Gustavo i Gy-Shoun Semeleer (3D Curacao Professional Fireworks Display)

Nos a yega na e temporada di fin di aña, e temporada di vürwèrk. I no tin un hende mas mihó pa sinta papia tokante di esaki ku no ta Gustavo Semeleer, e hòmber di vürwèrk na Kòrsou. E aña aki e tin su yu huntu kuné, Gy-Shoun, ku a gradua na ougùstùs, i e ta e tiradó/harmadó di vürwèrk profeshonal mas yòn. Ora nos ta papia di profeshonal, no ta referí na vürwèrk ku ta tira na kas, sino e trabou ku ta eksigí konosementu, disiplina i lisensia. Gustavo mes tin 28 aña di eksperensia den e trabou aki, i for di aña 2001 e ta un profeshonal, ku dedikashon na un arte ku ta eksitoso, pero ku tambe ta eksigí responsabilidat i seguridat.

E desaroyo di vürwèrk den e último dies añanan

Gustavo ta konta ku tin sierto tipo di vürwèrk ku a keda komun a traves di añanan, manera e pagara. Pero na China, kaminda gran parti di vürwèrk ta bin for di dje, nan ta sigui inová konstantemente, trahando modèl i efektonan nobo kada aña. Segun Gustavo, e ta hasi un esfuerso konsiente pa kada temporada trese kos nobo pa Kòrsou. “Mi ta purba tur aña pa introdusí modèl i efektonan nobo, pa ora mi ta hasi un show di vürwèrk, e públiko por mira e diferensia kompará ku añanan anterior,” e ta splika. Kada bia ku un modèl nobo ta bin den uso, e ta nota kon e show ta bira mas dinámiko i visualmente mas impreshonante, ku un reakshon mas fuerte for di e públiko. Esaki ta mustra ku inovashon den vürwèrk no ta solamente tékniko, pero tambe un forma di arte ku ta sigui evolushoná ku tempu.

Di show ta diferente

Gustavo ta sigui bisa ku e vürwèrk ku e ta usa pa show, no ta e mesun ku nos por haña kumpra den tienda. Hopi hende ke tira kos mas bunita ku e vürwèrk ku normal ku bo por kumpra den un negoshi. Dor di esaki, importadónan di vürwèrk, inkluyendo Gustavo (Curacao Professional Fireworks Display 3D), ta traha ku diferente kategoria, manera 1.3 òf 1.4, dependé di e klasifikashon i e estado di produkshon na China. Awendia, e sistema a kambia un tiki. Bo por topa klasifikashonnan manera F1, F2, F3 i F4. Esaki ta debí ku China ta traha ku diferente siudat i diferente tipo di material, i kada un tin su mes nivel di riesgo i intensidat. Gustavo ta bisa ku e, personalmente no ta importá vürwèrk di kategoria 1.3 pa añanan kaba, paso segun e, e no ta masha diferente for di 1.4. “Durante un show, hende no por distinguí i bisa: esaki ta 1.3 òf 1.4.” Hopi hende ta kere ku 1.3 ta outomátikamente mas peligroso, pero segun Gustavo esaki no ta kompletamente bèrdat. Tur kos ta dependé di kon e vürwèrk ta keda trahá, tratá i tirá. E ta bisa ku regularmente e ta haña hende ta bisa: “Semeleer, mi ta bai kumpra algun kaha,” pero pa esaki bo mester pidi pèrmit. E vürwèrk ku bo no ta haña simplemente den negoshi ta eksigí un pèrmit spesífiko. P’esei tin hende ta kumpra vürwèrk serka Semeleer i despues ta bende esaki na e públiko. Pa Gustavo, informashon, klaridat i responsabilidat ta esensial. Tur vürwèrk ku e ta trese for di China ta bin ku un label ku ta splika kon e mester keda tratá i manehá. Banda di esaki, durante di aña e ta publiká un lista di seguridat ku instrukshonnan di kon pa anda ku vürwèrk. Pa añanan kaba, Gustavo ta pone hopi énfasis riba e lista aki pa mantené seguridat i pa evitá situashonnan ku por bai robes. “Ora algu pasa,” e ta bisa, “responsabilidat ta kai riba e importadó.” I manera nos sa, hopi hende gusta eksplorá ora nan no ta den nan mihó estado, por ehèmpel ora nan a bebe, ta fuma òf ta kansá, i esaki ta pone ku edukashon i kòntròl ta aun mas importante.

