asina tur kos otro ta salú. Ora hende bisa nan no tin sèn, mester hasi nan skina finansiero salú. No ta lógiko manera programá nos tradishonalmente pero ora komprondé e ta bisa normal i tin kustumber ku tin di hasi di bo i tin kos ku a lanta kuné ku tin di lag’é.

 

Praktiká

I tur hende por yega fásil serka Reyna. El a bisa e tin e página riba Facebook Feng Shui Reyna i e hende ku ta hasié pregunta riba e página ei kon e ta hasi esaki i esaya, e hende ei no ta bin serka dje. E hende ku ke bin serka dje ta presentá i ke akshon awor. E página di Facebook ta for di 2012 i Reyna mes a kuminsá praktiká Feng Shui for di 1997 i loke e ke bisa ta ku e hende no ta bin manera e ke. Ademas hopi hende ta bin ku pensamentu di otro konosementu. Si ta asina e tin di kura e hende di e pensamentu ei promé. Reyna no tin un nesesidat pa konvensé niun hende nada. Si bo ta haña  ku tin algu den bida ku bo ke otro bin serka dje. Mayoria hende ke bin ku su problema awor awor pa un solushon. Esun ku ta kere ku e sa tur kos kaba no bai serka dje pasobra ta pone pèrdè su tempu. E hende serio bo ta mira mesora segun Reyna. Nan ta bin dirigí, nan ta hambrá, ke sa kiko nan tin di hasi i no ta diskutí. Tambe tin hopi hende ta den soledat i nan ta kere ku bo tei pa kombersá. Pero e no tei pa esei. Si e no konosé e hende, no por kana yega serka dje sin mas.

Aktivá energia

Kada akshon ku hende hasi di Feng Shui, ku kada kura, ta kuminsá aktivá energia. Esaki basá riba loke e nos a di e hende e por manifestá den 9 sekònde, 9 minüt, 9 ora, 9 dia, 9 siman òf 9 aña. I dikon no hasi algu awe pa aki 10 aña ta bon.  Hende a kustumbrá ku kosnan rápido i esei ta un opstákulo pa traha riba futuro. El a duna komo ehèmpel si e konsehá pa un yu por bai bon na skol pa kambia sierto kos den e yu su kamber. E no ta bisa e hende pa hasi nada ilegal ni robes. Por ehèmpel den kamber di kada mucha mester tin un kashi di buki. Por ta un rèki chikí ku 3 buki mes ta bon. Si bo ke bo yu ta sabí mester tin algu asina. Pero hende ta kuminsá diskutí kuné ku e bukinan ta kue stòf. Den su kaso e tin masha hopi buki i tin bou di stòf pasobra no ta tur dia ta mishi ku nan. Pero dikon no pone algu ku ta stimulá bo mes inteligensia, pa keda alerta di konosementu, pa keda alerta ku tin kos eifó ku e no sa. Tin asina tantu kos interesante pa sikiera lesa di nan, tantu konosementu ku nos lo benefisiá di nan si nos tabata sa di nan. Nos ta na un edat pa nos mes difísil i skohe. Pero si bo ta den hendenan ainda kontra di esei, no bisa ku bo ta lesa pero hasié den ketu. Ku lesamentu bo ta gana konosementu, bo ta gana poder.

 

Fortifiká bo mes

Feng Shui ta bruheria? Riba e pregunta aki Reyna a bisa ku hopi bia nos a keda programa ku asina bo hasi un kos ku ta manifestá un kos pa bo e ta prohibí. Si tuma kualke akshon ku e solo meta positivo, e ta konvensí ku si e hasi algu malu malu ta bin pe. Tur hende k ta kere ku por hasi kos pa daña bida di otro, ta nan ta e úniko ku lo karga e konsekuensia i no esun ku nan a hasié pe. E ta hasi kos positivo. Manifestashon ta hasié pa bon. Si hasié pa malu ta e ta karga e konsekuensia, Ademas e hende por fortifiká su mes kontra tur energia malu den su direkshon. Si e sa ku algu ta malu, fortifiká su mes. Por ehèmpel si bo ta bai topa ku sierto hende ku no ke bo bon, sòru yega promé, posishoná bo mes den bo direkshon di forsa i e hendenan tin di sinta otro kaminda, kaminda a sobra. E no tin miedu di esei, mas komprondé karma, mas e ta deseá e hende haña loke ta di dje.

