Ninoushka Philip

Spark ta mira lus di dia. Un proyekto ku Ninoushka Philip a bin kuné, teniendo na kuenta e nesesidat di nos hendenan ku ke stimulá e mente i memoria i ku ta sinti ku nan a kuminsá lubidá. Ninoushka òf manera nos konosé tambe komo Nina a konta nos di e proyekto aki ku tin di haber ku Demensia, Ta trata di un tema ku hende no ta gusta papia fásil di dje. E ta un tabú, un temor ku e ta bati na nos porta. Pero interesante ta ku tin mas i mas atenshon últimamente ta keda pone na demensia i e indikashonnan tempran di demensia.

Meta di Spark

Spark ta un sentro nobo ku tin komo meta stimulashon di memoria, stimulashon kognitivo. Ninoushka a splika ku nan no ta solamente pa hende ku demensia pero hende grandi ku ke garantisá nan kalidat di bida. Awor aki nan ta bon físikamente pero nan ke ta bon mentalmente tambe i asina mantené nan independensia. I ta netamente den e kuadro aki Spark ta kumpli ku e nesesidat ei. Na e sentro ta hasi spèl, ehersisionan terapéutiko pa stimulá e hende mes. I p’esei e nòmber di Spark Memory and Social Center. Nina a enfatisá ku e parti sosial tambe ta sumamente importante. Den e parti aki e hendenan ta bin huntu, ta haña algu di kome pasobra nutrishon tambe ta importante pa kuminsá e seshonnan di dia.

Un nesesidat den merkado

Ta un sentro kaminda por sosialisá i alabes haña stimulashon mental esta algu profundo. E idea segun Nina a splika ku e mes tin un tio ku a kuminsá ‘dementeer’. E tabata biba serka nan i el a mira sierto señalnan. Despues di esei Nina a traha den algun sentro di hende grandi kaminda e ta mira hende grandi biba independiente pero e nesesidat di e simulashon kognitivo tabata nesesario. E parti ei no tabata keda atendé den merkado.

Stimulá mente pa keda skèrpi

Nina tin 3 sertifikashon. E tin un sertifikashon komo Mantainance Cognitive Stimulation Coach ku ta esun prinsipal. Tambe e ta sertifiká riba prevenshon di demensia i téknikanan terapéutiko pa hasi ku hende grandi. I e hende no mester tin síntoma pa bai Spark pero simplemente e hende ke keda biba independiente i biba mas tantu na su kas. I ora kuminsá tempran dor di stimulá mente i tené skèrpi e chèns pa haña demensia ta bira ménos. Demensia ke men retraso kognitivo.

Sosten pa famia tambe

E hendenan ku demensia na Kòrsou ta hopi grandi. Ta konosí ku nos tin ‘vergrijzing’ pa hopi aña kaba i mas grandi e ta birando. I ku e sentronan manera Spark ta yuda aliviá pa e hende keda mas largu na su kas i tambe ta sostené famianan mester ku ta sostené e miembronan. Hopi bia ta haña famia ta bai dòkter i sikiater pero den e parti práktiko pa e atendé dia a dia ku e ser kerí e no ta haña direkshon den esei. I nan por duna informashon i guia den e parti ei.

No por evitá demensia pero slou e proseso

Un di nos preguntanan ta si por evitá pa haña demensia. Nina a kontestá ku esei no ta den nos man. E ta manera kanser, bo por hasi tur kos pa hasi bo chèns pa haña kanser ménos pero no por evitá di hañ’é, Demensia ta meskos por hasi hopi kos pa e demensia ta ménos pero e no ta den nos man pa evitá. I nan ta hasi e chèns pa haña demensia ménos i ora ta den e promé paso di demensia nan ta slou e proseso pa por mantené e funshonnan kognitivo mas tantu.

Diferente fase

Demensia tin diferente fase. Segun splikashon di Nina, fase 1 i 2 hopi bia ta e fasenan ku nan por hèndel kuné. Tin hende ta wak demensia asta den 6 fase. Pero segun Nina e ta wak fase 1, 2 i 3. Ora e hende ta den e promé fase i fase dos ta mas fásil pa stimul’é. Despues di esei e hende su focus no tei mas i básikamente tin di hasi e hende mas kómodo posibel. Dun’é atenshon riba su higiena, su alrededor i esei so por hasi den e di 3 fase.

