Prekario Richenel Mauricia I Norisa Gerard

E temporada di fiesta ta sigui i bo por sinti e ambiente di karnaval ta aserká. Tur hende su kabes ta riba marcha, unda ta bai para i stelazje. Miéntras tur hende ta prepará pa gosa di e fiesta, ta di sumo importansia pa tene na kuenta ku e reglanan di prekario. Pa elaborá mas riba e tema importante akí, nos tin dos invitado spesial: Richenel Mauricia, enkargá ku e tim di kontròl, ku ta sigurá ku ta mantené tur  regla i Norisa Gerard, lider di e tim prekario, ku ta guia e proseso i aktua komo kontakto prinsipal.

Preparashon prekario

Norisa ta splika ku e preparashon di prekario a kuminsá for di novèmber di aña 2024. Un komunikado di prensa a keda saká pa informá e pueblo i adishonal tur kliente eksistente a keda informá tokante e proseso di registrashon, e fecha i orarionan disponibel pa registrá. E klientenan ku tabata deseá di bini na remarke tambe a keda aserká. Pa fasilitá e proseso nan a risibí un lenk kaminda nan por registrá nan mes.

Sistema di prekario ta reglá di e siguiente forma

Norisa ta menshoná ku e sistema di prekario akí tin por lo ménos 2 pa 3 aña. Un invershon basta grandi a keda hasí den e añanan. A tene un diálogo ku representantenan di grupo di karnaval, kaminda e sistema a keda introdusí. Na prinsipio, tabata tin algun resistensia pero despues di a splika e motibu i e benefisionan di e sistema, e representantenan a duna un muestra di aseptashon i komprenshon pa e método. Norisa ta suprayá ku ta importante pa nota ora kosnan a bai bon pero tambe ora tin desafionan. Por ehèmpel, e aña anterior tabatin algun reto tékniko i operashonal, manera e mapa digital, kliente i e kuestion relashoná ku palunan di lus den espasio di prekario. Norisa ta enfatisá ku no tabata Aqualectra su fayo ku kada 5 meter tin un palu di lus posishoná den e kliente su espasio. E tim di prekario tabatin marká ku na punta di e kliente e palu di lus ta situá. E aña akí, enbes di bai kompletamente digital, nan a disidí di warda un ratu mas. E kliente lo bini personal na ofisina di prekario, kaminda nan lo mustra unda nan ta para. Ademas, e tim di prekario lo bai tira un un bista pa por evaluá loke tin riba e mapa. Nan ke perfekshoná e data ku tin. Pa e próksimo aña, e mapa digital lo keda implementá di un manera mas efisiente. Norisa ta sigui bisa ku den e transkurso di 2 pa 3 aña, e tim di prekario a bin ta konsientisá e pueblo tiki tiki ku bo entrada i salida mester ta dilanti òf patras i no den banda. E tim di prekario a asta traha un palèt di demonstrashon. Tiki tiki pero sigur por mira un adelanto den esaki, Norisa ta konkluí riba e punto akí.

Sistema ideal den praktiká

Si un hende ta kana dilanti i e mester bai patras, kon esaki ta sosodé? E mester yega te na un porta pa e por bai patras, tabata preguntanan ku nos a hasi e tim. Nan a splika ku e sistema di prekario ta trahá pa logra un funshonamentu mas ordená i sigur pero e implementashon por tin reto. Norisa ta splika ku un situashon manera esaki ta eksigí planifikashon. Si no tin sufisiente espasio entre e stelazjenan, e persona mester yega na un porta pa por bai patras. Esaki ta forma parti di un planifikashon ku ta inkluí e kolaborashon di diferente ministerio. E mapa digital ta aksesibel pa tur ministerio i organisashonnan relevante. Den kaso di kalamidat, e mapa ta indiká eksaktamente unda e multitut por sali pa sigurá seguridat di tur hende. Segun Norisa, esaki ta forma parti di e tareanan di planifikashon urbano (VVRP), konhunto ku ministerio OWCS, komo ku karnaval ta keda un fiesta kultural.

