Errin Dorand

Errin Dorand a sali for di AGO, el a bai Instituto Buena Bista, el a pasa un prueba di Ulanda i a drenta HBO. E ta bayendo Willem de Kooning Academy na Rotterdam i ta den su di dos aña. Errin ta un hóben outista ku a  perseverá, e ta di focus i sa presis kiko e ke. Su estudio ta arte. Na 2023 nos a entrevistá Errin huntu ku Tirzo Martha (IBB) promé ku el a bai Ulanda i awor djasabra ta bolbe papia kuné pa sa kon su desaroyo a sigui na Ulanda, tantu pa loke ta su biba komo su estudio.

A tuma un tiki tempu pa kustumbrá

Errin ta palabra; “Ora mi a yega Ulanda a tuma un tiki tempu pa mi kustumbrá. Mi tabatin mester di yudansa di mi mama i otro hendenan pa sa kiko mi tin di kumpra. Kon pa manehá mi sèn i kon pa usa transporte na Ulanda i skol. Esun ku mi a hasi mas lihé ta kustumbrá ku mi kamber na Ulanda. E di dos tambe ta ku transporte. A kustumbrá un ratu pa mi kustumbrá kuné 100% pasobra bo tin di usa app i usa e señalnan pa sa kiko si i kiko no i kiko ta bai pasa pa tene kuenta kuné.”

Tabata fásil biba su so

Errin a sigui konta kon el a sali for di kas ku su mama, kaminda tabata indik’é kiko pa hasi i awor e ta su so na Ulanda.  El a bisa ku el a kustumbrá basta ratu di keda kas su so. E no ta un hende ku ta gusta sali kas i a kustumbrá su so. Esei tabata un bida ku ta kuadra kuné. E úniko kos ku no a fit kuné ta e wer i e friu na Ulanda. Esei ainda e tin di kustumbrá ainda kuné.

Multitask ta difísil

Siendo un outista el a splika nos kiko e no por kuné ku tabata mas fásil pa splika kiko si e por kuné. El a bisa ku e no por “multitask”. E no por hasi hopi kos na mesun momentu. E no por atendé dos kos importante na mes momentu pero e mester di un momentu pa prosesá i plania. E por focus tin bia basta e tin interes den e kos. Ku konfiansa e por bisa ku e kos ti mas pia p’e ta ku e no por hasi hopi kos na un solo momentu. I p’esei mes e no ta traha na momentu ku e ta bai skol. Kasi tur mucha den su klas tin un òf dos trabou i asta tin bia nan no por bai skol pasobra nan tin di traha promé bai skol. Den su kaso e por bisa ku su outista ta manera un “blessing” i un “course” . Blessing pasobra tin sistema na Ulanda ku ta hasi e kos mas fásil pa bo komo u outista por ehèmpel tin sistema ku e no mester táktikamente traha awor aki miéntras e ta bai skol pero e “course” ta ku e mester ta den e sistema ei esta e mester ta un outista. E no por traha pasobra e lo pone ku e no por bai focus fásil i ta bira muchu di stress ku tantu kos pa hasi.

No a kambia lès p’e pero si mas atenshon

Siendo outista Errin no por ku muchu bochincha. Pero tòg el a adaptá basta lihé na su skol. El a konta ku tabatin algu regla na skol por ehèmpel ántes tabatin atalier pa bai traha den dje pero awor no tin esei mas. E no tin lugá pa e bai sinta traha i e mester buska lugá pa sinta traha. Pero el a logra tòg komo el a sera amistatnan nobo pa medio di su amigunan bieu. E ta kontentu ku su amigunan bieu tei pa por a yud’e. Na skol mes a dil ku su outista dor di laga e dosentenan sa ku e tin sierto limitashon. Errin a konta ku no ta manera ku nan ta kambia e lès p’e pero ta dun’e un tiki mas atenshon, ta puntr’e si el a komprondé tur kos básikamente. Loke e guia na skol a yud’e kuné ta ku ora e ta hasi lès por haña soño si e keda hopi sinta. I tin bia e tin di lanta para i move i esei ta un di e kosnan ku e por hasi durante di lès. Tambe e no por apsorbé demasiado informashon sino e ta ‘Blank out” i e por skibi i asta graba loke ta nesesario.

Trato desigual ta varia di hende pa hende

Na Ulanda hopi bia por tende di yunan di Kòrsou ku ta sinti ku nan ta keda otro trata for di e ulandes mes. Den kaso serka Errin el a konta ku e ta pensa kue eksperensia ei ta varia di hende pa hende pero e ta sintié basta igual i ku e ta wòrdu trata meskos ku otro hende., Ta un òf dos bia so el a topa hende ku ta papia malu i e simplemente no atendé ku e hendenan ei muchu. Por ehèmpel tabatin un guy poko brutu kuné kaminda e ta bai kumpra kos i el a simplemente laga e hende hasi su kos i el a hasi di dje. Tin bia bo ta haña hende ku kisas ta purba “scam” bo i bo mester tin atenshon pa esei.

