Raul de Windt ku mas di 40 aña den karate i defensa propio

Raul de Windt, mihó konosí komo e proyekto: Fortalesa, meresé di keda entrevistá pa tur e proyektonan I aktividatnan ku ta ofresé. Tras di e nòmber grandi I ku hopi poder tin diferente proyekto mas manera Fortalesa Comeback, Karate, i inkluso un sistema di karate ku e mes a diseñá. Raul tin diferente kos pa ofresé tur edat di e komunidat di Kòrsou. Aparte di ta duna lès di deporte, Raul ta organisá seminario di ‘Anti-Bullying’, kursonan di defensa propio pa hende grandi i mucha, i ta aktivo den skolnan kaminda e ta entrená e hóbennan.

Un poko di Raul

Raul ta konta ku su karera den karate a kuminsá ora e tabata  tin 12 aña. Su mama a insistí ku e mester siña algu pa defendé su kurpa, paso den skol básiko tabata ‘survival mode’: bringamentu tur dia. Pa evitá ku Raul ta keda indefenso, su mama a tuma e desishon pa buska un lugá kaminda e por siña defendé su mes. Na momentu ku Raul tabata na e punto pa sali di skol básiko i sigui MAVO, su mama a pasa serka di e sala di karate di Henry Cougon na St. Jozef. El a tende gritamentu i disiplina ku tabata sosodé paden, i mesora el a bai papia ku e maestro. E siguiente dia, su tata a hib’e pa su promé klas. Raul ta konta ku el a duna su máksimo esfuerso, pero na final di e lès, Sensei a hinka rudia ku lomba pa e hóbennan. Raul, sin sa hopi, tambe a sigui e gesto. E momentu ei e otro muchanan a kuminsá harie. Ora su tata a bin busk’e, el a puntra: “Kon a bai?” Raul a bisa ku a bai bon dilanti Sensei, pero den outo el a desahogá: “Tata, mi no ta bai mas, paso nan a hari mi.” Su tata a kontestá trankil: “Si bo no ke bai mas, no ta nada. Pero mi a paga pa e luna kaba, asina ku bo mester bai henter e luna aki.” Raul ta bisa ku e un luna ei tabata mas ku sufisiente… E un luna ei a bira 41 aña.

E diferensia entre karate i defensa propio

Raul ta bisa ku tin un diferensia fundamental. E ta splika ku Karate originalmente a nase komo un método di defensa riba islanan serka di Hapon. Na prinsipio e tabata únikamente pa protehé bo mes. Den aña 1922, el a yega na Hapon kaminda un gran maestro, Fúnakoshi Gichin, ku ta konsiderá komo e fundador di karate moderno, a duna un demostrashon. E demonstrashonnan a keda tan popular ku hopi hende a kuminsá praktiká karate na Hapon. Poko poko, ku modifikashonnan i adaptashonnan ku a surgi, karate a transformá for di un téknika di defensa pa bira un deporte.

Awendia, karate ta keda praktiká den kampionatonan ku regla estrikto, kategorianan, i sistema di faha i unifòrm. Pa duna ehèmpel, Raul ta konta di un mucha ku ta entrená na Merka ku por partisipá te den 52 kampionato den un aña, i su kas ta yená di medaya. Esei ta mustra kon karate na Merka a bira hopi komersialisá. Na Europa, sinembargo, e no a bai den e mesun direkshon. Na Europa karate ta mas strukturá i estrikto, ku un énfasis mas riba disiplina i formashon.

Na banda di karate, tin otro sistemanan ku ta basá spesífikamente riba defensa personal, manera Kapap i Krav Maga, ku a nase den Israel. E sistemanan aki a keda kreá pa polis i forsanan di seguridat, i eventualmente a plama rònt mundu. Nan ta un kompilashon di téknikanan práktiko ku a keda selektá for di diferente arte marsial pa krea un estilo ku ta 100% funshonal pa situashonnan real.

Uso di karate den bida real

Na e punto aki Raul ta klarifiká un mito ku hopi hende tin: ku si bo ta praktiká karate, bo no por usa esaki den un situashon real, paso “lo bo bai será.” Raul ta bisa ku esaki no ta bèrdat.

“E ta un mito. Naturalmente, si bo ta entrená òf no, tur hende tin e derecho pa defendé su kurpa. Lei ta protehá bo den un situashon kaminda bo ta defendé bo mes. Loke e hues ta hasi ta analisá e kaso, pa wak kiko a sosodé, i abase di esaki tuma un desishon, igual manera den tur otro situashon.”

Raul ta insistí ku praktiká di karate no ta hasi ku un hende lo keda mirá komo “letal.” E ta un arte marsial ku na su esensia tabata pa defendé, i si bo usa e ku responsabilidat, lei ta rekonosé bo derecho pa protehá bo mes.

