WILLEMSTAD.- Giovanni Decaster, presidente di e sindikato di shofùrnan di bus chikí STO, ayera tabata den sala di korte di apelashon, despues ku e no a bai di akuerdo ku e but di faha di seguridat ku el a risibí komo shofùr di bus.
Segun e prosèsverbal, Decaster a haña un but di 225 florin dia 22 di yüni, pa motibu ku e no tabatin su faha di seguridat bistí durante ku e tabata kore bus.
Durante tratamentu di e kaso, Decaster a bisa ku el a bin pa papia na nòmber di 150 shofùrnan di bus chikí.
Segun e presidente di STO, shofùrnan ta kore bus mas ku 11 ora pa dia ku e faha bistí i nan ta haña esaki inhumano.
El a splika ku e shofùrnan ku ta kore e konvoinan di turista, òf e busnan di turista manera busnan chikí i tambe e shofùrnan di konvoi, a haña dispensashon pa bisti faha di seguridat.
Pero nan komo shofùr di busnan chikí i taksi ku tambe ta kai bou di transporte públiko, e regla mester konta pa nan tambe. Esei tabata e motibu ku el a apelá, pa motibu e ta haña ku e regla mester konta pa nan tambe.
Pero e dia ei e no a haña rason serka wes, pa motibu ku e wes di promé instansia a bis’e ku e komo wes e no por kambia e lei, pero solamente ministernan i parlamentarionan por hasi esaki.
Decaster a bisa ku despues ku e artíkulo a sali den prensa, un hurista ku e no konosé a yam’e i bis’e ku e tin tur rason.
E hurista a dun’e vários lei ku ta indiká esaki klaramente. Ayera durante tratamentu di e kaso, Decaster a trese esaki dilanti den Hof, pero abogado general a para riba ku no tin dispensashon pa e shofùrnan di bùs kore sin faha di seguridat.
Ora ku Decaster a bai mustra e tribunal e diferente artíkulonan di lei ku el a trese, e presidente di Hof a pidi pa abogado general bai revisá esakinan un ratu. Despues di a hasi esaki, e abogado general a bin bèk i bis’e ku e tin rason i awor el a tuma nota ku e leinan ku e tabatin su dilanti relashoná ku e kaso aki, tabata di Sint Maarten.
Mirando esaki e tribunal di Hof a posponé tragamentu di e kaso, pa asina duna Ministerio Públiko chèns di studia e lei nan mas mihó pa despues, den dos siman manda su pensamentunan pa Hof i tambe Decaster. E tribunal di Hof a duna di konosé ku si e lei ta ta kuadra ku e loke nan el a trese dilanti, korte lo hasi esaki general i shofùrnan di bus i tambe nan pasaheronan no ta obligá na bisti faha di seguridat.
Dia 26 di yanüari e tribunal di Hof lo bin bèk ku tratamentu di e kaso pa tuma un desishon.
