WILLEMSTAD.- Despues di a eksigí un kontesta den 24 ora serka gobièrnu e 5 sindikatonan representá den e CGOA, ABVO, Sitek, NAPB, SAP i STrAF a disidí ku ta duna gobièrnu un siman mas di tempu pa indiká eksaktamente ki dia ta paga ámtenarnan. Asina a disidí den otro reunion di e Komishon Sentral di Sindikatonan ku a tuma lugá ayera atardi.
Djárason promé minister Gilmar “Pik” Pisas a kontestá e sindikatonan bisando ku gobièrnu di Kòrsou a pidi un konseho urgente serka Ministerio di Finansa relashoná ku e pago di “loontrede”, lumpsum i indeksashon di salario di ámtenarnan. Ora ku e konseho aki drenta lo por duna sindikatonan indikashon konkreto riba nan preguntanan.
Den e kontesta sinembargo gobièrnu no a duna un indikashon kon largu lo dura promé ku haña e konseho finansiero. A base di esaki e sindikatonan a disidí ayera pues ku gobièrnu ta haña 1 siman mas di tempu.
Gobièrnu su karta di kontesta pa CCvV a bisa: “Despues di deliberashon interno a resultá ku ta nesesario pa pidi un konseho finansiero urgente serka Ministerio di Finansa promé ku duna un kontesta mirando ku pais konforme reglanan di kontabilidat no por hasi ekspreshonnan riba obligashonnan finansiero sin ku minister di Finansa a duna konseho riba esaki. Na momento ku nos ta disponé di e konsehonan nesesario nos lo kontestá bosnan karta.”
E konseho ku a manda pidi Ministerio di Finansa ta inkluso un petishon ku minister di BPD, Orenlio ‘Kid’ Martina a presentá kuné den reunion di Konseho di Minister djárason último. EXTRA por a komprondé ku Martina ta di opinion ku mester paga e ámtenarnan “loontrede”, lumpsum i “indeksashon” di 2019.
E suma ku minister di Finansa, Javier Silvania a bisa ku e tin reservá e aña aki riba presupuesto, esta 29 mion florin ta solamente pa kubri e pago di “loontrede”. Pa por paga lumpsum na esnan ku a yega e máksimo di nan “schaal” salarial i indeksashon mester di mas fondo i aparentemente ta den e direkshon aki e petishon ku Martina a presentá kuné ayera den Konseho di Minister ta bai, esta ku mester di mas sèn.
E sindikatonan tin urgensia pa haña un kontesta di gobièrnu pasobra otro fin di aña ta yegando i pa 8 luna kaba ta den diskushon sin por keda kla riba pago di “loontrede”, lumpsum i indeksashon di salario. No ta aseptabel pa e ámtenarnan ku aña ta bòltu sin ku tin palabrashon konkreto riba pago di loke debe nan for di 2019 i alabes kon ta bai sigui paga di 2024 bai dilanti.
Den e reunion di djamars e sindikatonan a konsipiá un karta pa Konseho di Minister i eksigí klaridat pasobra den e grupo di trabou “’afbouw” 12,5 porshento e klaridat aki no ta bin pa kaba. Ora ku den reunion di CGOA e sindikatonan a komprondé di minister Martina ku e tampoko por kontestá nan preguntanan pasobra minister di Finansa no ta dun’é kontesta, e sindikatonan a disidí ku ta sigui reuní den gruponan di trabou solamente bou di e kondishon ku nan ta haña kontesta serka gobièrnu.
