Gilian Martina direktor Consortium

Vários aña atras tempu ku Giro Bank tabata eksistí, e beka ku tabata duna na hóbennan. Un proyekto sumamente bunita ku sigur a duna un man na diferente hóben pa por bai studia den eksterior ku tur gastu pagá. Ya ku Giro Bank no ta eksistí mas e proyekto di duna beka tambe a kai na awa. Pero un di e personanan ku semper a traha den e proyekto aki Gilian Martina a disidí ku e ke sigui, no ku dunamentu di beka pero si pa duna guia na hóbennan. Consortium ta nòmber di e organisashon/fundashon ku pa e próksimo aña eskolar ta brinda mentorship na nos hóbennan.

Nasementu di Consortium

Gilian Martina a kontribuí ku Djasabra i a konta kon nan a lanta. El a splika ku tempu Giro tabata operashon tabatin un fundashon i pa medio di e fundashon tabata duna beka na studiantenan pa bai studia afó. Nan tin vários studiante a bai studia afó, dos a bin bèk di kual un sikólogo i un dòkter. Ku tempu nan a ripará ku por yuda mas mucha i asina a kuminsá yuda studiantenan di skol sekundario, universidat i MBO. I asina a habri e posibilidat pa yuda mas mucha i ounke skol a bira grátis i por a yuda tòg universidat ku pago. Pa esnan ku no ta paga skol pa nan ta haña kompensashon pa un ke otro gastu. Consortium a nase nobo abase di e idea di Girobank. Banda di duna beka nan a nota ku e studiantenan ta benefisiá hopi si asistí nan ku nan kresementu personal i esei ta e parti di mentor. Nan tabatin mentor i programa di desaroyo personal i esei ta nan kontribushon pa kaba skol. Estudiantenan ku ta bin nan remarke pa e mentor, ta esnan di segundo aña di skol sekundario.

Negligensia di e hóben

Kontenido di e mentor segun Gilian, e tin di hasi ku un ehèmpel. Nan fundashon meskos ku tur otro fundashon tin un direktiva i nan ta responsabel pa esaki i ta delegá e responsabilidat na dje komo direktor. Nan tin un komishon di konsehero ku tin den dje hurista, lokal i dos trahadó sosial. Un ta spesialisá den hóben i otro den general. Esun general ta di Jamaica ku ta un isla bisiña di nos ku hopi similaridat ku Kòrsou i konsekuentemente por kompará e retonan sosial. E hóben a lanta den kas ku un mayor i manera sa ta e kaso hopi bia ta un mama i e tabatin e difísil. E mama mes ku su pakete di su infansia i esaki a permití ku e yu a pasa den hopi tipo di maltrato i negligensia ekstremo. Negligensia ta un di e tiponan di maltrato ku hopi bia nos no tin bista riba dje semper. Si un mucha ta na kas su so i hopi ora riba telefòn i esei por ta oké pero e ta hopi na kas su so i tin un dia sin struktura i sin kontenido i esei ta algu importante pa e hóben su desaroyo. E hóben aki no tabatin nada di esei kier men hopi maltrato, hopi sla na man di su mama mes i violensia verbal. Te ku 10 pa 11 aña  e no por a lesa. Ku 12 aña el a siña lesa i ku 14 aña su so a bai biba. Dado momentu den su bario a bin biba un veterano di guera. I e hòmber aki a kuminsá preokupá pa Julius esta e hóben. E tabata duna Julius buki i kosnan di skol i awor aki e ta ripara ku e tabata un mentor krusial den su bida. I konsekuentemente e promé kos ku e mentor mester tin ta un mentalidat ku no ta husga, rèspèt pa nos hóbennan pasobra nan ta den un mundu diferente i e mester tin un interesá berdadero i sinsero pa loke ta pasa den e hóben su bida. No nesesariamente un estudio universitario i sierto funshon pero e kos di mas importante ta gana i kompromiso i komo Consortium nan ta respetá otro i no ta husga otro. Ta esei ta habri kaminda pa nan risibí i yuda/duna.

Guia sosial i personal

E mentorship ta un guia ku ta bai duna e hóben. Gilian a splika ku no nesesariamente yuda e hóben ku tarea di skol pero e guia sosial i personal. Nos komo mayor ku ta trahando ta okupá, drùk, biahe di trabou i tin ora hopi tras di kòmpiuter. Pero den su kaso e ta kosiente ku tin temporada e trabou ta mas ku otro. Tin bia nos ta pèrdè den e rutina di trabou i e kòmbersashon no ta tumando lugá mas ku nos muchanan. I ta sientifikamente proba ku un mucha ku haña mentor, kisas por ta un ku ta yuda ku skol pero den e kaso aki ta un hende ku tin interes i ta parti di kresementu i desaroyo. Por ehèmpel un hende ku ta puntr’e  kua materia e ta gusta mas na skol. Tin bia nos no ta puntra nos yunan e kos ei i e mucha di bèrdat ke kompartí algu. E diferente entre e fundashon na Girobank i esun awor ta ku no ta bai duna beka. Gilian ta konsiente di e limitashonnan finansiero ku nan tin pero e kòmbersashonnan ta unu di speransa i futuro. E mentornan ku tabatin ta empleado di Giro bank i no tabata spesialista di skol i no sa mes di e sistema sekundario nobo i kon esei tabata hinka den otro. Nan a duna algun informashon di esaki i e mentornan ta sòru pa tur luna tin kontakto ku nan studiante i durante luna nan ta inisiá kontakto kon ta bayendo i tin temporada mas òf ménos ku otro. Esun bia pa luna e hóben ta entregá su sifranan pa wak kon ta bayendo na skol pero nan niun tabata profeshonalnan den  tereno eskolar. Nan tabata paga kisas bijles pa e hóben pero e  mentor tin gana, kompromiso fuerte ku e studiante  esei tabata algu masha bunita pa mira.