E sistema di Raul i diferensia ku otro arte marsial

Raul ta konta ku su sistema di karate ta diferente paso e ta basá riba tur arte i sistemanan ku el a praktiká. El a saka e téknikanan ku e ta konsiderá “práktiko,” esun ku realmente lo bo por usa den un pelea real. Arte marsial tradishonal tin hopi téknikanan ku bo ta siña, pero hopi di nan no ta útil den situashon real. Su sistema ta hinka solamente e kosnan ku ta efektivo i ku bo por hinka den práktika.

“Si bo train awe serka mi, bo ta siña e téknika i despues bo por hinka esaki mesora den práktika. No ta algu ku bo mester entrená 10 aña promé ku bo por konsiderá bo mes un profeshonal,” Raul ta bisa.

Diferensia entre defensa propio i arte marsial

Ora bo ta siña defensa propio, e ta un tiki diferente for di simplemente entrená karate. Karate tin tur kosnan di defensa propio, pero no tur téknika ta praktikabel den situashon real. Mesun kos ta keda apliká pa Taikuando i Yudo. Tur arte marsial ta inkluí defensa propio, pero kada estilo tin su enfoke. Karate ta mas enfoká riba tira moketa i skòp, Taikuando di Korea ta enfoká mas riba tira skòp, i Yudo ta enfoká riba tene.

Tur e arte marsialnan ta kontené defensa propio, pero e diferensia ta den e enfoke ku kada maestro ta duna: kada sistema ta desaroyá pa reforsá e aspekto ku ta keda konsiderá mas útil i praktikabel pa situashonnan real.

Karate pa tur hende

Tur hende por praktiká karate, Raul ta bisa. Na Hapon, e muchanan ta kuminsá praktiká e deporte for di 2 aña. Na Kòrsou, ántes nan tabata kuminsá for di 4 aña, pero kosnan a kambia i mayoria skol ta tuma mucha for di 6 aña.

E kambio den edat ta relashoná ku e focus di e mucha, si e por skucha i para ketu, i ku e no ta demasiado chikí pa kontrolá. Raul ta konta ku ora el kuminsá tabata tin un mucha di 4 aña ku yama Andre, i e tabata para hasi su téknika strak strak. Pero awor aki un mucha di 4 aña ta difísil pa dirigí, paso nan atenshon ta mas limitá. E ta sigui bisa ku lamentablemente, e interes di mucha a baha kompará ku ántes. Antiguamente, deporte tabata un manera pa entretené, konektá físikamente ku otro hóben i hunga den kurá. Awendia, hopi mucha ta mas enfoká riba telefòn, i e parti físiko di konosementu i koordinashon no ta mesun tantu desaroyá. Raul ta opservá ku e deporte manera MMA i ‘kickboxing’ ta mas promové internashonal, i e ta konsiderá ku e estilo ei por yuda motivá mucha pa keda aktivo.

Seminario di tenta

Kon bo ta mira e situashon aktual i kiko ta e kos prinsipal ku bo ta focus riba dje?
Raul ta menshoná ku e kos prinsipal ta e aspekto mental. E ta bisa ku hende ku tenta ta mira kon bo ta komportá i kon bo ta transmití bo energia. Bo postura, bo mirada i bo manera di kana, ta duna e señal di kon sigur bo ta di bo mes.

E persona ku ta tenta ta buska e un persona ku e por molestiá mas fásil, dor di buska esun mas vulnerabel. Raul ta enfatisá  ku bo postura ta importante: si bo ta mustra insiguridat òf bo ta dobla bo lomba i wak abou, bo ta transmití ku bo ta suak, maske bo tamaño di kurpa por ta grandi. Esaki ta e motibu dikon e seminario ta focus riba e parti mental, kon bo por usa bo presensia i krea konfiansa pa defendé bo mes.

Raul ta splika ku e ta duna seminario na mucha i pa hende muhé adulto ku por ta víktima di abuso doméstiko of relashonal. E ta enfatisá ku un persona ku ta abusá di otro no solamente ta wak kon  fuerte bo ta físikamente, sino tambe kon sigur i kuantu konfiansa bo tin den bo mes. E no ta purba ku un Serena Williams òf un atleta famoso, e por sinti e energia i seguridat ku nan ta transmití. Loke bo ta mustra ku bo presensia, ta e manera ku bo ta sinti: bo postura, bo manera di kana i bo siguridat ta duna un indikashon real di bo fortalesa mental. Huntu ku esaki, e seminario ta inkluí entrenamentu físiko, pa siña bo téknikanan práktiko di defensa propio i pa prepará bo pa situashon real kaminda bo mester protehá bo mes.

