WILLEMSTAD.-Shaheen Elhage, eks presidente di FFK den un karta habrí ta reta tur esnan ku di forma anónimo ta bisa i òf skibi ku e i su famia ta ladron, pa nan ‘bin aden’ ku nan nòmber pa asina e por hiba tur dilanti korte pa difamashon. EXTRA a tuma nota di un karta habrí e eks dirigente di FFK ta skibi ku el a tuma nota for di fin di siman pasa ku tin un òf mas hende ta tratando na difamá su persona i su famia. Ta usa e konklushon di e rapòrt riba FFK pa bisa ku e i su famia a hòrta sèn di FFK.
Shaheen ta bisa ku ya kaba el a instruí su abogado pa prepará un lista ku nòmber di tur esnan ku hasi nan mes kulpabel na difamashon. Den e kuadro ei e ta pidi tur esnan konserní pa duna kara i publiká nan nòmber. Tambe e ta reta tur hende, inkluyendo dirigentenan di FFK, eks dirigentenan di FFK, miembronan di direktiva di klupnan i tur otro hende pa publiká unda e supuesto rapòrt ta indiká ku Shaheen Elhage i su famia a hòrta sèn di futbòl.
‘Si por konkluí ku a base di e konklushonnan di e rapòrt deliberadamente for di seno di eks dirigentenan di FFK a pretendé ku nan no tin sierto dokumentunan ku Fifa lo tabatin mester di dje durante di e investigashon. E ta bisa ku famia Elhage a keda ketu dos aña pero awor si ta basta.
Shaheen ta indiká mas aleu ku te ainda ni FFK ni Fifa no aserka su persona pa asina e por reakshoná riba e ponensianan ku ta menshoná den e rapòrt.