Richenel ta agregá ku den kaso ku polis mester intervení, nan ta manda bo bai patras di e ‘dranghek’ i no patras di e stelazje. Ademas, e espasionan kaminda tin porta ta indiká pa medio di un bandera, kual ta fasilitá orientashon di e multitut. Dilanti di kada stelazje, mester keda un espasio disponibel pa hende por kana. Esaki ta regla estrikto, no por blòkia kaminda públiko. E espasio akí ta esensial pa sigurá ku tin un fluho konstante.

Mapa digital

Norisa ta bai un stap mas leu dor di splika ku den e proseso di digitalisashon, un danki spesial ta bai pa e koleganan di Openbare Werken, Judrenne i Gerit. Nan a yuda den e planifikashon i desaroyo di e mapa. Pronto, e mapa lo ta disponibel pa tur hende, ku ta bai permití pa por wak ‘online’ unda tin prekario i unda no tin prekario. Norisa ta enfatisá ku den e prosesonan di parselashon, ta kuminsá na marka e kuater puntanan, ku ta determiná e espasio di un prekario. Tur loke ta den e kuater puntanan ta di bo i loke ta dilanti di e espasio no ta di bo, si no ta públiko. P’esei, polis tin e derechi di bisa un persona ku e mester bai patras. Un di e desafionan ku a surgi e último aña tabata ku algun kliente ta pensa ku paso nan tin nan prekario, ningun hende no por para nan dilanti. Norisa ta klarifiká ku esaki no ta korekto. Di bo ta estriktamente e espasio limitá den e kuater puntanan i esaki ta pará bon kla den e reglanan den e areglo.

Kuantu kavel tin i na unda?

Norisa ta menshoná ku tin por lo ménos 3000 kavel, ku ta dividí entre kliente i kliente ku ta bende produkto. E kavel ta lokalisá for di Rooseveltweg, kaminda karnaval ta sali, kuminsando despues di e pòmp di gasolin te banda di Colon mas o ménos. Norisa ta agregá ku hopi hende ta preferá para na Rooseveltweg, kaminda ta mas trankil. E ta sigui bisa ku riba e ruta tin áreanan ku ta kai bou di prekario pero tin tambe áreanan ku ta di gobièrnu i otronan ku ta tereno privá. Un ehèmpel ta banda di Marchena, kaminda tin terenonan ku ta privá ku no tin prekario. Norisa ta reafirmá ku semper nan ta respetá e kliente patras i ku si den futuro nan mira ku algu a keda konstruí, ta aserká e kliente i puntra si e prekario ta stroba òf si e tènt ta bon. Ta palabrá huntu pasó ta huntu ta gosa!

Grandura di kavel

E kavel nan ta varia di tamaño. E tamaño mínimo ta 3 meter i e tamaño máksimo ta 12 meter. Den pasado a yega di tin kavel mas grandi ku 12 meter pero dor di ahustá di lei di prekario esaki no lo bini mas dilanti. E preis pa kavel ta varia dependé di e sekshon. Tin kuater sekshon: A, B, C i D. E mínimo pa kavel meter tin un preis di 100 florin. Pa algun sekshon e mínimo di 3 meter ta 200 florin. Pa kada meter èkstra, e preis ta subi ku 100 florin òf 50 florin, dependé di e sekshon.

Kon ta kontrolá e parti di e kavel?

Richenel ta bisa ku e parti di kontròl ta kuminsá for di momentu ku inspektornan di prekario kuminsá wak e área. Durante e fase di konstrukshon/instalashon, e tim di kontròl tambe t’ei. Segun e pèrmit ku kliente haña ta pará skirbi ku tin un límite di haltura di 4 meter. E kliente lo mester traha algu duru pa evitá problema. Na final di karnaval, e kliente mester kita i limpia kaminda su stelazje tabata situá. E tim di kontròl ta pasa kontrolá. Tur e reglanan segun Richenel ta disponibel riba e plataforma di Facebook di prekario. Norisa ta agregá ku pueblo por subi riba e página di Facebook di prekario pa mira e rekisitonan. Debí ku nos pueblo no ta gusta lesa, e tim di prekario a publiká 16 video ku ta demostrá e 16 rekisitonan ku ta pará den e areglo.

