Eksonerashon 3 miar tabata pa tapa ayudo na ‘friends and family’?
WILLEMSTAD.- E echo ku minister di Finansa, Javier Silvania tin kasi 1 aña ta pone parlamento warda riba su kontestanan riba e 3 miar florin di debe ku el a duna eksonerashon pe ta lanta mas interogatorio bou di polítikonan. Esaki mirando ku mas i mas informashon ta lèk rondó di e supuesto motibunan pa yega na un desishon pa duna eksonerashon di debe di impuesto.
A base di kòmbersashon ku EXTRA a hiba ku diferente miembro di parlamento den simannan tras di lomba di partidonan manera PAR, MAN i PNP por a komprondé ku awor mas ku nunka ke haña aklarashon si ta bèrdat a disidí pa eksonerá debe di impuesto di tur entidat te ku 2017 pa tapa ku a privilegiá solamente sierto entidatnan na promé instante.
Tambe ke sa si en prinsipio e idea tabata pa eksonerá “logeergastenbelasting” i debe di entidatnan semi gubernamental manera SOAB i BAB. Otro informashon ku ta sirkulá i ku ke klaridat riba dje ta si ta den un reunion ku ekspertonan a splika ku loke e minister a kaba di hasi, esta duna sierto entidat so eksonerashon di debe di impuesto, no ta bon i konsekuentemente a disidí di duna eksonerashon na tur entidat.
Mirando ku Silvania konstantemente ta menshoná nòmber di direktor di Ontvanger, Alfonso Trona, partidonan ke sa e base legal den kua Wim Nijdam ta den servisio di impuesto i ki ròl e tin einan i kiko tur e ta hasi i a logra for di dia ku e ta einan.
Manera ta konosí posishon di partido MAN ta ku promé ku Silvania presentá den Komishon Sentral di parlamento pa papia riba investigashon di SOAB, e mester kaba di kontestá preguntanan den un reunion públiko ku ta suspendé pa kasi 1 aña kaba riba eksonerashon ku el a duna pa 3 miar florin na debe di impuesto. Den e kuadro aki parlamento a pidi tur konsehonan ku a duna pa a yega na e desishon pa duna eksonerashon di debe, e base hurídiko pa a tuma e desishon pa duna eksonerashon i un splikashon riba kiko a kondusí na eliminashon di tur debe di tur entidat te ku 2017.
Washington
Silvania mes no ta na Kòrsou atrobe. Despues di su regreso for di un fakansi na Sürnam e minister a sali for di 12 aprel pa Washington pa asistí na e reunion anual di Fondi Monetario Internashonal i banko Mundial. E minister ta bèk te 22 aprel awor.