Di 2017 pa 2025, mas regla i mas  kòntròl

For di 2017 te awor, regla nan riba vürwèrk a bira hopi mas estrikto, i segun Gustavo, esaki ta algu bon. “Tur aña,” e ta bisa, “ora mi mèldu sentral di polis òf hospital, e ta tende ku tin ménos kaso di emergensia.” Esaki no ke men ku aksidente no ta sosodé, pero nan ta bira ménos i ménos kada bia. I ora bo bai wak mas profundo, den mayoria di e kasonan, e problema no ta na e vürwèrk, pero e manera ku e hende a manehá e, kos di deskabeyá, i no ta respetá reglanan di seguridat. Gustavo ta enfatisá ku tur vürwèrk ku e importá i usa ta pasa pa un proseso di tèst riguroso. E tèst nan aki no ta keda hasi djis pa un persona so, pero huntu ku instansianan manera brantwer, polis, GMN i DOW. “Si bo tèst un vürwèrk,” e ta splika, “i por ehèmpel e mesun vürwèrk ku a pasa e tèst despues bai robes, porta e e fout ta na e vürwèrk ei.” Esaki ta mustra ku kòntròl i dokumentashon ta esensial. Vürwèrk, segun Gustavo, ta algu ku ta keda trahá pa hende, i mester kòrda ku hende no ta perfekto. Den e añanan ku a pasa, el a ripará ku e kantidat di aksidente a baha, I esaki e ta kere, ta un resultado di mas regla, mas konsientisashon i mas kolaborashon entre profeshonalnan i outoridatnan. Pa Gustavo, esaki ta e prueba ku ora bo pone regla i bo tene bo mes na dje, e ta yuda ku nos no ta mata e tradishon ni selebrashon, i bo ta protehá hende.

Zonido i harmonia di vürwèrk

Na Kòrsou, e zonido di vürwèrk no ta bira mas duru. Normalmente, Gustavo ta traha ku un preshon di 120, i bo por haña algun modèl ku ta mas fuerte, pero kasi niun no ta riba 129. E punto, segun Gustavo, no ta e zonido ta hasi e show mas mihó, sino ta e bunitesa visual. Durante un show, bo por kombiná 2 òf 3 vürwèrk ku ta produsí un zonido mas fuerte, pero esei no ta e elemento prinsipal ku ta krea e show. Loke ta mas  importante ta variashon: e variashon di koló, e variashon di efekto, i kon bo ta koordiná e lansamentu ku tempu i espasio. Kombinashon di lus, koló, i zonido ta krea e emoshon ku ta mustra e arte di e vürwèrk, sin kousa molèster òf peliger pa e públiko.

Formashon i supervishon den show di vürwèrk

Gustavo ta un master den su área i a haña su lisensia na Puerto Rico ku ta permití ku e por tèst i aprobá hende pa manehá vürwèrk legalmente. E por desmantelá, evaluá e téknika i firma sertifikado pa e persona ku a pasa e tèst. Un hende ku a pasa e tèst na Kòrsou ta keda rekonosé si e bai otro pais, komo Gustavo ta un master riba e tereno. Segun Gustavo, el a instruí hende di Boneiru i Aruba, i awor ku su yu, Gy-Shoun, a gradua, el a instruí un total di 13 persona ku ta kualifiká pa hasi e trabou riba un nivel profeshonal. E ta bisa ku pa un show grandi, bo por haña un total di 58 persona envolví, pero pa e fecha spesífiko, manera 31 di dezèmber, normalmente tin 6 show pareu, e promedio di persona pa show por varia. Durante e evento, Gustavo ta insistí ku ningun hende ta bebe òf huma, i e ta keda na altura pa supervisá tur aspekto. E ta hopi kritiko banda di seguridat i disiplina, pa komprometé su mes pa duna un show ku ta espektakular.

E ta agregá ku tin un ‘shooter’ ku ta hende muhé, pero pa otro aña, Gustavo lo ke un klas di 12 hende muhé . Pa fin di aña, sigur 1 ‘shooter’ hende muhé, lo mester por duna un show.