Promé opshon pa kavel

Norisa ta splika ku e promé persona ku tin e kavel i ku ta deseá di bolbe haña e mesun kavel, ta e promé opshon, basta si e kumpli ku tur e rekisitonan. Ta importante pa e kliente komprondé ku e promé persona ta e persona ku ta pará den e areglo. E di dos persona, ta e persona ku pa medio di un karta, tin outorisashon di e promé persona pa hasi e proseso di registrashon i pago. E persona mester ta biba na Kòrsou i ta registrá na Kòrsou. Miéntras e persona no ta biba na Kòrsou òf no ta registrá, outomátikamente e petishon di prekario ta bolbe bai den lista di espera. Norisa ta menshoná ku na e momentu akí e lista di espera ta 860 persona. Kompará ku aña pasá e lista tabata entre 400 i 500. Pa añanan binidero ta spera ku e sistema di mas ku 12 meter no ta den funshon ku ta indiká ku lo por tin mas kavel i asina mas persona por bin na remarke.

Marka kavel

E manera di marka kavel ta varia segun e situashon. E aña anterior, tim di prekario a buta pènchi pa e kliente por rekonosé unda su kavel ta. E tim di kontròl a bin nota ku e pènchinan a keda mové. Richenel ta agregá ku e tim di kontròl ta kontrolá e puntonan ku ta marka den e pèrmit i si tur hende kumpli ku e rekisitonan di esaki tur kos lo kana nèchi. Sinembargo, e proseso di digitalisashon ta pa hasi e sistema mas efisiente.

Kumpli òf pèrdè derechi

Tin vários rekisito ku mester kumpli kuné. E problema mas frekuentá ta relashoná ku kavel, e manera ku e stelazje ta keda trahá. P’esei ta importante pa no hasi loke bo no ke pa otro hasi ku bo, no stroba bo bisiña. Otro problema ku e tim di prekario ta enfrentá ta ku na final di karnaval, basta persona no ta bin limpia nan kavel, ku ta kondusí ku siguiente aña bo lo por pèrdè e kavel. Si e kliente no kumpli, e tim di prekario ta manda un karta di atvertensia 3 bia. Si e persona no tuma akshon un otro forma di kontròl ta tuma lugá.

Proseso di pago

E parti di registrashon i pago ta basta kla indiká den e areglo di e kliente. Si bo no paga outomátikamente lo bo no bin na remarke mas i bo ta bai den lista pretu. Antes, tabata tin solamente 1 pèrmit. Awor tin 2 pèrmit, ku ta keda distinguí ku tin kavel ku bo por konstruí ariba i otro ku bo por buta kos so riba dje. Si e tim di kontròl pasa na momentu ku no tin karnaval i mira bo banki òf tènt, e tim tin e outoridat pa kue bo banki bai kuné. Ta pará den e kliente su areglo, kual el a akordá ku e no a paga i e ta bai ku su banki òf tènt kas na final di kada marcha.

Fecha pa kuminsá konstruí

E parti di marka no ta un informashon ku por kompartí ku públiko, esaki ta mas interno. Anteriormente, tabata skibi e number di pèrmit abou pero awor ku tur kos ta digitalisá, e kliente lo mester subi riba un plataforma i wak su kavel. E fecha ku hende por kuminsá konstruí ta 8 di febrüari, segun e pèrmit i e fecha pa kita ta mas tardá ta 9 di mart.

Norisa ta bisa pa tur e personanan ku ta riba lista di espera: "kere mi, mi ta komprondé e situashon pa bosnan pero mester tene kuenta ku e espasionan ta limitá." Norisa ta pidi pasenshi i klarifiká ku nan ta yama e personanan tiki tiki segun posibilidat. Komo ku e proseso a keda alargá, mester tene na kuenta ku diferente faktor atministrativo. Por ehèmpel, a plania pa 10 di yanüari tuma kontakto ku personanan pero esaki no por a tuma lugá.  Norisa ta agregá: "esaki ainda no ta un proseso digital, un tiki pasenshi. Otro aña, si abo ta riba lista di espera, lo bo tin mas oportunidat pa bini na remarke."

Richenel ta agregá ku e tim di kontròl ta nombrá spesífikamente pa aktua den e kapasidat ei. "Ora un miembro di kontròl aserká bo, por fabor kooperá i trata nan ku rèspèt, pasobra nan ta aktua segun loke abo mes a firma den bo areglo."

E mensahe final ta pa tur hende kooperá. Si tur hende traha huntu i ku rèspèt, esaki lo yuda e proseso bai mas dushi i efisiente.