Krea bo mes karma

Hopi hende entre otro polítikonan mes ta papia di karma, lubidando ku nan ta kreando nan mes karma.  Dikon rabia ku hende hasi algu si bo tambe a hasié. Karma ta akshon i reakshon i nos ta kreando karma konstante. Tin bon karma pero tur kos ta drei rònt di konosementu ku hende ta papia loke e no ta komprondé i e deseo di sa mas. Reyna a traha masha duru pa limpia su mes di hopi kos pasobra no tabata fásil. Bo ta biba den un sirkulo, grupo i komunidat kaminda hende ta hasi sierto kos i si hende ta reakshoná ku esfuerso pa stroba bu i pa nan sinti bon. Por ehèmpel si e disidí di entrante awe ta bisti lila so hende ta kuestioná sin sa nifikashon di lila den Feng Shui ku ta kolo di abundansia i sèn. El a siña su yunan no opiná riba loke nan no sa. Si no sa dikon un hende ta hasi algu kon bo por tin opinion.

 

Dokumentá

Feng Shui ta un tópiko ku komo hende no sa kiko e ta, hopi bia ta kere ta religion, ta kere ta asina mester pone muebel den kas i no a buska pa sa mas. A tende hende papi’e i ta reakshoná. I Reyna no ta diskutí ku hende ku ke diskutí di Feng Shui. E ta imigrante den e mundu di Feng Shui i ta siña tur dia. Loke ta dushi pa a ku ta loke nos grandinan semper a hasi ta por ehèmpel sòru a bo porta dilanti semper ta limpi. Zhanguile den kas na Feng Shui. Ta kosnan ku a pèrdè pasobra nos no tabata sa. Hopi konosementu di kulturanan bieu ta meskos ku Feng Shui. Hindú i chinesnan a dokument’é i esei no ta kambia. I p’esei si por lesa tokante e tópiko hasié, pasobra e ta kambia bo mundu i evitá hende ku a purba kambi’é na nan manera.

Kalènder lunar i solar

E kalènder ku ta usa den Feng Shui ta lunar i solar. Unu ta kon luna ta move i otro kon solo ta move. Esun solar ta 4 di febrüari ta e aña nobo ta kuminsá i esun luna ta fluktua. I  e kalènder lunar no ta kaba aña di tiger di awa i drenta aña di konènchi di awa dia 22 di yanüari awor. Den paisnan ku ta selebrá e ta un selebrashon di 15 dia. Luna nobo ta un dia promé esta 21 di yanüari i 15 dia pa yega luna yen i tur e dianan ei ta selebrashon i selebrashon grandi. Kada dia tin un nifikashon. Un kos ku e ta rekomendá ta ku si tin hende grandi den famia organisá e temporada ei bai bebe te serka nan. Bebe te ta un símbolo di kos bon. Hasié algu grandi ku famia, e ta positivo pa lanta e energia bon. Tur e kustumbernan di aña nobo di 31 pa 1 ripití nan na e aña nobo lunar i solar. E astrologia e zodiak ta 12 animal kuminsando ku djaka, toro, tiger, konènchi, dragon, kolebra, kabai, karné, makaku, gai, kachó ku porko. Awor nos ta diferente esun konènchi. E aña di tiger tabata un pisa. Por a ripará e energia ku tabatin ku ta pisa. Pero konènchi ta un animal masha dushi, diplomátiko i e tin su mal karakterístikanan pa tene kuenta kuné. Un kos ku tur hende ku tin nan porta di kas zùit, por spera un bon aña.  Direkshon nort tambe ta tremendo e aña  aki i si bo porta no ta, ta aktiv’é. E direktor nort wèst ku ta esun direkshon hende nòmber i hende pa yuda bu. E aña aki e ta fatal i mester hasi hopi kura pe. E aña aki e energia ta robes. Reyna tin su buki riba konènchi di awa ku ta disponibel serka e mes. Tambe e ta riba Facebook Feng Shui Reyna kaminda por tuma kontakto kuné tambe. I tur djadumingu atardi e ta lesa òf papia Feng Shui, esei na Reyna su kas.

 

 

LAGA UN KOMENTARIO

Please enter your comment!
Please enter your name here