Gy-Shoun i su karera den e área di vürwèrk

Gy-Shoun a risibí su promé diploma na IOWA, ‘pyrotechnician’, i tres dia despues, 9 di ougùstùs, el a risibí su sertifikado di China. Na promé instante, su motivashon pa sigui e kaminda tabata pa motibu di su tata, Gustavo, ku ta hasi e trabou ku pashon i profeshonalismo. Na skol, Gy-Shoun semper tabata gusta sensia i eksperimento, un interes ku el a logra integrá den e mundu di vürwèrk. Pa e, e trabou no ta solamente un obligashon, sino un hòbi ku e ta namorá di dje. Gy-Shoun a disidí di sigui e stap di su tata, i ta menshoná ku bo por manehá vürwèrk via dos método diferente: manual òf via kòmpiuter. Pa pasa e tèst, bo mester dominá tur dos método, pero promé, bo ta siña e parti manual i despues bo por siña e parti di teknologia. Asina e ta prepará pa bira un operador kompletu, sigur i profeshonal den tur aspekto di e show di vürwèrk.

IOWA i China: Un eksperensia úniko

IOWA tabata un entrenamentu di un siman largu, ku ta eksigí determinashon i disiplina. Gy-Shoun mester a lanta tur dia trempan pa ta na tempu pa su entrenamentu di 8 di mainta, i e dia tabata kaba te atardi. Durante e siman, el a pasa tres tèst grandi, ku e último tèst di kual tabata dia riba su aña, i el a logra haña su diploma. Pa esun di China, Gustavo, a regla pa e hendenan di China bin  Kòrsou dezèmber pa dos aña, sin Gy-Shoun tabata na altura. Basá riba e trabounan ku Gy-Shoun a hasi, nan a produsí un video di dokumentashon ku a ronda un total di 80 ora di registrashon den e dos añanan, ku ta reflehá su dedikashon i pashon pa e mundu di vürwèrk.

E sentro global di vürwèrk

China ta e pais di vürwèrk. Gustavo ta konta ku tur dia e ta kombersá ku e Chinesnan, i mayoria bia nan ta topa na Merka pa trata tópikonan di importashon i eksportashon. E ta splika ku pa bai China, bo mester pasa diferente proseso, manera saka visa i e sistema di komunista ku por trese sierto desafio. Adishonal, sierto tipo di vürwèrk ta bai Merka i di Merka nan ta bini Kòrsou. Durante tur aña, Gustavo ta kombersá ku diferente persona pa koordiná, i si ta urgente, e ta bai Merka pa un reunion. E ta usa e oportunidat pa mustra ku Kòrsou, aunke e ta chikí, e ta potente den eksperensia i talento. Ora Gustavo a duna lès na Santo Domingo, nan no tabata por kere ku Kòrsou ta un isla chikí, ku nivel i talento ku ta remarkabel asina. Resientemente, Gustavo a duna un show na Spaña ku a laga tur hende babuká. Pa Gustavo, aparte di ta un negoshi, e mundu di vürwèrk ta su pashon i hòbi.

Forma di warda vürwèrk

Gustavo a yega di duna gobièrnu di  Kòrsou tres diferente plan pa oumentá e seguridat. Komo importadó, bo tin e deber pa instruí e komunidat kon pa usa e vürwèrk, pa splika tur e proseduranan, pa asina por evitá kualke riesgo òf aksidente. E ta bisa ku e seguridat ta bon pero semper e por bira mas mihó. Tur importadó ta koordiná ku otro pa mantené uniformidat i pa tur hende ta riba e mesun liña, pa evitá desórden. Pa siguiente aña, Gustavo tin planiá pa aserka gobièrnu pa e por guia e proseso, pa asina krea un nivel di seguridat mas optimal, ku opinion di tur importadó- i profeshonalnan.

Show di Vürwèrk

Tur aña nos ta spera pa e show di vürwèrk grandi, i 2025 no ta diferente. For di 27 di dezèmber, benta di vürwèrk ta kuminsá, pero kompanianan grandi di vürwèrk, manera esun di Gustavo ta kuminsá tira show for di komienso di dezèmber. Tur siman tin evento, pero algun ta privá, ku públiko no tin informashon di dje. Algun show planiá pa 2025 ta:
- 28 di dezèmber: Hucor Holding ku ta Pizza Hut, Kentucky i Subway.
- 29 di dezèmber: Sambil.
- 30 di dezèmber: Kooyman; e dia aki lo tin mas show, mas informashon lo bini despues.
- 31 di dezèmber: Vários show, pero esun di mas grandi ta na Jan Sofat, ku un show di 1 ora. Aña pasá tabatin un promedio di 50 pa 60 boto. Gustavo ta bisa ku aña pa aña e show ta bira mas i mas grandi.

