Tur kos ta klá pa e di dos anochi:
Yegada di Servando y Florentino pa Hak’e Curaçao Summer Festival
Nostalgia, rekuerdo i puru éksito!
WILLEMSTAD: Ayera tardi alrededor di 6’or Servando y Florentino a yega Kòrsou pa nan presentashon awe nochi den Hak’e Curaçao Summer Festival. Nan ta programa pa habri e festival awe nochi. Portanan lo habri for di 7’or di anochi pa kuminsá akomodá públiko ku lo tei awe grandemente den Curaçao Airport Venue. Ta primintí un anochi nostalgia, rekuerdo i puru éksito; Servando y Florentino, Nicky Jam i NSTYPLY. Sòru pa bo tei trempan di manera ku bo por ubiká bo mes te dilanti di esenario! Nicky Jam lo yega awe den transkurso di dia Kòrsou. Manera antisipá awe nochi lo bira un anochi ‘sold-out’, karchinan ta limitá na punto di benta (ainda) i ta kosta 150 florin. Balcony VIP a sold-out for di siman pasá. Awe Nochi: Si bo yega trempan, lo bo ta t’e dilanti!
E promé anochi tabata fantástiko!
E anochi a habri ku Olga Tañón ku di un manera tòp a hinka públiko den un ambiente fenomenal di baile i goso, kantando tur su hitnan! Un berdadero ‘mujer de fuego’, su show tabata eléktrisante for di inisio te fin; ku baile, videonan sinkronisá, iluminashon i efektonan spesial! Despues di Olga Tañón a sigui AxL Orchestra ku a bin ku un repertorio variá i bon hinká den otro i pa finalmente e legendarionan subi esenario. Fernandito Villalona, Wilfrido Vargas, i Kinito Mendez respaldá pa un orkesta ‘all star’ di 16 músiko internashonal, a sa di pone públiko baila riba tur nan éksitonan kòrdando nos tur ku e momentunan bunita di bida mester wòrdu selebrá! Hak’e Curaçao Summer Festival ta mira bèk riba un tremendo anochi!
Riba fotonan athunto un impreshon di djabièrnè anochi, e promé di Hak’e Curaçao Summer Festival. Pa awe ta pidi públiko, sali trempan for di kas i bin ku ánimo. Tin reglanan stipulá pa awe nochi i ta pidi tur hende tene kuenta ku nan for di adelantá por mira esaki riba https://www.facebook.com/hakesummerfestival
