MpowerMen ta un organisashon ku ta pone atenshon riba bienestar di hende hòmber. E programa di Djasabra tabatin e plaser di entrevistá e organisashon atrobe despues di 4 aña. E organisashon mes ta eksistí ya pa 8 aña kaba, for di 2017. Pa papia tokante e importansia di pone atenshon riba hòmber, a kòmbersá ku Gwen Leuteria i Rachiem Gustina, dos miembro, pa papia di Dia Internashonal di Hende Hòmber ku ta keda selebrá riba 19 di novèmber, pero tambe di e trabou kontinuo ku nan ta hasi durante aña, duna sosten, orientashon i speransa na hòmbernan den nos komunidat.

MpowerMen ta enfatisá ku bienestar di hòmber ta un parti esensial  pa un sosiedat saludabel, no solamente dianan di fiesta, sino un proseso konstante di konsientisashon, edukashon i konekshon humano.

MpowerMen 4 aña despues

Gwen ta konta ku MpowerMen a logra hopi di e metanan ku e organisashon a pone den término kòrtiku, i ta sigui traha pa logra esunnan mas den término largu. E ta splika ku e organisashon a keda kreá spesífikamente pa duna hende hòmber un espasio kaminda nan por krese, reflehá riba nan mes, i siña konektá ku otro hòmber den un ambiente di apresio i konfiansa. E ta un espasio kaminda hòmber por ta nan mes, sin keda husgá , sin preshon, i sin e nesesidat pa ta “fuerte” tur ora. MpowerMen a keda establesé netamente pa duna tantu hòmber adulto komo hóben un lugá pa eksplorá ken nan ta i pa krea un fundeshi pa liderá nan mes i nan komunidat. Durante e 4 añanan ku a pasa, e organisashon a kontinuá ku Boys Summer Camp, un programa di vakashon pa hóben entre 13 i 17 aña. E kampo ta sirbi komo un plataforma di formashon personal, ku a bira un piloto pa un programa mas amplio ku ta enfoká riba liderazgo pa hóben den mesun rango di edat.

Ademas, for di 2021, MpowerMen tin un grupo pa hende hòmber adulto ku ta reuní un bia pa luna, kaminda nan ta papia habrí di temanan manera emoshon, retonan di bida, trabou, relashon, paternidat i bienestar mental. Un komunidat ku ta sigui krese, pasó kada reunion ta mustra kon importante ta pa un hende hòmber tin un espasio, di atenshon i di kuido.

Guia, formashon òf orientashon interno

Na desèmber di 2021, MpowerMen a lansa un programa ku ta e grupo mensual pa hende hòmber adulto. Un espasio kaminda, un bia pa luna, hòmber por papia sin keda husgá, reflehá riba bida, i haña un momentu di konsientisashon i liberashon personal. Dia 19 di novèmber, ku ta Dia Internashonal di Hende Hòmber, ta bai hasi 9 aña ku e organisashon ta selebrá e momentu akí. Pero pa MpowerMen, nan no ta visibel solamente pa dianan di fiesta. Nan ta traha henter aña pa trese konsientisashon riba e tema di bienestar i ekspreshon emoshonal di hende hòmber, tantu den komunidat komo den skol.

Gwen ta splika ku pa Dia di Tata, por ehèmpel, e organisashon a drenta skolnan pa papia ku mucha i maestro riba e balor di paternidat, kuido, i presensia. “Nos ta traha pa hòmber, pero tambe pa komunidat, pa nos eduká,” e ta bisa.

E meta i vishon di MpowerMen ta pa krea un sistema ku e trabou sosial ku e organisashon ta hasi ta  struktural i integral, den kolaborashon ku otro organisashonnan. Aktualmente, e organisashon ta traha ku Kinderbescherming, pero e vishon ta pa bai mas leu. Drenta den kompanianan pa traha huntu ku e departamento di HR, pa kompanianan sa ku MpowerMen ta eksistí i ku nan por yama pa guia, formashon òf orientashon interno. “Hopi bia,” Gwen ta bisa, “ora ku e situashon a bira serio, òf e pos yena, e ora ei e hende hòmber ta mèldu. MpowerMen ke krea un espasio kaminda e hòmber no mester warda te ora ku tin un problema, pa deskargá un pensamentu, òf buska klaridat.”

