“Shoarma Papi” faltando ku tur sorto di regla!!
WILLEMSTAD.- Hopi ta esnan ku ta gaba su kosnan di kome, pero ta resultá ku Shoarma Papi lo tin di tuma un pousa di algun dia of algun siman pa motibu ku tin kosnan fo’i regla ta sosodiendo. Esei EXTRA por a komprondé for di un kombersashon ku sr. Ronnie Cornelis, hefe di e departamentu di kontrol na e Ministerio di Desaroyo Ekonómiko (MEO). Manera sr. Cornelis a yega di bisa na diferente okashon kaba, ora ta trata di kontrol ta tur hende por spera riba nan bishita.
T’asina ku ayera tardi un tim di kontrol di MEO a akudí na Shoarma Papi na Rio Canario pa tene un kontrol riba su papelnan. Pero aki a bin resultá ku tin kosnan fo’i regla ta sosodiendo. Segun Cornelis, primeramente e trùk di shoarma aki ta operando sin ku e tin pèrmit (ainda). El a entrega un petishon pa pèrmit si pero esaki ta den proseso. Ademas un negoshi dje tipo aki no por bai den operashon wardando riba su pèrmit. Ta te na momentu ku su pèrmit ta kla e por start.
Na di dos lugá, esnan ku ta manehá e trùk di shoarma aki a disidí di pone un terasa, pues tin fasilidatnan a klientenan sinta kome. Esei tampoko no ta permití, pa motibu ku na momentu ku un negoshi tin e tipo di fasilidatnan aki e mester tin tambe fasilidatnan sanitario (tualèt).
Pa e tipo di negoshi aki ku a bende no solamente shoarma pero tambe ‘oliebollen’, pan etc., e operashon ta ser permití di 7or di mainta pa 7or djanochi. Sinembargo den e periodo ku Shoarma Papi tabata operando e tabata keda habrí te kasi mardugá.
Es mas, ora ku a kontrolá e papelnan mas aleu a bin resultá ku tabatin un dje damanan empleá ku no ta di kùr. Komo sifuera no ta basta, e damanan den e truk aki a habri nan arsenal di palabra sushi pa a insultá e kontroladonan i fotógrafonan di prensa. Ora ku polis a informá e doño i empleadonan ku si nan sigui hasi ònbeskòp ku lo tin di detené nan, tur kampana a guli lenga!
Pero segun sr. Cornelis, nada di esaki a kita su koleganan for di nan focus i e tarea ku nan a bai pa ehersé. Pero ni maske kuantu insulto por tin, MEO lo hasi su trabou pa kombatí ilegalidat. Esnan ku ta kumpli ku lei i regla no tin mester di tin miedu ora ku MEO presentá.
