Miéntras su ko akusado tin 18 aña
WILLEMSTAD.- Ayera dos akusado di kual unu relativamente yòn, a presentá den sala di korte, pa un kaso di atrako den apartamentu riba un pareha hulandes. E pareha tabata di bishita aki na Kòrsou.
E akusadonan J. Daal (26) i K. Hansen (19) a atmití di a kometé e atrako dia 11 di yanüari último, huntu ku dos hòmber deskonosí pa nan.
Segun deklarashon di e víktimanan, e hòmbernan a kibra e porta di glas ku un pata di kabra i kore drenta e apartamentu kara tapa.
Aki nan a topa e víktima hòmber i a eksigié pa duna nan plaka i hoya. Banda di esaki nan a pone arma di kandela na e hòmber su kabes, pa e entregá tur pertenensia .
E víktima muhé ku tabata drumi den kamber, a spièrta na momento ku el a tende stèm deskonosí ta papia ku su kasa.
Ora ku el a bula lanta fo’i kama i bai pafó pa wak kiko ta pasando, el a mira e hòmbernan riba su kasa ku arma i a kuminsá grita. Un di e hòmbernan ku a resultá di tabata Daal, a kana bai riba dje, listra den su kamber, kue su tas, benta esaki riba kama i bai ku tur su pertenensianan, manera renchinan di orea di oro, armbant di oro, oloshi i tambe 1200 florin kèsh ku e pareha tabatin den nan poder, pa bai paga e outo di hür.
Segun e víktima muhé, el a mira kon nan a pone su kasa drumi abou i sanger tabata basha for di su nanishi.
Despues el a mira dos hòmber kue e televishon den kas i tambe un oloshi ku tabata pone riba mesa bai kuné. I asina nan a kore bai fo’i dje kas. E pareha a kore bai den kamber, sera nan kurpa i yama polis.
Momento ku nan a sinti a bira ketu, nan a kore bai pafó i yama bisiñanan. Durante ku e víktima muhé tabata papia ku e bisiña, el a mira e outo ku e atrakadornan a uza, a kore bini bèk . El a rekonosé e hòmber ku tabata den su kamber ku arma di kandela den man ora ku el a baha fo’i dje outo, bula su kura bai paden atrobe. Mes ora el a kore bai skonde.
Polis a presentá na e sitio i lokalisá e vehíkulo. A surgi un persekushon i e agentenan a logra para e outo. Un di e hòmbernan a kore bai i e otro a keda sintá den outo. Esun ku a kore bai a resultá di tabata Daal, miéntras Hansen a keda sintá den outo.
Despues ku a detené Daal, el a atmití su kulpa, miéntras Hansen a hasi uzo di su derechi keda ketu promé, pa despues atmití su akto.
Ayera durante tratamentu di e kaso, Daal a duna di konosé ku e idea no tabata pa bai kometé niun atrako. E dia promé su wela a kaba di fayesé i su sentimentunan tabata poko abou e dia ei. Nan tabata kore huntu basilá i direpente nan a mira e dos personanan aki i a disidí di bai kometé e akto.
E tabata promé ku a baha bai paden, pero e no a mishi ku niun hende, menasá òf tabatin arma di kandela. El a listra e tas, kue e kosnan i sali bai. Na momento ku el a yega kas, el a tuma nota ku e no tabatin su tas. Esei a pone ku el a kore bai bèk, bula e kura pa bai kue su tas, paso su sédula tabata aden.
Pa loke ta trata Hansen, el a bisa ku e no tabatin arma, e tampoko konosé e otro hòmbernan ku tabata huntu ku nan i no a mira ken tabatin arma. Úniko kos ku el a hasi tabata, kue e televishon i e oloshi ku tabata riba mesa.
Wes na su turno a punta Daal, kiko ta e problema ku el a bolbe kometé un akto asin’aki, despues di a kaba di sinta 5 aña pa un otro kaso di atrako.
Banda di esaki, e tin un kastigu di 24 luna pa sinta, pa un kaso di kiebro i ladronisia ku ainda ta habri. Wes a bis’e ku e ta tata di dos yu i mester duna nan bon ehèmpel, pero e no ta mirando esaki serka dje. E akusado a bisa ku e dia ei e tabata poko tristu i tabata debil i a bolbe kai den mesun kos.
Su mama tabata malu, su frei na estado i e no tabatin sèn. Pero e ta kere den duna un lastu chèns pa asina e ta mihó tata pa su yunan.
Fiskal a haña tur e akusashonnan probá i hasi demanda di 4 aña di kual 4 luna kondishonal ku un periodo di prueba di 5 aña. Pa Hansen, fiskal a tene kuenta ku e ta “first offender” i a atmití su kulpa i na momento ku el kometé e akto e tabatin 18 aña. Mirando esakinan fiskal a hasi demanda di 24 luna pa e akusado. Na final ámbos a pidi sòri pa loke nan a hasi. Wes a bisa ku e ta bai pens’e i lo tuma desishon aki 3 siman.