E ta pone énfasis ku hende hòmber tin e nesesidat natural pa kòmbersá i drenta den kòmbersashonnan mas profundo. Pero pa e generashon adulto, e proseso di konsientisashon ta tuma un tiki mas tempu. “Bo mester trèk nan un tiki mas,” Gwen ta bisa ku un sonrisa, “pero tiki tiki, nos ta yega serka di e grupo di enfoke. I ora mi mira e hóbennan den MpowerMen mi ta haña speransa.”

E mishon

Rachiem ta agregá ku: “E mucha hòmber di awe ta e hòmber di mañan.” E frase ei ta un refleho di e mishon di MpowerMen, pa forma e mucha for di chikí pa krea hòmbernan konsiente, empátiko i stabil den futuro. “Si bo ke pa nan ta mas habrí òf krea un generashon ku por ekspresá nan mes sin miedu,” e ta bisa, “bo mester kuminsá awe.” E ta kompará e proseso akí ku plantamentu: “Ora bo planta mata, bo mester kuid’é for di chikitu si bo ke un mata ku ta duna fruta.” MpowerMen ta kere ku e tipo di kuido, atenshon i orientashon ku un mucha hòmber ta risibí den su infansia ta determiná e tipo di adulto ku e ta bira. P’esei, e organisashon ta traha pa trese tatanan huntu ku nan yu, pa nan por siña ekspresá i partisipá den kòmbersashon riba kosnan positivo, no solamente ora ku tin un problema. E meta no ta pa tin un generashon ku ta reprimí sintimentu, sino un generashon ku ta papia, ta sinti, i ta konektá, solamente di e manera akí bo por krea un komunidat ku ta sano i ku ta krese huntu.

Ta drenta skol tambe

Rachiem ta sigui konta ku el a forma parti di MpowerMen dor di un propaganda ku el a wak riba medionan sosial di un di e miembro di e organisá MpowerMen shon. E post akí a hala su atenshon i motiv’é pa tuma un akshon. El a manda un mensahe na e persona ku a publiká e post i nan a topa pa elaborá mas riba e tópiko. Durante e enkuentro, Rachiem a konta ku e ta interesá pa formá parti di un grupo di hende hòmber ku ta buska konosementu i krea espasio pa diskushon. El a disidí di forma parti di un di e reunionnan i for di e dia ei, el a bira un miembro aktivo di e organisashon. Awor, despues di tres aña den MpowerMen, Rachiem no ta partisipá so, sino tambe ta yuda drenta skol. Resientemente, el a kontribuí ku e programa Hòmbernan Konektá, un inisiativa ku ta purba guia hòmber pa siña for di otro, risibí konseho, i krea konekshon riba diferente tereno, manera  famia, negoshi, i bida personal. Pa Rachiem, e eksperensia ta fruktífero, pasó e ta mira e resultado real, kon hende hòmber ta siña, krese, i eksplorá nan potensial riba manera ku nan no tabata sa.

No ta pa e hòmber ku problema so

E ta sigui bisa ku for di e perspektiva di pafó, hopi hende tin e bista ku organisashonnan manera MpowerMen ta pa hòmber ku ta enfrentá problema personal. Rachiem ta splika ku e organisashon tin un meta diferente, e ta pa krea un espasio pa bini huntu no pa papia di problema, sino pa evitá ku e ta surgi. Dor di bin huntu den un espasio sigur, hòmbernan por sinta, papia, i konta nan historia, esaki ta yuda pa un otro no kometé e mesun eror ku un otro a eksperensiá. E ta un plataforma kaminda hòmbernan por komuniká, en bes di semper ta esun hende ku mester skucha. E ta bolbe menshoná ku e reunion ta tuma lugá 1 bia pa luna riba djasabra.