Weganan pa stimulá e mente

Pa stimulashon di memoria tin diferente spèl. Riba esaki Nina a splika ku tin weganan di ántes adaptá pa nan ta weganan terapéutiko i tin weganan spesífikamente hasí pa terapia. No tur terapia ta wega pero tin un tipo di terapia ku nan ta hasi di halamentu di rosea pa e hende relahá. Ta importante pa e hende haña algu riba su stoma i pa e focus tambe. I si e ta preokupá e no por focus i nan ta hasi ehersisionan pa relahá, hala rosea pa asina por kuminsá e seshonnan. Tambe nan ta hasi  terapia kaminda ta bai den e memoria largu i kòrtiku, esun ku mas nan ta hasi ta esun kognitivo ku ta stimulá e partinan kognitivo manera e enfoke, orientashon di espasio. Ora un hende kuminsá bira grandi e ta haña un vishon di tùnel i tur kos ta mustra otro. Tambe nan ta hasi pensamentu kritiko. Memoria ta manera un sentral stashon den kòmpiuter, tur kos ta sali via e stashon sentral ei. Si algu falta e stashon e no ta traha. Si tin un parti di mente no ta funshoná optimal un parti di e funshonnan di e hende tampoko ta traha. I p’esei nan trabou na Spark ta di tene e hende mas skèrpi. E nòmber  Spark a bin na momentu ku den su estudio el a haña ku tin e mente  ta funshoná a base di konekshonnan ku ta manera spark. E stimulashon ta loke ta spark e parti di e mente. E konsepto aki ta unu intenshonal. Nan ta us’é asta banda di remedi. E ta un manera natural pa stimulá e mente i e remedi ta otro manera.

Terapia di grupo i un pa un

Nina a konta nos ku na Spark e tin henter un tim su tras. E ta bai tin asistente, mas persona ku lo yuda. Nan ta traha ku grupo chikí. Tin diferente terapia entre otro di grupo i esun di un riba un. Esun di un riba un ta ora e mira ku e hende mester di mas atenshon e ta konsehá pa bai den esaki. E terapia di grupo ta máksimo 10 hende pa asina tin atenshon pa tur hende. I esun di un pa un ta e persona ku un otro hasiendo e seshonnan.

Famia por bin wak

Si hende ke bin sinta wak kiko ta hasiendo ku nan famia, esei tambe por. Naturalmente no por tuma tur famia pareu. Nan lo duna seshonnan di informashon pero nan tin nan sosten esta e hende/ famia por bai serka nan pa esaki. Ta personal por konta e situashon pa asina wak kon Spark kon sostené esaki.

Aseptashon

Ora nos ta papia di demensia, ta interesante pa haña un bista kon famia ta aseptá esaki. Nina a konta nos ku el a ripará ku mas hóben e persona ta, ménos aseptashon tin ku e ser kerí tin un problema. E ta kere ku un parti di miedu i tambe doló di aseptá ku e hende no ta e hende di ántes. I hopi bia nos ta papia di un mayor. Ora ta un persona den su 30 ta masha difísil e aseptashon di e hende ku a kuida nan i lanta nan i awor nan tin di aseptá ku e hende tei si pero su funshonnan kognitivo no ta meskos, e manera ku e ta reakshoná no ta mesun kos, e manera ku e hende ta prosesá ta otro i konsekuentemente su reakshon tambe ta otro. Bo por haña asta empatia. Tur eseinan ta parti di e malesa i pa tur yu e kosnan ei ta doloroso.

Spark ta habri otro luna ougùstùs

Spark lo ta situá na Polisweg 5. E ta keda dos hanchi tras di Orcobank. Ta un kas ku nan a hasi un sentro. Ora e hende bin serka nan ta miembro e ta. E sentro tin koló, un ambiente gezellig manera ta un kafé nan a bai. E tin ambiente íntimo i sosial. E sentro ta habri ougùstùs i e luna aki ta habrí kaba pa inskribí i por hasié na 6919100 òf mail info@spark-memory.com. Ya nan a risibí hopi inskripshon di hendenan ku no tin demensia. Esaki pasobra nan ke keda skèrpi.