Parlamentarionan a biaha for di djabièrnè
WILLEMSTAD.- E delegashon parlamentario ku ta partisipá na e bolsa di Intertraffic a biaha for di djabièrnè 12 aprel pa Hulanda. E bolsa spesial pa profeshonalnan den sektor di mobilidat ta kuminsá awe 16 aprel i lo dura te 19 aprel awor na Amsterdam.
Tin sinembargo hopi konmoshon rondó di e último biahenan di e komishon aki, esta e bishita luna pasá na Colombia pa tuma nota di e proyekto “Mi Casa Ya” i awor Intertraffic. Motibu prinsipal ta e echo ku pa promé biaha a disidí di nombra un miembro di parlamento ku no ta forma parti di e komishon komo lider di delegashon.
Ta trata di parlamentario pa partido Nashonal, Corine Djaoen-Genaro (PNP). Presidente di parlamento Charetti America-Francisca a base di e konmoshon aki manda un mail pa sekretario di tur komishon fiho di parlamento ku e instrukshon pa manda tur proposishon di biahe pa presidente di parlamento promé ku e komishon aprobá esaki.
America-Francisca ta bisa ku ta su persona ta responsabel pa ehekushon di presupuesto di parlamento i si kuminsá biaha pa loko i gasta sèn ku miembronan mes lo tené responsabel pa esaki. “Mester tin sèn sino e parlamentarionan no por bai.”
Segun e presidente di parlamento ta splika ta solamente biahenan pa Parlatino i reunionnan di Ipko parlamento ta aprobá tur aña adelantá. Tur sobrá proposishon pa biahe mester evaluá promé si tin sèn riba presupuesto. “Si ta ‘free for all’ tin ta para tur biahe.”
E komishon fiho di tráfiko i transporte di parlamento a haña invitashon serka minister Charles Cooper pa asistí na Intertraffic. A surgi un kambio den e konstelashon di e delegashon pasobra Ramon Yung (MFK) no ta biaha mas pa Hulanda i a remplasá su persona ku un otro parlamentario pa MFK, Frenciss Lourens.
Otro miembronan ku a biaha ku e komishon ta Juniel Carolina (MFK), Djaoen-Genaro, Sheldry Osepa (PNP), Ana Maria Pauletta (PAR), Rennox Calmes (TPK) i Michelangelo ‘Lo’ Martines. Minister Charles Cooper tambe ta presente na e bolsa huntu ku ámtenarnan di su ministerio.
