Roy Lai

Últimamente, hopi hende ta papia tokante di abeha. El a bira un molèster pa e komunidat, te ku asta e ta krea un resistensia pa hende sali for di kas i bai disfrutá di nos naturalesa. Pa temperá e pániko na Kòrsou, Djasabra a sinta den hòfi kombersá ku un eksperto ku tin mas ku 40 aña di eksperensia ku e kriatura chikí aki, pero ku ta poderoso, señor Roy Lai.

Di krio di kabritu pa abeha

Roy ta konta ku for di chikitu el lanta i a mira su tata tabata kria abeha. Despues ku su tata a fayesé, niun hende mas den Roy su famia a kria abeha. Na e momentu ei, e tabata kria kabritu. Pero e tabata tin hopi molèster di e kachónan di 4 pia i esunnan di dos pia, e ta bisa. El a risibí e konseho di polis pa mihó e deshasí di e kabritunan pa e no mester bai será. E ora ei Roy a pensa pa e bai hasi algu ku hende no ta molesti’é, i a disidí di sigui su tata su pasonan pa kria abeha. Ounke, un par di aña pasá nan a kima 3 kaha di abeha den Roy su kurá tòg e no a stòp.  I awor e tin mas ku 40 aña den e mundu di abeha. Despues di a siña hopi di abeha, aktualmente, Roy ta yuda hende ku ta deseá di kria abeha pa nan gana konosementu. Roy a konosé vários hende, ku a bai Hulanda òf otronan ku a fayesé, ku a kontribuí na desaroyo di su pashon pa abeha. El a desaroyá su konosementu di abeha pa medio di buki. Manera el a bisa nos “Tur kos a kuminsá na un buki di Hulanda”, e ta bisa, “Wageningen bijenhuis”. Lamentablemente, e bukinan di Hulanda tabata papia mayoria bia di “jaargetijden”, kual no tin na Kòrsou. Konsekuentemente, Roy no por a sigui ku e informashon aki. Segun tempu ta bai, via via, Roy a kumpra un buki for Wolter Kelly di Merka. Ku informashon di e buki di Hulanda I e buki di Merka, el a sigui desaroyá su pashon pa kria abeha. Roy ta konta ku e abehanan a manda e hospital 2 bia, pero te dia di awe e ta keda nan amigu.

Trabou di imker

E ta bisa ku un imker no ta mata abeha. Un imker ta purba di kue e abeha pa por kria i kuida nan. Kuido di abeha ta eksigí hopi rekisito. E por parse un trabou fásil, pero den realidat e ta kosta hopi tempu i dedikashon. Ora bo ta bai kue abeha, bo mester wak si e espasio ta adekuá pa kria nan. Abeha ta eksigí un bon founa, hopi flor i un kantidat sufisiente di awa. Si bo pone abeha na un kaminda ku no tin tur e kondishonnan aki, bo ta krea un problema no solamente pa nan, sino tambe pa bo mes. Nan mester kome, i nan mester bebe. P’esei Roy ta bisa ku e tin hopi abeha kaba, i e no ta deseá di tin mas. Ántes, si Roy mira un palu di tamarein, e tabata bai serka e doñonan i puntra si e por bai kue e abehanan. Pero awor e no ta mesun yònkuman di ántes. E ta agregá ku “danki Dios, mi a konosé mi kasá ku tambe a siña di abeha na Hulanda, i nos ta ehekutá e trabou huntu”.

Dikon un imker ta usa huma

Abeha ta un tipo di insekto ku ta biba di kumindanan di naturalesa. Bestia ku hende tin sierto reakshonnan similar, ku nos no ta para ketu na dje. Mesun manera ku un hende ta reakshona ora e sinti holó di huma, abeha tambe ta reakshoná mesun kos. Mas kayente e huma ta, mas e abeha ta hala atras, i asina e imker por kontrolá nan i ehekutá su trabou. “E ta un trabou hopi dushi,” Roy ta bisa, “pero e ta eksigí tempu i invershon.” Segun e, ta dura entre seis i shete luna promé ku bo por mira e fruta di bo trabou.

Komportashon di abeha

Abeha no ta un bestia peligroso manera hopi hende ta kere. Ora Roy a kuminsá den e mundu di abeha, Kòrsou tabata konosé e abeha Karnika: un rasa masha trankil ku e Fraternan a trese. E tabata un bon rasa, pero tin situashonnan ku a kambia nan komportashon.

