Tirzo Martha un di e fundadónan di IBB i  tambe ku Omar Martha ku ta direktor di IBB tabata den nos programa di Djasabra pa nos por a papia riba e posibilidatnan pa nos hóbennan ku ta bai studia afó. Kiko nan mester tene kuenta kuné? Kiko IBB ta ofresé. Ta masha importante pa nos por papia riba e tema aki un i otro bes mas pa asina sa di e posibilidatnan ku tin pa nos hóbennan den arte tambe.

E promé aña  semper ta difísil

Tirzo Martha ta konta nos ku un kos ku ta di suma importansia serka nan ,ta ku ora e studiante ta bai studia, ta importante pa e studiante yega ku e kalidat pa e studia. Dikon? Paso semper e promé aña na Hulanda ta e aña mas difísil. Paso fuera di ta e promé aña ku bo ta biba leu for di kas, promé bia ku bo ta independiente riba bo mes, ku bo tin ku sòru pa bo mes, ta masha importante pa e kondishonnan rondó di bo ta funshoná bon, ku bo por focus riba bo estudio. Den tur e añanan ku IBB ta traha ku studiantenan, e añanan ku ta mas difísil hopi bia ta e promé aña na Hulanda I aña number 3, ku ta e aña ku ta serka di terminá e estudio. E aña ei ta esun, kaminda  ta enfrentá e momentu pa disidí ki nan ta bai hasi. Kemen na promé instante IBB ta trata pa mas tantu posibel e kontenido di e estudio e studiante ta bon prepará. Tirzo a sigui splika ku e studiante na Ulanda tin di dil ku su talento,  ku su estudio, kon nan tin ku focus riba e detayenan ku nan tin mester pa desaroyá nan mes durante di e estudio. Ta p’esei IBB ta yama nan mes un “vooropleiding”.

Komunikashon ta importante na Ulanda

Den e “vooropleiding” e hóben studiante ta haña loke nan ta bai haña atrobe den un estudio di skol kreativo i asina nan lo por pasa esaki mas fásil, pasobra nan konosé e materia kaba, nan sa e kontenido i nan ta na altura di kon e proseso di e evaluashon ta bai. Tambe nan ta siña e sistema di produsí esta kon tin ku traha e trabounan. Banda di esei IBB ta prepará nan tambe pa e aspekto di disiplina i e aspekto di kon nan tin ku komuniká na skol, pasobra komunikashon ora bo yega Hulanda ta bira masha importante. Tirzo a sigui splika ku e no ta manera aki, ku si bo no a bin lès bo ta keda sin bisa e dosente. Aki kisas por bèl wak ki a pasa bo, si ta malu bo a bira òf unda bo a keda? Na Hulanda tur e kosnan ei ta strak. Si bo no komuniká na drechi, si bo no pone skol na altura di loke ta pasando ku bo, kiko ta bo kondishonnan, niun hende no ta bai para ketu pa wak kiko nan tin ku hasi pa bo. Esei ta komunikashon. “Nos ta traha hopi riba komunikashon di nos hóbennan”, Tirzo a enfatisá.

Disiplina i kontakto

E di dos kos ku IBB ta konsentrá hopi riba dje ta disiplina. Dikon disiplina ta hopi importante ora ta bai studia, paso tin sierto di e aspektonan di e estudionan aki kaminda no ta tur dia tin un dosente. Tin bia bo tin un dosente 1 bia pa luna òf 1 bia pa siman, anto sobra bo mes tin ku traha, hasi bo investigashonnan, buska bo materialnan, bo mes tin ku hasi tur kos. E pidi ei pa IBB ta hopi importante pa e hóben ta konsiente di dje, ku ora e ta einan, e tin para riba su dos pianan i e so. Mas aleu ta bin aserka pa e studiante tin un bon kontakto ku su koleganan de klas. Paso asina tambe bo ta keda na altura di akontesimentunan ku porta abo no ta na altura di dje. E ora ei un kolega ta bisa bo ku tal dia nan a kambia tal i tal kos pa un otro dia. Kosnan simpel segun Tirzo Martha por ehèmpel tin bia e lokal di lès a kambia.

