Laga nos ban traha riba nos mes e aña aki. Traha riba e energia positivo i kita malunan ku ta menasa nos. Fundashon Fundashon Grupo pa Komunidat su presidente Soraida Bishop ta na kabes di e organisashon for di nan lantamentu. Ofisialmente nan a lanta na 2005 i promé a traha komishon, nan ta traha pa komunidat pa trese konosementu i koherensia pa krese spiritualmente pa krese i nan tei pa tur hende. Nan ta hasi diferente kos manera aktividat, kursonan spiritual tambe.
Konosementu di bida
Entre otro Soraida a menshoná yoga i ayurveda. Ayurveda por ehèmpel ta konosementu di bida, konosementu di bo mes bida, kiko pa bo kome, drumi i ki ehersisio ta bon pa kada hende. Loke ta bon a mi kisas no ta bon pa bo i ayurveda ta spesifiká tipo di kurpa i spesifiká kon pa traha ku bo pa bo ta mas salú posibel. Tambe e fundashon ta hasi astrologia Vediko; einan ta pone atenshon no na e astrologia di wèst pero esun ku nan ta usa na India. Einan ta wak unda e luna a sali i kiko ta e asendente pa yuda e hende kon pa guia e mes su bida.
Pranic healing
I último loke tambe e fundashon ta hasiendo na aktividatnan di Pranic Healing. Prana ta nifiká airu, rosea i bida i ‘healing’ ta pa bo bira bon. Ta hasi uso di puntonan di energia di solo, luna, awa i naturalesa i pa yuda e persona pa e sana su kurpa. Pranic healing ta usa puntonan di energia den nos kurpa. Nos kurpa tin hopi punto di energia. Ta trata aki di 11 punto di energia, e chakranan prinsipal di nos kurpa. Tin e crown chakra, esun na frenta, na garganta, kurason i total 11 punto importante ku energia ta flow den bo kurpa. Dependé kon bo kurpa ta e ta fluktua pero importante ta pa e ta balansá. Den pranic healing ta kita energia shushi i vitalisá e kurpa kaminda ta nesesario. Si tin kaminda tin hopi energia i otro kaminda tiki energia ta limpia nan, trese nan na nivel i asina balansá e energia pa e tin e habilidat di kura su mes. Nos tur tin habilidat di kura nos mes segun Soraida den entrevista ku Djasabra.
Kita energia shushi
Kon ta sa unda e energia shushi ta òf unda tin di mas energia Soraida a splika ku nan tin kursonan di Pranic Healing kaminda ta siña spesial kon pa scan, hasi bo mannan sensitivo pa sinti e energia i scan. Ku bo man bo ta scan sin mishi ku e hende. Kon e crown chakra ta, kon e kurason ta funshoná dilanti i patras i asina scan tur e chakranan. I nan tin formularionan ku ta yena pa asina por traha ariba. E persona ku ta deseá por bai serka e fundashon i nan ta papia promé ku e persona. El a bisa ku tur hende ku dos man i tin gana ta siña i tur hende por. Hasi bo mannan sensitivo. Hopi bia ora bo pone bo mannan huntu ku ta sinta. Tur kos ta energia, i promé e kurpa bira malu paden ya energianan a kuminsá desbalansá i di balansá nan bèk ta bai bèk na e orígen pa yuda bo kurpa kura su mes. I si e persona ta malu kaba, e por trese e energianan den balansa i asina yuda e kurpa kura su mes mas lihé.
No ta religion
I tur esaki no tin di aber ku religion segun Soraida. Den kuminsamentu ta man ta e kos pero tin hèrmènt i kristal ku por usa pero esei ta kursonan mas avansá. Den prinsipio mester siña scan i sinta. E ta mas fásil ku hopi por pensa. I e energia no ta na man so, pero tur kaminda. Ora e energia fluktua e persona ta sintié.
Yuda kura bo mes
Pa loke ta e benefishinan di Pranic Healing, e presidente di Fundashon Grupo pa Komunidat a splika ku e fundashon ta traha pa komunidat i pranic healing su idea ta pa den tur kos tin un hende pa yuda otro i no tin mester di kura mesora pa buska remedi. No pa deskartá remedi i dòkternan konvenshonal pero ta yuda den e desaroyo. Kisas den prinsipio bo no ta sinti nada pero mester trein. I no ta kuestion di djis lesa un buki i kla. E ta profundo i tin protokòl. Por ehèmpel master Choa ku ta esun ku a bin ku Pranic Healing na mundu el a traha struktura pa kura tipo di malesanan. Koló tambe ta importante i mas siguí ku e konosementu bo ta siña kon usa e koló aki. E ta manera un resèpt di kuantu bia tin di limpia i vitalisá. Bo ta siña yuda hende ku al final e hende mes ta siña yuda su mes.
Siña praktik’é
Den e lèsnan di Pranic Healing bo ta siña praktik’é ku bo mes i ku otro. Awor aki nan tin oferta di ‘free healing’, si bo ke kurashon di bo mes, e fundashon ta yuda. Por ehèmpel doló di kabes, insomnio, múskulo etc., etc. kosnan simpel ku por hasi. Mas pisá e malesa ta mas tin di traha kuné. E protokòlnan ta fásil pasobra nan ta skibí. Uniko kos ku mester sa ta kon pa scan, i sigui e struktura. Ku e ‘healing’ grátis ta djis tuma kontakto ku e fundashon. Nan ta traha un sita ku e persona, e ta bin scan i e ta grátis. I den luna di mart nan tin maestro ku ta bin pa duna e kurso básiko, avansá i sikológiko. Tin malesanan ku no ta djis kibra pia por ehèmpel pero tin kosnan sikológiko. Tur hende ta bon biní i ta djis tuma kontakto ku e fundashon. Por tuma kontakto ku nan na 5181223 òf Mara 5143620. E ta algu kompletamente privá.
Soraida a bisa ku pueblo ta biba ku loke nan ta duna. Nan a organisá yoga i ta hopi yamada nan ta haña. I hende ta hasi hopi pregunta i esei ta loke Soraida mas ta gusta pasobra di e forma ei e hende ta konosé su mes. Nan ta duna e hende hèrmènt kon pa yuda su mes.
Nos ta na kuminsamentu di aña i na kuminsamentu di aña bo tin di traha pa bo mes. Ami i nos tur tei pa bo i nos ke yuda bu. E úniko ku mester hasi ta habri si bo ke yuda bo mes. Bo por.
