Ser tata ta un privilegio hopi grandi

Hues Sigmar Carmelia

Nos ta klousurá e programa di Yüni ku tatanan, selebrando henter e luna komo luna di tata ku e invitado, hues mr Sigmar Camelia. Manera a keda menshoná na komienso di luna, Yüni tabata un luna dediká solamente na nos tata, nan ròl den edukashon di nan yu i nan eksperensia personal komo tata. Kada un tata a konta nan eksperensia úniko, i tabata bunita pa tende nan historia.

Promé ku bo a bira tata, kiko bo a imaginá ser un tata ta nifiká;

Sigmar a bisa ku semper e tabatin e pensamentu ku ta un tata lo ta algu grandioso. Na promé instante e no tabatin un idea konkreto di kiko e responsabilidat di un tata ta enserá. Bo ta pensa ku e sierto kos ta bai outomátikamente. Pero tin sierto kos ku bo mester menshoná mas ku 1 bia manera ora e yu no ke bisti paña. Esaki ta e kosnan práktiko ku e tabata pensa ku nan lo bini natural. Aparte di esaki, Sigmar tabata kompletamente habrí. Ta un tata ta un privilegio hopi grandi ku e ta orguyoso di ta.

Bo ta haña ku tin un diferensia entre hende muhé ku ta mama i hende hòmber ku ta tata pa loke ta trata edukashon di e yu; ‘Ami no ta haña ku mester ta asina. Semper mi tabatin e ideologia ku e relashon ku un yu tin ku su mama ta mas emoshonal, komo e yu a drumi 9 luna den barika di e mama lombrishi pegá. Awor ku mi ta den e sapatu, mi ta mira ku esei no ta e kaso. Tin bia e yunan ta hopi pegá na e tata, asta ku bo ta tende e mama komentá dikon, no pa yalurs pero komo remarke. Personalmente, mi ta haña ku tur dos mayor tin e mesun responsabilidat den tur sentido. Lo por tin repartishon ku un mayor ta duna mas tantu kuido”, pero Sigmar a indiká ku e komo tata ta purba hasi mas tantu di su banda.

I bo tin dos yu muhé, anto hopi bia nan ta bisa yu muhé ta yu di tata. Kon abo ta eksperensiá esaki; E no ta kere nan ta mas pegá kuné mas ku nan ta ku nan mama. Loke e ta tende hopi bia ta ku yunan muhé ta yu di tata i ta algu ku e ta eksperensiá tur dia. Hopi bia su yunan ta bini serka dje promé, despues nan ta bai serka nan mama pa bis’é ku tata di ta bon.  Esaki ta un patron ku el a nota i ta kere esei ta pasó e ta mas fásil i fleksibel kompará ku nan mama, ora ta trata sierto aktividatnan. Algun bia, ainda ora ku nan mama bisa no, nan ta kana bin serka dje, pero esaki ta e yunan su strategia: nan ta bini serka Sigmar promé i ku su aprobashon nan ta bai serka nan mama. Nan ta mira esaki komo un sorto di wega, pa nan  haña loke nan ke. ‘Mi ta konsiderá loke nan ke, i si ta algu rasonabel, mi ta bisa sí. Mi ta duna nan hopi espasio i esei ta yuda mi wak kon nan ta manehá, den e espasio ei”, Sigmar a bisa.

 Ta fásil pa eduká yu muhé?  Bo lo tabatin gana di un yu hòmber;Sigmar a konta ku e tin dos yu muhé, i e ta hopi kontentu ku nan. E no sa kon lo tabata si e tabatin yu hòmber. E no sa si e ta fásil òf difísil, pero e ta bai manera e mester bai, pasobra di un dia pa otro, e yu mester adaptá den bo famia i ta adaptá su mes.

Bo tin un ideal mucha hòmber ku e yunan tin ku bin kas kuné;‘Pa mi ta sinsero mi no tin un ideal mucha hòmber ku mi yunan mester trese kas. Básikamente, bo mester duna bo yu un bon edukashon. Nos yunan ta wak nos komo ehèmpel i komo tata bo no mester  supestimá esei. Si bo bisa nan no papia un palabra pa un motibu spesífiko bo mester wak bon pa abo mes no usa e palabra ei. Bo ta lanta bo yu ku sierto norma i balor, manera rèspèt pa nan mes, pa nan mayornan, i pa hendenan rondó di nan. Duna nan espasio pa nan konosé nan mes, pa nan por traha amistat, i pa nan por komprondé e mundu. I pa bini bèk riba e punto prinsipal, mi no tin un ideal, pero bo semper ke pa bo yu topa ku un hende ku nan por sigui krese kuné. Pero nos no ta den e fase ei ainda”, Sigmar a bisa ku un sonrisa.

