WILLEMSTAD.- E téletòn ku a tuma lugá na Sambil djaweps 9 di mei, organisá dor di Radio S.O.S. a rekoudá 126.000 Naf. Esaki e organisadónan a duna di konosé djaweps anochi. Ainda tin posibilidat ku persona, kompania i instansianan por hasi donashon.
Otro siman lo entregá e sèn aki na Fundashon VIBA i Plataforma Banda Bou ku lo kontinuá ku kordinashon pa yuda esnan afektá den e área di Banda Bou.
Radio S.O.S. ta un inisiativa di karidat di diferente stashon lokal di radio. E akshon pa rekoudá fondo ‘Huntu Pa Banda Abou’ ta pa ofresé sosten finansiero na habitantenan ku a sufri hopi pa motibu di e yobida fuerte i inundashonnan resientemente na Banda Abou.
Paradise FM, HITradio 915, 88Rockòrsou, TCFM, Radio Direct i Radio Active tabatin transmishon ‘live’, inkluyendo diferente presentashonnan i akshonnan lukrativo pa kolektá plaka.
Inisiadó Joris Reer ta splika ku intenshon di e téletòn pa uni forsa pa ofresé sosten finansiero na e habitantenan di Banda Abou pa nan por rehabilitá e daño na nan kasnan, pertenensianan i bario.
E téletòn no ta pa drecha infrastruktura, ku ta un tarea di gobièrnu. “Pa nos ta importante ku hendenan den nesesidat por haña yudansa hopi lihé.”
Durante téletòn organisashon Corendon a hasi donashon di 30.000 Naf. Den un donashon huntu, BMW Curaçao, MNO Vervat i Kunuku Aqua Resort a duna un montante di 30.000 Naf. Harbour Hotel a hasi donashon di 10.000 Naf.