Na total, por spera un 30 show durante e 4 dianan aki.

Produkshon i disponibilidat di Vürwèrk

Vürwèrk ta keda dividí segun estilo i kategoria, kual ta determiná kon e ta tira i kiko bo por spera di e koló i efekto. E vürwèrk mas konosí na Kòrsou ta pagara, aunke, e demanda ta bira mas i mas tiki kada bia, komo hende ke mira mas koló na lugá di zonido. I na e otro banda, si awa kai, bo ta haña bo ku pagara pa sigur 2 pa 3 dia, Gustavo ta konta chistoso. Tin vürwèrk ku por bai kontra awa, pero komo ku Kòrsou tin un klima tropikal, e importashon di e tipo di vürwèrk aki ta limitá.

Gy-Shoun a bini ku idea pa pone barcode riba kada modèl. Ku e barcode bo por skèn i wak e instrukshon kon pa usa e vürwèrk. Tabata tin un kònteiner ku kuater diferente modèl, i barcode pa skèn a yuda distinguí kua modèl ta kua. E Chinesnan a gusta e idea hopi mes, e tabata algu magistral, Gustavo ta bisa. E konsepto tabata tan impreshonante ku otro aña nan lo trese esaki Kòrsou, despues di a demostrá su éksito na Bèlgika.

Skarsedat di Vürwèrk

Gustavo ta splika ku lo por tin un skarsedat di vürwèrk e aña aki. Por ehèmpel, for di e 60 kònteiner ku Gustavo a importá for di China, solamente 4 tabata kla pa usa. Gustavo a importá dos, i un otro importadó a importá e dos otronan. E ta sigui bisa ku ta previsto ku sigur 10 pa 11 kònteiner no lo bai yega Kòrsou, ku ta kousa un skarsedat temporario di vürwèrk. E situashon ta pone preshon riba e kompania pa e no afektá e shownan di vürwèrk.

Gy-Shoun Semeleer aki 10 aña
Gy-Shoun, aki 10 aña, ta mira su mes komo un master, siguiendo pasonan di su tata, Gustavo. Na e momento aki, e ta un profeshonal riba e tereno, i su meta ta pa sigui introdusí inovashon, manera e sistema di barcode pa vürwèrk. Durante e tempu aki, el a konstatá ku hopi hende ta duda pa kumpra vürwèrk, prinsipalmente paso nan e vürwèrk ta funshoná. E aña aki, Gustavo a dal e stap, dor di introdusí un sistema nobo kaminda bo por mira videonan di e vürwèrk, algun dato i deskubrí kon bo mester tira e vürwèrk. Detayenan chikí manera instrukshon tékniko: kon largu e vürwèrk ta tira, kon leu bo mester pone pa mantené seguridat.

Gustavo ta bisa ku e ta kla, i den e añanan ku ta bin e ke prepará Gy-Shoun pa e tuma e operashon di vürwèrk.

“Mucha bou di 10 aña por tira vürwèrk solamente bou di supervishon di un adulto.” Komo mayor, bo mester supervisá tur paso i Gustavo ta indiká na mayornan pa laga e yu usa sensia pa sende e vürwèrk, komo e palu ta mas largu i pa krea seguridat pa e yu. Desde ku Gy-Shoun tabata 7 aña, Gustavo a kuminsá siña su e kon pa tira vürwèrk.  Un biaha, Gustavo a bisa su yu pa duna un show ku kosnan chikí, manera galiña, strea etc., e ta konta un sonrisa.

Gustavo ta terminá ku e frase: “Seguridat ta kuminsá na nos mes, i ta kaba na nos mes.”
E ta pidi pa pueblo di Kòrsou komportá i respetá e reglanan. Si tur hende sigui e instrukshonnan, kosnan lo kana nèchi i tur hende por yega kas bon. Asina, e yu por sigui desaroyá su konosementu i eksperensia pa vários aña mas, i krea shownan aun mas espektakular.