Trabou i famia

Rachiem ta sigui splika ku e tópikonan ku ta bini mas dilanti ta trabou i famia. E ta enfatisá ku famia ta hopi importante pa hòmbernan, pero hopi bia, hòmber no por ekspresá nan sintimentu na kas, òf ora nan hasi e, nan no ta haña e komprenshon ku nan mester. E no ta un lucha ku ta fásil; si bo keda bo so, e situashon no ta bira mas mihó, e por hasta “kome bo”. Hopi hende hòmber no ke papia pa nan no mustra debil, esaki ta bini for di nos kultura ku ta sali for di nos historia. Ora un hòmber kuminsá papia di su problema, mesora nan ta risibí reakshon negativo, ku por buta ku nan ta nan sera nan mes i stòp di ekspresá. Pa situashon ku ta mas delikado, MpowerMen ta rekomendá terapia, ‘coaching’, òf un ‘Life Coach’. Banda di esaki MpowerMen mes sa duna entrenamentu riba komunikashon, identidat, i kresementu personal. Durante e seshonnan den e grupo, hòmbernan ta siña pa ta vulnerabel, papia habrí di loke nan ta sinti, i pidi konseho. E proseso ta yuda hòmbernan praktiká ekspreshon di emoshon, krea espasio pa vulnerabilidat, i reforsá nan kapasidat pa manehá situashonnan difísil den trabou i famia.

E adulto por siña hopi di e hóben

Rachiem ta konta ku e grupo ta grandi i variá, ku miembronan di 18 te ku 60 aña. E ta bisa ku hopi bia nos tin e tendensia ku e hóben mester siña for di e adulto, pero den realidat, e adulto por siña hopi di e hóben su perspektiva. Gwen ta agregá ku, por ehèmpel, un hóben miembro ku tabata biba na Kòrsou ku a bai biba Ulanda, a bisa ku MpowerMen a yud’é komprendé su mayornan mas mihó. Den e interakshon ku otro hòmbernan, e hóben a eksperensiá komprenshon, i ora el skucha historianan di otro hòmber, e tabata bira kurioso pa sa mas tokante di su mayornan su bida. Un di e metanan prinsipal di e organisashon ta pa krea un espasio pa kòmbersashonnan sano, kaminda hòmbernan por papia habrí. Dor di e grupo, hòmbernan por konosé nan mes mas mihó i tambe relashonnan rondó di nan. Gwen ta bisa ku den nos kultura, hopi bia hende muhé ta kere ku nan mester guia i salba hòmbernan. Hende muhé ta lubidá ku hòmbernan  mester di espasio pa nan ekspresá nan nesesidat i emoshon.  MpowerMen ta keda demostrá ku hòmbernan mester di otro hòmber pa krese. Tur kos ta posibel si e hòmber ta habrí pa krese, skucha, i komuniká.

Hòmber Konektá

Rachiem ta splika ku Hòmber Konektá ta basá riba e mesun konsepto ku e grupo di Djasabra, pero den e kaso aki dilanti di un kámara. Den e programa, nan ta papia tokante e pilarnan ku hende hòmber ta enfrentá den nan bida: nan identidat, famia, hende muhé, trabou i sosiedat. Pa logra un diálogo mas habrí, ta saka algun pregunta relevante, ku ta stimulá e kòmbersashon.

E format a skohe diferente demográfiko di hende hòmber: un tata kasá, un tata soltero, un hòmber ku yu di afó, entre otro. E ta un programa ku ta reflehá realidatnan diverso i ta pone lus riba loke ta importante pa hòmbernan den diferente situashon di bida.

Gwen ta sigui bisa ku e proyekto akí ta posibel dor di e fondonan di sklabitut, ku ta un tópiko relevante pa nos historia. Un di e preguntanan klave tabata: kon e historia di sklabitut ta influensiá loke hende hòmber ta wak i eksperensiá awe? E programa ta elaborá riba esaki, pero ademas ta papia riba otro tópikonan ku ta tuma lugá den bida di un hòmber. Nan ta kòmbersá ku otro hende hòmber-, hende muhé-, hóben- i profeshonalnan, basá riba e tópiko, pa duna un panorama amplio i inklusividat di loke hòmbernan ta enfrentá realmente.

Hòmber den komunidat i skol

Rachiem ta bisa ku ora un hòmber papia, konta kiko e ta sinti di bèrdat, su palabranan ta wòrdu di twist. E konsepto di twist ta referí na e preshon i responsabilidat ku ta bini ku e ròl di hòmber den sosiedat. Hòmbernan mester ta stabil mentalmente i finansieramente, pero tambe kumpli ku e ròl di krea stabilidat, sosten, i kuida famia. Rachiem ta bisa ku, all by all, hòmber mester ta stabil pa por funshoná den komunidat. Esaki a el ripará hopi, pasó e ta un realidat tambe pa ku hende muhé, si bo ta fuerte, bo ta keda mirá ku bo tin energia maskulino. Esaki ta difísil pa transformá, komo ta e manera ku nos sosiedat ta hinká den otro.