• 
  

• Un di e motibunan ta temporada di sekura, ora no tin awa ni flor. Mes kos ku ora hende no haña kuminda, nan ta bira agresivo, e abeha tambe ta bira agresivo. Den tempu di awa, e líkido ta keda den barankanan den seru. Pero si no tin awa, e abeha ta bai buska kaminda tin.

• 
  

• Awendia, basta hende ta bebe limonada na lugá di awa, nèt loke abeha gusta, kos zut.

• 
  

• Otro motibu ta ora tin hopi turbulensia den área, ku ta stroba nan di bula manera nan ke.

• 
  

• Banda di esakinan, e abeha ta bira fèrfelu dor ku hende ta hasi kos ku ta molestiá nan, manera resien un persona a pusha un barí ku tabatin abeha aden. “Zowiezo nan lo rabia,” Roy ta bisa. “Despues hende ta reklamá ku tin molèster di abeha.”

• 
  

• Hopi bia ora hende ta laba paña ku ‘softener’, e holó ta atraé e abeha.

• 
  

• Nan ta bin bula rondó di e persona, e persona ta zuai man i den e proseso e abeha por pèrdè balansa I ta defendé nan mes dor di pika bo.

• 
  

E rekomendashon di Roy ta simpel, pone awa den mondi. Yena e bòternan di limonada ku awa i pone nan serka e lugánan kaminda abeha ta frekuentá. Asina nan lo tene distansia di bo. “Tin hopi kos ku nos por hasi pa evitá molèster di abeha,” e ta bisa. “Nos mester kibra e pániko den komunidat, si bo no molestiá e abeha, e no ta hasi bo nada.”

E baile di Abeha

Un abeha por bula te 1.5 km for di su kas, segun Roy. “Promé ku nos mes lanta, nan a kuminsá laborá kaba,” e ta bisa ku un sonrisa. Loke ta interesante di abeha ta ku nunka nan no ta tuma liber, ni nan no ta bira malu, nan ta bon trahadó. “Nan ta asina organisá ku si hende tuma nan komo ehèmpel, nos lo por biba masha dushi.” Abeha gusta flor. Ora un abeha topa ku un flor ku tin bon hèktar, e ta bula bai bèk na su kas i hasi e famoso “baile di abeha.” Den e baile ei, e ta mustra direkshon, distansia i kantidat di hèktar sin usa palabra, solamente ku e moveshon di su kurpa. E otro abehanan ta wak, ta komprondé, i tur huntu nan ta sali bai pa buska e flor. Na e lugá ei nan ta kolektá tambe “stuifmeel”, ku ta pega na nan kurpa i ku e imker por kita pa uso òf ku e kolonia di abeha mes por kome.

Sin abeha bida no ta posibel

No tin un fruta ku abeha no gusta, tin algun flor ku nan ta evita, manera flor oraño òf ku ta venenoso. Entre nan preferensianan, tin wayaká, watapana i kenepa. Pa un imker, tereno ta fundamental, mester tin espasio pa planta flor i pa tene awa serka, pa e abeha por produsí miel i keda den e área. Roy ta enfatisá ku sin abeha, bida no ta posibel. Na Hulanda, por ehèmpel, plantadónan di apel ta paga imker pa trese kahanan di abeha pa polinisá su plantashon, i nan ta gana sèn ku e trabou di imker. “Na Kòrsou, bo ta tende hende ta bisa ‘mi mester paga bo pa bo kue abeha?,’”Roy ta bisa. “Nan no ta kalkulá ku bo ta gasta tempu, gasolin i ku e kaha di abeha tin su balor.”

Tur tempu a biba ku abeha sin problema

Manera Roy a menshoná, nos no tin molèster di abeha. Tur tempu, nos a biba ku nan sin niun problema. Hendenan tabata pasa banda di abeha sin nota nan presensia. Direpente, sin motibu bálido, hende a kuminsá yama pa bisa ku tin abeha den e flor di beyisima òf riba palu di kenepa.

Roy ta puntra: “Pa kiko pániko a drenta den nos komunidat?” E ta bisa ku banda di nos mes hendenan, turistanan ku ta bini Kòrsou tambe ta yega ku e pregunta “konta ku e abehanan?.” Segun e, ora un notisia asina bai afó sin un bon base, e por kosta nos hopi. “Nos ekonomia ta drai rondó di turismo. Si bo publiká un artíkulo asina, e tin efekto riba e persona ku ta bishitá nos isla. Bo ta hinka pániko den e hende, sin mester,” e ta splika.