Promé aña  eksitoso

Papiando si su skol, el a konta ku ta trata di un skol di arte kaminda ta siña tur loke ku tin di aber ku arte i su habilidatnan.  El a pasa su promé aña  eksitosamente. E tabatin un poko strès den su promé aña pasobra e kosnan no semper ta bon organisá. Pero el a keda kòrda riba loke su dosente bieu a yega di bis’é esta ku ta kasi tur skol di arte ta asina. E di dos aña tabata un tiki mas strès pasobra e no por multitask i ta nèt aki e ta topa kuné. E ta haña  6 kos pa hasi i tantu e komo e otro alumnonan tin e mesun eksperensia. Pero apesar di tur esaki e ta logrando tur loke e ta hasiendo. Relashoná ku skol di arte no ta asina ku bo ta bai pinta i kla. Errin a konta ku su estudio na Fine art. Tin vários kos ku por hasi esta eskultura, esena, kasi tur loke bo ke. Tuin diferente departamento manera animashon, diseño gráfiko i hopi mas. Den Fine Art bo tin e libertat pa hasi loke bo ke den e lès. Si bo bai ilustrashon  ta esei so bo tin di hasi. Pero den Fine arte si bo haña un enkargo bo por ehekutá diferente manera esta den forma di pinta, eskultura i asta den músika i asta potrèt. Den e lèsnan ta inkluí teoria ku nan tin di lesa dokumentonan òf hasi investigashonnan pa skibi relatonan. E sa strugle hopi ku esei pasobra lesa i skibi no ta su kos pero e ta por e. Pa loke ta su ulandes el a bisa esei no ta 100%. E ta purba papia ku e hendenan ulandes pero e diferensia di e hendenan ku ta papia ulandes na Ulanda i esnan a Kòrsou ta ku aya ta papia e ulandes kasual i na Kòrsou ta papi’e mas presis. I p’esei no tur bia por komprondé. E ta purba kuminsá un kombersashon na ulandes pero ora nan bai nan forma natural di papia, Errin ta kambia i bai den ingles. I ta danki Dios kasi tur hende na Ulanda konosé ingles.

Guia na Ulanda

For di momentu ku Errin a yega Ulanda el a dirigí su mes na e Jongeren Loket di e munisipio di Rotterdam. Einan el a keda asigná na un persona pa kuminsá gui’e. Tur kos a pasa masha fásil i esei ta pasobra el a kana bon dokumentá. Na mes momentu a kuminsá e proseso pa kai bou di un fundashon ku ta dediká nan mes na esei i den su kaso ku Jados. Errin ta eksperensiá e guia komo algu bon sino e lo a pèrdè for di bista algun kos ku  e mester a atendé kuné. E ta bisa kosnan ku e ta lucha kuné manera pagamentu òf atendé mailnan ofisial. Huntu kuné nan ta atendé tur kos i dun’e gui’e. E guia ta un bia pa siman un pa dos ora. I awor ku tur kos e ta den proseso pa buska kas. Pa loke ta su bida di dia pa dia, Errin a konta nos ku e mes ta atendé ku eseinan. El a traha un ‘excell’ pa wak kuantu máksimo e por gasta la luna. E por gasta 350 Euro pa luna pa kompra di kuminda i asta e no ta gasta sèn di mas. Err5in ta haña ku e sèn ta sufisiente.

Trabou den arte ta diferente

Errin su estudio ta 4 aña i el a bisa ku ora e kaba ku e estudio aki e no sa ainda kiko lo sigui. E mundu di arte ta algu apart. El a splika ku tin lugá ku bo por bai traha si pero  mundu di arte ta tòg diferente. E trabou den arte ta unu di pashon i p’esei mayoria studiante tin un trabou adishonal miéntras nan ta okupá ku nan arte. E ta kere ku den su kaso e tambe lo tin di bai hasi un trabou ku e no tin masha sentimentu pe miéntras e ta sigui ku arte. Su estudio aktualmente ta loke el a spera i ta loke el a haña splikashon di dje for di tempu e tabata na IBB. El a spera si ku e lo a haña mas lès pero no ku e ta un desapunto pe.

Si kita mi outista lo mi no ta meskos

Nos pregunta na Errin tabata si e tin gana di no tabata outista. El a pensa poko i a kontestá ku esei ta algu ku e no sa pasobra si e kita e outista e lo kambia kon e ta awor aki. I p’esei ta algu ku bo no por kura pasobra sino bo ta kita kon  e persona ta. E ta konfortabel pa e forma ku e ta,. E sa ku tin kosnan mas difísil pero ta asina e ta. Errin no ta kere e por guia otro outista si no. E no ta un hende ideal pa splika ounke e por duna algun konseho si pero no pa e duna outista. Ademas e eksperensia di outista ta varia di hende pa hende.

Kontakto di wowo

Ta interesante pa remarká ku durante di e mas di 25 minüt di grabashon di e programa Errin no a wak e kámara niun momentu. I esei ta e kontakto den wowo ku mayoria outista tin esta “eye contact”. I Errin a atmití ku esei e no por.