Kambio den nan bida

Gilian a menshoná ku nan tabatin studiantenan ku pensamentunan di retonan negativo i awe tin eksperensianan di trabou grandi. Nan tabatin studiantenan ku a pasa den eksperensia di violensia doméstiko, otro ku mayor a fayesé ora nan tabata bi skol, un ku kier a bira enfermero spesialisá riba ambulans i tur a logra nan meta. Hopi di nan a mira e studiante yega komo mucha pero ora nan a kaba por mira kon nan a desaroyá i por mira ken nan a bira, e kontenido, e hende.

Ta kuminsá ku 25 hóben pero si tin mas tambe ta bon

Pa e aña  eskolar aki nan ke kuminsá ku mínimo 25 i si e bira mas tambe ta bon biní. Nan tin kòmbersashon ku vários organisashon ku nan ke partisipá. Ta masha bunita pa mira kon ora ta trata di hóben tòg nos komunidat tin hopi interes pa yuda. E interes aki ta demostrá ku nos komunidat ta interesá enpartikular pa loke e hóbennan ta eksponé riba medionan sosial i nos ke eksponé nan na dje ta potensial i perspektiva.

Probechá pa e hóben i e mentor mes

Tur kompania ku nan a aserká te ainda ta den forma di mentor. I nan por kontribuí finansieramente i ku konosementu i eksperensia ku por yuda nos muchanan por ehèmpel den SBO kon ta skibi karta di solisitut. Nan por yuda di diferente manera. Loke Consortium ta para p’e ta na momentu ku hopi instansia ta bin huntu pa parti e riesgo pero tambe riba nivel di universidatnan i den e kaso aki komunidat i kompanianan tin responsabilidat pa uni huntu pa un meta i esei ta desaroyo di nos hóbennan. Nan por kontribuí ku hende, mentor, konosementu, finansiero i otro tipo di material manera un sala pa hasi workshop. Diferente tayer nan ta organisá kaminda e studiante pero e mentor mes tambe ta probechá di dje.  Por ehèmpel Mind Mapping tabata un hopi fruktífero.

Siña e hóben piska i ta yega hopi mas leu.

Nos a puntra Gilian si despues ku Girobank no tei mas, si no a aserka otro instansia pa sigui ku e parti di beka.Pero el a bisa ku pa nan si bo siña e hende piska bo ta yega muchu mas leu. I p’esei ta asina importante e guia pa e hóbennan, ku por yega muchu mas leu kuné.

Historia

Fundashon Bo Motivashon Nos Kontribushon (FBMNK), un fundashon lantá pa Girobank, tabata aktivo ku un programa di mèntòr similar algun aña pasá. Miéntras tantu Girobank i FBMNK no ta operashonal mas. Consortium tei pa sigui ku e inisiativa balioso aki. Por a mira kon ‘mentorship’ a yuda hóbennan superá atversidat i prosperá ora nan tabata rondoná pa e ekosistema di kresementu ku FBMNK tabata brinda nan.

Partisipá awor

Ta enkurashá mayornan i dosentenan pa inskribí alumnonan kuminsando for di nan di dos aña di skol sekundario, basta nan ta inskribí na un skol na Kòrsou.

Kada studiante lo keda asigná na un mèntòr ku ta topa ku nan personalmente un biaha pa luna. Un mèntòr ta un persona sinseramente interesá den desaroyo di e hóben. Ademas, Consortium ta organisá kuater workshop pa aña riba tópikonan manera identidat, salú mental, “personal branding” i kompromiso ku komunidat.

Ta invitá kompanianan i organisashonnan pa bira miembro di Consortium. E manera prinsipal pa kontribuí ta dor di ofresé mèntòr. Mayornan i dosentenan, inskribí e yunan i alumnonan. Tuma kontakto ku pa sa kon pa registrá.

Bishitá www.consortium.foundation pa mas informashon òf manda un app na 516 30 12.

Direktiva di Consortium, direktor i asistente di proyekto. Di robes pa drechi: Revonella Raphaëla (tesorero), Rachelle Montinat (asistente di proyekto), Gilian Martina (direktor), Ludrith Dalnoot (miembro di direktiva), Wilny Octavius (sekretario), Rianne Martina (presidente di direktiva)