ROSEAU, DOMINICA, AP.- E sekretario general di Nashon Uní, Antonio Guterres, a pidi e komunidat internashonal pa diseñá mekanismonan nobo di yudansa finansiero pa rekonstruí Dominica, despues di orkan Maria.
“Den kada komunidat mi a mira ku mayoria edifisio ta destruí”, segun indikashon di e diplomátiko despues di a pasa ku helikòpter na vários pueblo di e isla pa kalkulá e nivel di destrukshon.
El a sigurá ku “nunka mi a mira un mondi kompletamente bashí, sin ni un blachi den palunan”.
El a insistí den konferensia di prensa ku promé minister Roosevelt Skerrit ku e ta profundamente impreshoná pa “e nivel dramátiko di destrukshon” ku e orkan a laga despues di pasa riba e isla 18 di sèptèmber anochi.
Dominica, di 790 kilometer kuadrat i ku 75.000 habitante, tabata e promé nashon afektá pa orkan Maria segun esaki a pasa den Karibe.
E fenómeno a provoká morto di 27 persona i a laga mas di 20 pèrdí riba e isla. Ademas, na Puerto Rico esaki a laga 40 víktima mortal i pèrdida material mionario. E orkan a provoká inundashon severo, destrukshon di kasnan i daño na e agrikultura di República Dominicana.
