Update: CMC studiando veredikto
Den un reakshon breve riba e veredikto riba LNT, Curaçao Medical Center (CMC) ta bisa ku nan a tuma nota di e veredikto di korte i lo analisá e detayenan den kolaborashon ku nan abogadonan. Mas informashon lo keda komuniká na momentu ku esaki ta disponibel
Minister Silvania: Awor tin klaridat
WILLEMSTAD.- Den un komentario adishonal minister Javier Silvania a deklara na EXTRA ku awor tin klaridat. E lei di standarisashon di entrada (LNT) ta konta pa spesialistanan tambe. Minister Silvania ta spera ku e por reuní ku Curaçao Medical Center i su spesialistanan pa wak kon huntu ta solushoná e diferente problemanan na CMC. Na opinion di e mandatario kuido pa pashènt ta sentral
EXTRA a tuma nota ku tin un desishon di korte pa loke ta trata e kaso entamá kontra gobièrnu riba e punto di Standarisashon di Entrada (Landsverordening Normering Topinkomens). Manera a konosí spesialistanan médiko ku ta traha den Curaçao Medical Center i tambe gerensia di e hospital a kuminsá un kaso den korte kontra gobièrnu pa eksigi ku e lei enkuestion no ta konta pa e spesialistanan den CMC. Korte a dikta na fabor di gobièrnu indikando ku CMC mester kubri e gastunan di e kaso na korte i ademas e veredikto ta drenta na vigor mesora. A rechasá tur e eksigensianan di tantu CMC komo di e spesialistanan den CMC. Mas detaye den edishon di EXTRA.
