Braidley Jourdain
Nellisa Jourdain Brug
Five and Two Cafe
Braidley Jourdain i su kasá Nellisa Jourdain Brug a bin ku e inisiativa Five and Two, un sitio pa sinta kome i relahá. Five and Two Cafe ta e parti di sinku pan i dos piská ku Dios a multipliká i duna multitut di hende pa kome. Ora a kuminsá ku e proyekto tabata un soño, den mente i no tabatin nada. Pero nan a entregá nan plan den Dios su man, ku hopi orashon, nan no tabatin fondo pero nan a hasi orashon. Tiki tiki e hendenan a kuminsá bini, e personanan indiká a kuminsá bini i asina e soño a kuminsá bira realidat te nan a disidí ku awor si ta e momentu pa habri. Segun Braidley a konta Djasabra, na momentu ku nan a habri, no tabatin niun otro nòmber ku nan por a yama e Cafe ku no ta Five and Two, esta e sinku pan ku dos piská ku porsierto por mira tambe den nan logo.
Sinta i spera sita
Ta trata aki di un Cafe ku ta habrí di mitar di 8 mainta pa 2 or di mèrdia. E konsepto a kuminsá debí na e Spa ku tambe nan tin djis den banda. Intenshon ta pa segun e bai e bira un Wellness Center kompleto. E personanan ku ta bishitá e Spa ta puntra ku no tin algu di kome i bebe i asina nan a inkorpor’é den e totalidat, kaminda e hende ku ta bai e Spa por bai sinta einan sperando nan sita.
Tiki tiki pero sigur
E Spa ta esun ku a habri promé. Nellisa a kuminsá ku e Spa i tiki tiki el a keda krese te nan a disidí di hasié algu mas grandi i envolví mas hende, ku mas servisio manera manikür, pedikur, hasi kara i Nellisa mes ta e Sugar Queen. Despues di un aña ku nan a mira kon kos ta bai i ku e Cafe den mente, kosnan a establesé i asina a kuminsá ku e Cafe. Tiki tiki segun Braidley nan hendenan tabata yega i tiki tiki dunando hopi sosten.
Pasonan di fe
Segun Braidley a konta nos, el a pidi Dios pa dun’é tres señal ku awor aki ta e momentu pa e habri e Cafe. Braidley tabatin su trabou, ku su bon salario i tur kos establesé. Pero e sa ku e mester a djòin su kasá. Braidley a lanta tende ku un hende mester di su trabou, stabilidat di 8 pa 5 i pa yega na un kas. Pero segun e ta papia ku su kasá nan a kuminsá papia den traha kas pero kisas mas ku un kas, laga algu pa nan generashon. I si nan por traha un pida imperio dikon no por dominá henter un imperio. I asina ideanan a sigui drenta i Braidley a gusta loke su kasá tabata papia pero tòg e tabatin duda. El a kuminsá hasi orashon i entregá su plannan pa Dios dirigí e momentu ku e tin di move. El a pidi Dios pa manda e hendenan korekto i asina tiki tiki e hendenan aki tabata bini sin ferwaktu nada a kambio. Na di dos lugá el a pidi pa e soño ku e tin pa su kasá ta di akuerdo kuné. Su kasá tabata bin ku potrètnan kon e lugá lo mester ta i asina e di dos señal di Braidley tambe a bira realidat. E ta kòrda ku nan a pidi finansiamentu pa e Cafe i dianan tabata bai sin nada ta sosodé. El a hasi orashon pa Dios pe por haña un kontesta e siman ei. E ta kòrda ku el a hasi orashon djaluna i ya djárason el a haña e kontesta. I e mesun djabièrnè el a entregá su karta di retiru. Ta pasonan di Fe segun Braidley.
Lo mi skohe mil bia meskos bèk
“Si mi por skohe bèk, lo mi skohe mil bia loke mi ta hasiendo. Mi ta stima e libertat i hendenan ku mi por hasi kontentu. Hendenan ta bin aki kargá, pero si wak nan kara ku nan ta sali for di einan ta un satisfakshon. Hendenan ta bin sinta kombersá aki i ora nan sali nan ta kontentu. I esei mi ta haña hopi great i no tin preis pa pag’é. Nos ta purba duna mihó servisio posibel, ku kalidat tòp na kos di kome i bebe i tur kos ku nos traha ta riba resèpt. Bo ta yega aki 10 aña i ta haña meskos ku awe”. Braidley a bisa ku nan no ta saka nada afó miéntras nan mes no purb’é i gust’é. Tambe nan ta laga algun hende purba pa mira si sigur nan ta gust’é pa por ofresé na e públiko.
E pueblo ta sostené empresario lokal
Five and Two awor a kumpli 7 luna. For di ora nan a habri, nan a kuminsá pone ‘online’ ku nan ta bai habri e mesun dia ku nan a habri ta mesora hende a kuminsá drenta. Braidley a bisa ku nan no a hasi hopi pa mira esei pero asina nan a start hopi hende tabata bin. E pueblo eifó ta sostené empresarionan lokal i esei nan ta mir’é. Hendenan ta duna nan kòmplimènt. E sa ku na kaminda no tur ora ta asina fásil i por mira temporada no ta bai manera bo ke pero segun ta bai e ta krese. I tin bia bo tin di dal un stap patras pa dal un stap dilanti i asina sigui krese.
Spera mas
Braidley a bisa ku por ferwaktu mas di Five and Two i Palangana i por spera muchu mas di nan. I si e tin di duna konseho na un hende ku ta kana rònt ku un idea pa un negoshi, Braidley ta bisa plania loke bo ke hasi. No lag’é na soño pero skibié riba papel. Esei e ku su kasá a hasi. Plania i ora bo plania bo ta na mitar kaminda. E miedu i e duda ta bin sinembargo ta un stap di fe mester dal. Tin bia bo ta pensa ta esei bo tin di hasi, pero bo tin di silensiá bo mes pa dal e stap di fe ei. I Braidley no tabatin konosementu di Cafe pero nan tabatin un trahadó ku a dun’é e push. I asina el a tuma un luna largu pa e siña i trein pa asina logra. E sa ku tin muchu mas pa siña pero ta importante pa sa kiko bo ta hasi. Braidley tin trahadónan kapasitá pero e mes tambe ta sòru pa e hasié bon pa por siña otro.
E spesialidat
Pa loke ta nan spesialidat Braidley a bisa Djasabra ku pe e Lemonade nan ta kampion. E mint Lemonade ta master. Nan surtido di kòfi tambe ta hopi bon. E pannan tur ta bon pero si e tin di rekomendá e ta bisa purba e Italian òf e Salmon. I tur hende ku yega ta bisa meskos.