E kultura na Ulanda

Un kos mas ku ta di suma importansia ora bo yega Hulanda ta e kultura ku ta kompletamente otro for di e kultura ku nos a kustumbrá kuné. Tin kos ku ta normal aki nan ku na Hulanda sea e no tei òf e ta kompletamente otro. “Nos ta kuminsá ku klima, aki nan nos ta kana ku nos t-shirt, na Hulanda ora bo ta sali kas bo tin ku bai ku bo yas. Si ta verano, tòg bo lo mester kana ku bo yas den bo tas I un paraplü paso áwaseru por kuminsá kai direpente. E otro kos ta ku bo ta den un struktura ku tin masha hopi regla mes I bo mester ta konsiente di tur e reglanan. No ta manera akinan bo ta kore den outo I ora bo kaba di kome bo kuminda bo ta benta e for di bentana. Ayanan no por. Reglanan di tráfiko ta kompletamente otro. I reglanan kon bo ta komportá bo mes den públiko ta kompletamente otro. No ta asina ku bo ta yega ku bo spiker kuminsá hasi bochincha un kaminda, sin pidi pèrmit”, e fundadó di IBB a sigui den e entrevista. Kemen asina tin tur e informashonnan I detayenan ku IBB ta trata na duna e hóbennan. Hopi biaha tambe ta duna e mayornan e preparashon, paso bai studia afó no ta wega, ta un kambio den henter bo sistema di bida, ta e momentu ku bo ta disidí ki bo ta bai hasi ku bo futuro. Ta e momentu kaminda sèn ta bin hunga un ròl mas tantu, paso mayoria mayor ku tin yu na Hulanda sa di e situashon “ei, mama bo por manda un kos pa mi”. Ora bo ta bai studia ku bo yega Hulanda bo mester tin sèn pa bo hasi diferente aktividatnan. Pa bo drecha bo kamber pa bo buta bo bida den stabilidat e ta kosta sèn. Pa bo kore rònt regla bo kosnan tambe ta kosta sèn. Tur tur kos ta kosta sèn einan. Esei ta e kosnan ku IBB ta trata mas tantu posibel pa duna e studiantenan pa nan ta mas mihó prepará.

E preparashon primario

Omar Martha komo esun direktamente mas envolví ku e studiantenan tambe a duna e parti di e preparashon. El a splika di su eksperensia den e kaso aki i i e ta fásil. El a bisa nos ku e ta kere ku hopi di e hóbennan no ta na altura di kon e bida ta afó. Hopi bia nan ta splika e studiantenan sierto kos I e ta krea un sentido di miedu serka nan. Den e sentido ku bo ta splika ku tin hopi regla I bo tin ku atendé ku e hopi reglanan ei. No ta ku e reglanan no ta eksistí na Kòrsou, pero no tin un sistema kaminda e hendenan ta wòrdu responsabilisá aki miéntras na Hulanda esaki ta e kuestion. Hopi bia nan ta kere ku IBB ta purba di duna nan miedu, purba di spanta nan di loke ta bai pasa. Pero no, ta e realidat. Ora bo no ta bai yega na tempu bo mester laga sa. I no nesesariamente ora bo ta lat kaba, tin bia bo sa adelante ku bo ta bai ta lat, bo mester laga sa na tempu. Purba di tuma pasonan pa bo no yega lat I yega na tempu. Tur e tipo di kosnan ei ta keda informá na e studiante I e mayornan aki na IBB. Mester aseptá ku e kultura ta diferente, hopi otro, kual ta un tiki difísil. Pero ya, e ta algu ku IBB ta keda purba konsientisá e studiantenan pa traha riba dje. Ta un manera otro di biba. Bo no por tuma tur kos, paso esaki tampoko no ta posibel, pero bo mester tene na kuenta ku tin sierto kos ku ta hopi importante pa ta konsiente di dje ora bo sali Kòrsou I bai Hulanda. Ta mesun kos si bo bai biba na Merka, den Karibe òf Sur Amérika, tur pais tin nan kos, tur pais tin nan manera di ta. Den e kaso aki ta ku mayoria di e hóbennan ta bai Hulanda, ta esei ta e preparashon primario.

