Tin speransa pa kambionan positivo di tráfiko marítimo
WILLEMSTAD.-Kompania di Tou Kòrsou (KTK) ta hasiendo investigashon riba e toubot ku den wikènt tras di lomba a konfrontá un problema durante di su operashon. No ta asina ku e motornan di e toubot a kai afó, pero e boto a pèrdè forsa i p’esei e ingeniero na bordo a pidi un espasio pa remediá e situashon i despues por a kaba e trabou di asistensia na e barku den haf. E investigashon ta importante pa asina KTK mes por siña for di loke a pasa. Na palabra Suldrick Rojer direktor di KTK den deklarashon pa EXTRA.
Manera indiká den fin di siman e toubot di KTK Lima II a konfrontá un problema tékniko durante asistensia di un barku ku a sali Dòk na DAMEN pa bai mara na Reparatie kade. Lima II tabata asistí e barku huntu ku un otro toubot di KTK, Manta. A resolvé e problema pa e asistensia por kontinuá. Komo medida di prekoushon a saka Lima II for di servisio pa por analisá e fayo tékniko i tambe hasi un inspekshon mas detayá.
E direktor di KTK a duna di konosé ku durante di e insidente no tabatin niun daño na Manta ni e otro barku. Na e momentunan aki e toubot ta den revishon pa kaba di wak tur detaye relashoná ku e kaso ku a tuma lugá. Pues awor aki e toubot ta for di servisio pa un ratu. E ‘breakdown’ na e momentu ku el a sosodé no ta algu ku a premirá, nèt momentu ku tabata dunando asistensia na un barku. Esei mes tabata e motibu ku e ingeniero na bordo a pidi un espasio di tempu pa por analisá kiko ta pasando i a solushoná e situashon. Sr. Rojer a mustra ku Manta a kontinuá e tarea ku el a kuminsá kuné te na final.
Riba e pregunta kon ta bai ku kantidat di trabounan den haf sr. Rojer a bisa EXTRA ku tur kos a keda igual den sentido ku for di momentu ku refineria a sera i Bullenbaai tambe no tin moveshon KTK ta sinti esei. Ta danki Dios na trabounan ku KTK ta realisá den eksterior ku e kompania ta kontinuá. E situashon di KTK despues di desaroyonan di refineria a bira kompletamente diferente. Anteriormente KTK mester a tene na dos okashon senarionan di retiro boluntario sperando riba kambio. E perspektiva pa loke ta trata produkshon i prosesamentu di asfalt tambe lo por trese kambio positivo den tráfiko marítimo, asina direktor Rojer a finalisá.