 Kisas tabatin un desishon un disiplina ku bo a tuma pero kisas bo ta bisa bo por a hasi otro; Sigmar a bisa ku e no a pasa den e suseso aki ainda. Si dado kaso esaki tuma lugá e lo simplemente tene na kuenta pa siguiente desishon ku e tuma. E no por kòrda un situashon unda el a bisa ku e mester a skohe un otro desishon.

E forma ku abo a lanta kompará ku e muchanan di awendia. Bo ta mira un diferensia i kiko bo ta kere ta e kos ku mas ta influensiá e kambio; Pa Sigmar el a wòrdu lantá den un kas humilde unda su mayornan a traha hopi duru pa e por a bai skol. Den su kas loke tabata resaltá ta amor di kual e ta implementá den su mes yunan tambe. Kompará ku ántes, awendia, asta muchanan hopi chikí konosé tur kos di tablet i telefòn, loke tin un gran influensia riba nan. Semper tabatin retonan pa kria muchanan. Sigmar a menshoná ku si su yunan ke sa algu, nan no tin miedu pa puntra. Nan ta puntra tur kos i nan ta sigui puntrá te ora nan haña un kontesta satisfaktorio.

 Bo ta konsiderá bo mes un tata ehemplar; Lo e haña importante ta pa e por duna su yunan tur loke nan ke. Ta tata ta un responsabilidat grandi den diferente sentido. Pero un kos ku nos no mester lubidá ta pa tei pa bo yunan. Duna nan kariño, brasa nan tur dia si mester. Aunke e no tin tur e malchi di kon pa ta e tata ehemplar, e ta duna tur di su parti. I naturalmente Sigmar ta pasa kosnan positivo pa su yunan.

Hopi bia bo ta tende den komunidat ku hende hòmber no ta kria nan yu pa ku e parti di alimentashon. A base di esaki nos por konkluí ku nan ta un mal tata; Sigmar no ta ta kere  por yega na e konklushon ei a base di e situashon aki. E ta un hende ku ta kere ku den tur sirkunstansia mester tin un tata den e famia. Lamentablemente no ta tur tata por tei presente pa su yu. Esaki ta inkluí tantu sosten finansiero komo emoshonal. Kria un yu ta kosta hopi, i komo tata bo ta keda forma parti di e famia. Esaki ta bo responsabilidat. Pero no ta solamente esei, sino tambe duna kariño i atenshon.

 A base di bo eksperensia komo wes ki bo ta haña ku por ta nos tatanan falta den e komunidat aki; Sigmar a indiká ku e pregunta aki ta unu difísil pa e kontestá kiko tatanan falta. Loke e por bisa, ta loke e ta pensa komo e persona ku e ta i esaki ta un ripitishon di loke el a menshoná anteriormente. Tatanan mester proveé yunan den tur sentido, tantu finansieramente i emoshonalmente.

Si bo ta para dilanti di un grupo di tata òf hende hòmber ku un dia tambe lo por ta tata. Kiko abo lo konsehá nan pa tene na kuenta den edukashon di nan yunan; Bo mester sa di  e bida nobo ku bo ta bai kuminsá. E ta un responsabilidat grandi, i tur dia bo mester kuida bo yu. Ora e wak kon su mayornan a lant’é, te ainda nan ta kuida di dje i ta invit’é bin kome. E prinsipionan ku e ta haña importante ta òrdu, desensia, disiplina, traha duru pa tur loke bo ke logra, i enseñansa. No ta importá kiko nan ke bira, pero ta importante pa eduká nan bon. I finalmente, nan lo skohe nan mes, i esaki lo forma nan trabou den futuro.

  Bo tin gana pa bo yunan sigui bo pasonan komo wes; ‘Si tur dos di mi yunan ke sigui mi pasonan mi lo aploudí i guia nan den dje, pero mi no ta bisa ku nan mester. Mi ta lag’é kompletamente habrí pa nan mes skohe nan karera di kurason. Mi no ke pa nan skohe algu simplemente pasó nan tata ta hasié òf a sugirí e. Si nan skohe di kurason, mi lo ta felis. Basta nan hasié ku amor, dedikashon, i pashon, mi lo sostené nan’, Sigmar a terminá.

Asina nos ta klousurá e luna ku nos a dediká i selebrá nos tatanan. Den yüli, nos lo kontinuá ku un programa interesante di kual e atenshon lo ta riba e diferente formanan di edukashon i vários instituto ku ta duna tur ramo di edukashon. Keda pendiente pasó nos tin hopi programa mas. Sintonisá i sigui nos!