E interes pa e seminario ta grandi, pero riba nivel di mucha, si bo yama e “Anti-Bullying”, tur mucha ta pensa ku si nan bai e lès, tur hende lo sa nan situashon personal. Pa evitá esaki, Raul ta enfatisá ku e mester usa e parti di sikologia den un manera kreativo pa nombra kada seminario, pa protehá privasidat di e partisipante. Por ehèmpel, si bo yama e lès “Lès kontra abuso doméstiko”, e hende muhé no ta bai presentá dor di bèrgwensa of tabú.

Pa logra yega na e komunidat mas amplio, Raul a krea otro tipo di proyekto ku diferente nòmber. E ta kolaborá ku Fundashon Bos di Hubentut pa e proyekto “Love and Protect Yourself”, pa mucha muhé ku ta bai skol sekundario. Tur e mucha muhé den skol ta partisipá huntu, di e manera aki bo ta protehá nan situashon personal. Ademas, e yònkumannan tambe ta risibí entrenamentu riba kon pa desaroyá empatia pa hende muhé.

Empatia di hende hòmber

Raul ta splika ku e ta kuminsá semper ku e pregunta: “Ken sa kon pa trata hende muhé?” Di e manera aki, normalmente un òf dos hóben ta kontestá, i e ta tuma esaki komo punto di partida pa elaborá riba e tema. E ta usa senario i ‘rollenspel’ kaminda e mucha hòmber por mustra kon nan lo aktua den e situashon. Hopi hóben ta kere ku nan mester hasi lokual ku nan ke i ku nan no mester puntra pa nada. E seminario interaktivo ta yuda nan komprondé ku pregunta i diálogo ta fundamental. Resultado di e seminario ta hopi bon, e ta yuda krea empatia i konsientisashon den e hòmber tokante kon pa aktua respetuosamente i protehá hende muhé den situashon difísil.

Empatia ta algu ku mester sali for di kas

Raul ta bisa ku empatia ta algu ku bo mester sali kuné for di kas. E situashon aktual ta reflehá un kultura di machismo ku ta a preshoná nos hóben. Na Kòrsou, ántes tabata normal ku un hòmber tin mas ku un muhé, manera otro paisnan den serkano kaminda e esaki ta keda aseptá komo parti di  nan kultura. Antes tabata tin asta un nòmber pa e muhé den banda: komblis. E hòmber tin su famia, i e komblis ta biba dos kaya despues; tur dos muhé sa di otro. Tin kaso kaminda e komblis tabata tira bista riba e muchanan ora e mayornan mester a sali.

E mucha muhénan di awendia si no ta aseptá esaki, pero ántes esaki tabata keda konsiderá normal. Huntu ku esaki, e muhé no por bisa nada; si e protesta, e por a haña sla di e hòmber. Pafó di e situashon, otro hende ta pensa ku e muhé ta haña sla dor di su propio akshon i di for di e punto aki e muhé ta bai buska e eror den su mes. Hopi bia e preshon ta bin dor di e tata, pero tambe dor di e mama ku ta aseptá e trato manera ta algu normal. Nos hóben a wòrdu kondishoná den e sistema, i e ta evidente ku esaki no ta bon.

Mester di un sistema nobo pa lanta nos yu hòmber

Tin otro sistema ku por yuda nos hóbennan hòmber komprondé kiko ta real maskulinidat. Ta un hòmber di kas no ta enserá tin hopi muhé; si no mas bien amor i rèspèt. Den e entrenamentu ku Fundashon Bos di Hubentut, e hóben ta siña ku un hòmber mester ta fuerte, pero no violente. E mester ta serio i di focus, pero semper trata tur hende ku rèspèt. Un hòmber apsolutamente no mester dal un muhé ni un hende ku ta mas debil; bo no mester probechá di niun hende, e ta splika. Awor, e entrenamiento ta dura maksimal 5 dia, pero e ta duna e hóben e base pa despues ku e bai den su habitat normal, pa e mantené e prinsipionan aki, pero Raul ta konsiente ku e ta algu difísil. Na otro paisnan, e método ta keda implementá den kuríkulo di skol, pa e mucha komprondé kon mester trata otro hende. Si nos kuminsá hasi esaki na Kòrsou, nos lo krea hopi resultado positivo, e ta sklama.

Mas na kaminda

Raul ta menshoná ku tin diferente proyekto nobo na kaminda I tambe ideanan kreativo I inovativo riba papel. Resientemente, Raul abri un lokalidat nobo ku ta situá serka di Mangusa Rio Canario, kaminda ántes tabata El Camú. E lugá nobo ta e lokalidat di Fortalesa. Tambe tin entrenamentu di ‘fitness’ i ‘pingpong’, ku ta keda ofresé dor di Raul su kasá. Su kasá a partisipá den diferente kampionato internashonal di ‘pingpong’. Tur e aktividatnan ta konsentrá i orientá pa benefisio di e partisipante tantu físiko komo mental.

Raul ta klousurá ku: “Ta importante pa keda move i mantené e energia.”