MpowerMen i e meta pa hòmbernan

Gwen i Rachiem ta menshoná ku hopi kas no tin un figura di hòmber ku ta guia e famia. Esaki sigur ta hunga un ròl hopi importante den formashon di e hóben ku ta bai skol. Durante un seshon na skol, dos mucha a pidi yudansa si nan por papia ku un hende hòmber, pa nan por djis keda skuchá, i yuda nan desaroyá. Rachiem a konta ku tin hopi di e situashonnan aki den nos komunidat, i hopi bia e dosentenan no ta na altura di loke ta pasa, pasó nan no tin e kurashi pa ekspresá nan mes. Den skol, tin yùfrounan so i no tin un mèntòr hòmber, ku por kontribuí na e hóben su desaroyo i guia.

Krea struktura pa un plataforma

Nan ta sigui bisa ku MpowerMen no ta un organisashon ku ta kere den un bia so. E meta ta pa krea un struktura ku ta duna tantu e hóben komo adulto un plataforma pa papia ku otro hòmber i sinti nan mes identifiká ku un persona. E estilo ta pa keda konektá ku e hòmber. E meta no ta pa drenta skol i sali mañan, sino pa krea un konekshon real i kòmbersashon ku otro hòmber.

E organisashon ta enbúskeda di mas hòmber ku ta konsiente di nan ròl i ke aportá pa krea otro hòmbernan ku ta sigur di nan mes, pero ku por komuniká i ekspresá nan mes liber. Ku ta dispuesto pa drenta skolnan, pa e dosentenan ta na altura kon importante e figura di un hòmber ta i pa nan sa ku MpowerMen ta kla pa yuda krea e figura akí. Pa sostené e proseso, MpowerMen lo tin gana di hasi mas investigashon di asina por basa nan trabou riba sifranan, i por papia ku mas kredibilidat i krea programanan ku ta realmente efektivo.

Finansa di MpowerMen

Empowerment ta traha ku diferente proyektonan, ku ta yuda finansiá e organisashon. Entre esaki ta Samenwerkendefondsen, Proyektonan di Sklabitut, i kontribushon di mayornan. Hopi di e trabou ta boluntario, kada un miembro su aporte ta fundamental pa logra e meta di MpowerMen. Si tin mas rekurso, e organisashon por hasi un impakto hopi mas grandi den komunidat.

Dia di Hende Hòmber: 19 di novèmber 2025

Pa selebrá Hende Hòmber, MpowerMen ta organisá un evento spesial, den un siman ku ta dediká na hende hòmber. E tópiko ta internashonal: Celebrating Men and Boys. E organisashon ta invitá hende hòmbernan di Kòrsou pa partisipá i selebrá nan mes. E evento ta tuma lugá na Biblioteka Nashonal i ta kompletamente grátis, pero inskripshon ta obligatorio. Bo por registrá via Facebook i Instagram via e lenk, òf via WhatsApp na 515-1066 pa sigurá bo lugá. Pone bo mes den e lus ku bo meresé òf e un ser kerí.

MpowerMen su plan pa futuro

Otro aña MpowerMen lo bai organisá un programa kreativo i super diferente pa Dia di Tata, ku lo bira un eksperensia inolvidabel pa tur partisipante. Pa e evento, lo bai tin un shùrt di Hòmber nobo. Den futuro serkano, MpowerMen  ke sigui ku su ‘Leadership Program’ pa hóben, pa nan por haña perspektiva riba kon komuniká i liderá, i pa guia nan pa bira e hòmbernan di nos futuro.

Skucha e hòmber, duna nan espasio pa ekspresá nan mes, i yuda nan desaroyá nan potensial. MpowerMen ta un komunidat ku porta habrí pa hende muhénan tambe, ku ta deseá na kontribuí i empoderá organisashon pa medio di nan ekspertisio.

MpowerMen no ta solamente un organisashon; e ta un skol pa komprendé hende hòmber, un refleho di komunidat, un espasio pa krese huntu i krea konsientisashon.