E ta referí na un kaso resien kaminda un hòmber a fayesé, i a bisa ku ta abeha a mata e. “Mi konseho? Bai wak e outopsia promé pa sa dikon e hòmber a muri realmente. Si bo ke komprobá ku un abeha tin kulpa, bo mester hasi un tèst di e abeha promé ku bo publiká kuenta pa tur hende tende. Buska e fundeshi promé ku bo kompartí e notisia.”

Roy ta rekordá un kaso ku a sosodé 8 òf 9 aña pasá, kaminda tabatin un situashon similar ku esaki na Kòrsou, ku tambe a krea pániko i konfushon. Tabata un temporada kaminda hende tabata bèl tur bia ku nan mira un abeha.

Tipo di abeha

Segun Roy, na Kòrsou e no por bisa presis kua sorto di abeha nos tin. “Pa haña e informashon aki, mester manda e abehanan un laboratorio di abeha, di kual nos isla no ta kla pe.  Di e manera aki por hasi análisis pa sa presis kua rasa di abeha nos tin.” E ta konta ku el a tende ku un mener a kumpra abeha for di otro pais, i ku e abehanan a meskla te ora nan a afrikanisá. “Segun mi, esei tampoko no ta e kaso. Si bo no molestiá e abeha, e abeha no ta molestiá bo.”

Roy ta sigui splika ku ora un abeha pika bo, e ta laga un holó na bo kurpa, i esei por atraé otro abeha. E ta konsehá ku ora un abeha pika bo, e mihó kos ku bo por hasi ta apartá bo mes trankil for di nan, sin waya man. Paso ora bo waya, bo ta krea turbulensia, i e abeha ta bira nèrvioso.” Abeha ta mesun kos un kachó, si bo trata e malu, bo no ta duna e awa, i ora e grita e bo ta dal e palu, e ta rabia ku bo. Bo mester trata abeha ku pasenshi, sin hasi mahos, i nan ta keda trankil.”

Kuantu abeha pa produsí un bòter di honing  

Segun Roy, e kantidat di abeha ku mester pa produsí un bòter di honing ta dependé di e kantidat di flor ku tin rondó di nan. “Mas flor tin, mas honing e abeha por traha. Si no tin flor, no tin honing,” e ta bisa. Pa yuda e abeha, e imker ta planta flor di asina e abeha por haña sufisiente hèktar pa e sobrebibí i produsí.

Roy konta ku hopi hende ta kere ku produsí honing ta asina fásil. Tin bia bo ta wak e kahanan di abeha i bo ta mir’e basta yen i bo ta bisa: “Mi ta bin kue otro siman.” Pero si áwaseru kai, e situashon ta otro. Ora awa kai, e abeha no por bula; esei ta nifiká ku e abeha ta keda paden i ta kome tur e honing ku nan a produsí. E siguiente bia bo bai pa kue e honing, bo ta realisá ku no tin nada mas.

Mester di hopi mondi

E problema na Kòrsou ta ku no tin hopi mondi mas. “Nan ta pasa katapila, kita tur palu, i e abeha  mester bai buska otro kaminda. Roy ta konta ku ora e tabata chikitu, bo no tabata mira un álablanka na kas òf yuana. Awor álablanka ta kana den balkon, i yuana ta kana den kurá. Tur esei ta pasa paso nan no tin un lugá pa nan biba.” Roy ta felis ku su área ta deklará “groengebied” dor di gobièrnu. Esaki ta nifiká ku e tereno mester keda bèrdè, i Roy gusta biba asina. Asina e abeha tin kos pa kome, banda di loke Roy mes ta planta.

Badjaga ta enemigu di abeha

Roy ta splika ku si bo tin abeha den un área kaminda tin hopi solo, manera e último dianan aki ku ta hopi kayente, nan kashi por bira hopi kayente paden i e abeha no ta kómodo. Ora e abeha ta den un lugá mas fresku, e ta sinti su mes mas dushi i kómodo. E abeha mes ta trata di ventilá su kashi pa regulá e temperatura. Roy ta bisa ku normalmente mester tin mas o ménos 10 abeha pa ventilá e kaha, pero ora ta kayente, mester di mas abeha pa regulá e temperatura. Si e kashi no ta bon ventilá, e webunan ku e reina di abeha a pone, no ta desaroyá bon. E komportashon di un abeha ta dependé hopi na e  temperatura. Tin bia bo ta wak riba Youtube kaminda un hende tin 60 pa 100 kaha di abeha, pero na otro pais e ta fásil dor ku e temperatura ta otro.

