WILLEMSTAD.- Beisbòl Dòbel A tin su di dos finalista. Esaki ora ayera Sta. Rosa Indians a derotá Sta. Maria Pirates ku skor di 20-6, pa asina gana e serie i klasifiká pa e final di Dòbel A.
E wega aki tabata pèrtá te den di 7 inning ku e dos ekiponan empatá na seis. Pero e ofensiva di Sta. Rosa a eksplotá pa anotá kuater kareda den di 8 inning i dies den di 9 inning, pa asina gana e wega ku skor grandi.
Pa Sta. Rosa 20 kareda, 22 hit i 5 eror. Picher ganadó tabata Siamani Boekhoudt ku a tira 4 inning di relevo sin tuma kareda i poncha sinku. Miéntras na bate Rochendrick Alexander a bai di 4-3 ku honron, 3 kareda anotá i 4 kareda empuhá, Carlton Daal di 6-4 , 2 kareda anotá i 4 kareda empuhá. Riordan Windster, Aldair Daal i Terence Goeloe tur tambe tabatin 3 hit ayera.
Pa Sta. Maria 6 kareda, 9 hit i 2 eror. Carrol Servania a pèrdè. Na bate Jonathan Martijn a bai di 3-2 miéntras Wecho Schoop i Denzel Gregg tur dos a konektá honron.
Sta. Rosa awor lo topa ku Royal Scorpions den e gran final di beisbòl Dòbel A. Esaki ta plania pa ranka sali 7 di sèptèmber awor.