Prepará mas tempran posibel

Kon tempran e hóben ku ta bai studia afó mester para su mes. Riba e punto aki Tirzo a splika ku e mester ta mas trempan posibel. Di mes no ta tur hende su situashon ta igual. Por ehèmpel e hóbennan na IBB ta pasa minimal dos aña intensivo. Esei ta nifiká ku den e parti akadémiko nan ta wòrdu di train hopi intensivo. E parti personal manera ta mas e disiplina. E parti di traha tambe ta importante, pasobra atrobe e hóbennan ta kustumá di bai skol mainta te mèrdia, ku riba su mes ta kompletamente otro for di na Hulanda kaminda bo ta kustumá di bai skol mas lat den dia. Ora nan bin IBB, e “work ethic” ta kompletamente otro di loke nan ta spera einan, ta algu ku nan tin ku trein. Pero e parti finansiero tambe a ripara ku hopi hende no ta kustumá di dil ku sèn. Tambe ta algu bou di tur e kosnan ku na IBB ta purba konsientisá e hóben riba dje. Di otro banda mester kuida e kosnan ku bo mayornan a kumpra pa bo paso aki ratu ta abo mes tin ku hasi esei. Paso sèn no ta krese na palu serka bo mayornan tampoko. “I nos ta purba for di ora e studiante kuminsá, konsientisá e mayornan ku bai studia Hulanda ta kosta sèn. I pa nan kuminsá spar di moda ku e hóbennan tin algu ora nan bai studia. Por ehèmpel e hóbennan ku ta bai ku SSC, na komienso di aña nan ta risibí sèn pa kumpra material. Hopi bia e material ei ta surpasá e sèn ku e hóben ta risibí. Si un hóben kaba di yega Hulanda,  e mester tin un ‘back up’. E ta bai hañ’e den un situashon kaminda e tin ku hasi eskohonan den e sentido di enbes di presta mas tantu tempu na su trabou òf skol, e lo tin ku bai traha mas tantu sèn. Semper ta mas mihó si e hóbennan I e mayornan por kuminsá prepará for di trempan pa e echo ku e yunan ta bai studia. I nos ta papiando di e konsepto di arte pero esaki ta konta pa tur estudio”, Tirzo a opservá.

No buska trabou den promé aña

Omar a mustra su preokupashon ku último aña a bira tendensia ku e muchanan ta yega Hulanda buska trabou. Sigur pa e muchanan ku ta nan promé aña no ta e mihó opshon pa tin un trabou. Pa e simpel echo ku a ripara ku tin hóbennan ku tin e disiplina ku nan por traha I studia sin problema. Pero tin un porsentahe bastante haltu ku e aspekto di entrada èkstra ta bira asina importante ku nan ta bai focus mas riba trabou ku nan estudio. Tambe  pa IBB ta di suma importansia ku e mayornan I e hóbennan ta konsiente di e promé aña ta bon pa nan ta di focus riba nan estudio I no riba e djòp, paso hopi  bia bo ta bai skol I ta atardi bo ta traha. Si bo ta bai un akademia di arte ta hopi trabou I tarea tin. Kemen bo no tin sufisiente tempu pa bo por siña  I traha den bo promé aña. Esei ta un realidat ku ta mira i ta un echo ku tin hende por pero hopi hende no por kombiná esaki.

Kiko ta e ròl di IBB ora ku e hóben yega Hulanda?

Loke IBB ta hasi ta, nan tin un bon kontakto ku e skolnan, nan tin kolaborashon kaminda ku por puntra e skol kon ta bai ku e hóbennan. Na di dos lugá IBB ta keda ku kontakto ku e hóbennan mes asta ora nan ta na Ulanda Paso tin bia bo tin ku sigui yuda nan, asina Omar i Tirzo a splika Djasabra. No ta fásil pa ora nan yega nobo nobo. “Nos a enkontra ku masha hopi kaso ku sea nan a gasta nan sèn, no tin sèn pa paga hür òf nan a keda sin paga skol. Sorto di kosnan asina ta trese komplikashonnan. Den tur e kosnan ei nos ta intervení. Pa nos ta importante pa nan no kai pafó di e estudio. Paso pa e kos masha simpel mes ku si bo no paga bo skol, mesora e skol ta saka bo afó”. I den tur eseinan IBB ta intervení pa yuda e hóben pa e por sigui bai skol, I purba solushoná e problema “onderling” ku skol. Paso naturalmente IBB ta komprondé ku tin bia bo ta mira kon e hóben ta funshoná na Kòrsou i un kos fásil nan ta lubidá di hasi. Ora ta pa bo promé bia ku bo mes tin ku dil ku sèn bo tin un kuenta ku yen sèn riba dje I bo ta kere ‘anh no mi por fiesta, mi por bai kumpra mi paña, hasi mi kosnan’. Anto lubidá ku e sèn aki tabata pa mi bukinan, pa mi paga skol òf hür. Einan e problemanan ta kuminsá. I si nan no papia, hopi bia e problema ta bai for di man, segun Omar. I ora ku nan papia ta einan ta e tarea di IBB pa nos yuda nan.

Otro siman nos lo sigui ku e di dos parti di e entrevista aki!