PANCHKULA, INDIA, AP.- Vários siudat na nort di India tabata bou di medidanan di seguridat tenso, na momentu ku un tribunal mester duna sentensia den kaso di e guru di un sekta religioso akusá di violashon.
Desena di míles di siguidó a para riba e ruta ku ta yega e tribunal, kual tabata rondoná ku barikada i forsanan di polis i paramilitar.
E lider spiritual, ku ta yama su mes “E dòkter santu Gurmeet Ram Rahim Singh Ji Insan” ta ninga e akusashonnan ku el a violá dos di su siguidónan, den sekta Dera Sacha Sauda.
“Nos ta akinan paso nos ta sostené e guru, nos ta akinan pa mustra nos solidaridat”, segun indikashon di Nishu Rani, un hóben di 20 aña ku a akudí na e sitio ku 20 famia desde e estado di Punjab.
Huntu ku nan tabatin míles di hòmber, muhé, muchanan i asta beibi na kantu di kaminda wardando e veredikto. E sekta a bisa ku esaki tin 50 mion miembro, e sekta ta promové vegetarismo i ta kontra drogadikshon.
“Tin hendenan ku ta bandoná nan yu, i e guru ta adoptá i trata nan manera su propio yunan”, asina Rani a bisa. “Dikon un hende manera e lo hasi algu asina baho. P’esei nos ta akinan pa dun’é nos sosten”.