Na Kòrsou, nos tin diferente enemigu di abeha. Badjaga, por ehèmpel, ta kana anochi i ta drenta den e kaha pa kome e yunan di abeha i e no por matanan paso nan ta duru i e abeha no por pikanan. Den boka di pueblo tin papiá, ku tin hopi abeha pero e realidat ta ku nos no tin hopi. Manera a menshoná anterior, tin mester di hopi abeha pa por produsí un kantidat di produkto di abeha.

Mas produkto di honing

Roy ta bisa ku den su kas, e ta usa e honing pa traha “vruchtenwijn”. E meskla ta konsistí di fruta, honing i awa pa produsí biña. Ademas, e ta produsí “propolis” i “wax”, ku bo por usa pa diferente kos. Adishonal, bo duna e honing un sabor spesífiko. E sabor ta dependé di e flor ku e abeha a kolektá. Por ehèmpel, si bo ke honing ku sabor di orégano, bo mester sa kon pa buta e blachi di orégano den e honing i sa kon pa trèk e blachi pa bo haña e sabor ku bo ke. Roy ta agregá ku aktualmente, e komunidat ta hopi konsiente di e balor di honing puru, di kual no ta sobra pa traha otro produkto nan di e honing. E hendenan ta apresiá e kalidat i e sabor natural di e honing.

Komo empresario no ta fásil ku abeha

Roy ta splika ku biba dor di kria abeha na un nivel personal, manera pa bo mes uso, ta posibel, pero no ta fásil pa hasi esaki komo empresario. E motibu ta e kantidat di produkshon. Pa bende ku merkado, bo mester di un kantidat grandi di honing. Un persona ku un òf dos kashi di abeha no ta produsí sufisiente pa mantené un merkado konstantemente. Kòrsou ta un isla chikitu, e ta bon pa hóben ku tin gana di bai eksportá, pero e kantidat ta limitá. Paisnan mas grandi ku nos, manera Santo Domingo, Colombia, mes ta eksperensiá ku no tin sufisiente produkshon pa nan hende nan lokal te pa nan eksportá. Un otro punto importante ta e kalidat di produktonan. Diferente produkto ku ta keda bende komo "honing di kushina" ta artifisial. Honing di abeha natural ta kontené hopi supstansia nutritivo ku e kurpa humano mester, i bo no por kushiná esaki i yega na e mesun kalidat.

Pasa konosementu over

Roy ta dispuesto pa pasa su konosementu pa tur hende ku ta deseá di sa mas tokante di abeha, i ta hasi esaki pòrnada. Vários hende ta aserka Roy, pa konvertí e trabou di kria abeha den un empresa. Aña pasá, Roy ta konta ku, el a bai Boneiru pa duna un lès na LBV. El a siña e studiantenan e teoria, i tres studiante a disidí di bin Kòrsou pa bin siña e parti práktiko di e trabou. Durante e bishita, Roy a mustra nan kon pa saka un abeha for di plafòn. Aunke den un plafòn no tin flor, òf awa, abeha gusta biba aden paso e ta un lugá será. Mayoria bia hende ta flit, i nan no ta komprondé loke ta pasa ora bo flit un abeha. Un flit por mata 100 pa 200 abeha, pero den un kolonia tin 1000 abeha, e ta un frakshon di e total. E konosementu ku Roy ta pasa no ta solamente teoria; e ta pone hende den situashon real pa nan por praktiká i komprondé loke un abeha ta hasi den su ambiente natural, inkluso ora mester intervenshon. E ta bisa ku loke ta importante ta pasenshi, opservá atentamente, i evitá di molestiá e abeha, pa nan por keda trankil i produktivo. Esaki ta un téknika esensial ora bo ta siña manehá un kolonia di abeha sin krea pániko.

Satisfakshon

Roy ta bisa ku su trabou komo kriadó di abeha ta su pashon. E ta duna Roy un satisfakshon pa mira e kolonia produsí produktonan natural. Ora bo siña manehá un grupo di abeha, bo ta bin konosé ku kada kolonia tin un Reina. Kada Reina tin su holó, ku e ta pone ku e abehanan di su kolonia ta keda serka. Un reina por pone te ku 1000 webu pa dia. Esaki ta demonstrá ku kria abeha ta un trabou ku bo mester di pasenshi, téknika, i e amor pa naturalesa.

(potrèt i vidio entre otro di Jennifer Sint Jago, hóben di Boneiru ku a bin siña traha ku abeha serka Roy)