WILLEMSTAD.- Optima Arbodienst ta kumpli dia 1 di febrüari awor 10 aña di eksistensia. Den e kuadro aki su fundadó i direktor Arthur Nivillac a duna un bista di nan trabounan i kiko tur nan ta hasi na Arbodienst. E ta konsistí di kuater ala ku ta e Arbodienst, Absentium, Arbo Academy i Arbo Rechsthulp arbeid. Den EXTRA su edishon di ayera nos tabatin e promé parti i awe ta sigui e di dos. Tambe por haña un video di e entrevista ku Arthur Nivillac riba www.extra.cw i riba Facebook extracuracao.
Un fabor i no un derechi; mester kambi’é
Optima ta trata tantu ku e doño di trabou i ku e trahadó. I awe den 2022 mester bisa ku ainda no a yega asina leu ku por papia di un balansa den e trabou i kaminda e trahadó i e doño di trabou por ta satisfecho.
Segun Arthur Nivillac den e entrevista ku EXTRA a bisa ku despues di 10 aña di eksistensia di Optima, ainda e tin di papia di un retraso grandi den e parti laboral. “Nos no tabata wak kon sano nos empresanan ta, i te awe ta difísil. Nos no tabata wak kiko ta e problema ku e trahadó tin, ku ta pone ku e ta desfunshoná”.
Ta importante pa tene kuenta ku un hende no ta lanta for di su kama, pa e bai bòikòt òf keda sin funshoná. E ta lanta ku amor bai traha. ‘Pero un kos ta importante, si bo no ta trata mi bon, ku abo ta kere ku ta abo tin e poder, mi tin un poder riba bo i esun poder ei ta ku mi ta dal bo un AO, na e momentu ku tin mester di mi” segun Nivillac.
Esaki ta sosodé hopi ora e trahadó mira ‘inkonsistensia ku bo ta gana i ami no ta haña, si mi ta mira ku bo ta trèk un kolega dilanti i ami bo ta mata, si mi ta mira ku esun ku mi a siña e trabou ta gana mas ku mi i mi a keda pega, ku mi ta mira, ku ta mira i mi ta mira, bo ta bezig ta matando i kreando un situashon no sano i outomátikamente bo ta venená e hende”.
E tipo di kosnan ei Optima ta bringando te awe, pasobra te awe e ta sosodé den nos organisashonnan. I loke ta hasié mas difísil ta ku no tin lei laboral. No tin lei pa akapará tur e problemanan manera pèstmentu, ku awor hende ta intimidá bu seksual, ku awor tin deskriminashon sin ku tin leinan sufisiente pa nos dil ku nan.
Optima a logra kambionan pero Kòrsou ta kedando atras
Den su 10 aña di eksistensia, apesar ku no tin e leinan sufisiente, tòg Optima a logra kambia hopi kos. Nan a logra hasi e empresanan mas konsiente, pero te ainda no por hasi gobièrnu i parlamentu konsiente ku nos falta lei laboral. “Nos a yuda Boneiru, nos yuda diskutí na Aruba, na Sürnam i nan ta yegando na leinan laboral, ku nos ta yama e arbo wetgeving. Kòrsou no a kuminsá ni diskutí over di dje, te pa por implementá”, Nivillac a bisa basta preokupá.
E kaminda ta largu ainda pa kana i e ta spera ku via di e programa aki (EXTRA) parlamentarionan, ministernan, esun ku ta responsabel ku ta e minister di SOAW, ta tende nos i ban papia over di kon nos por yega na nos leinan laboral, pasobra si bo tin bo leinan den bo man outomátikamente bo por sòru pa kosnan kana mihó.
Si un lei ta bisa bu por ehèmpel ku bo no tin mag di sinta den un kamber ku no tin bentana, e ora ei tin lei ku por sigui kana kuné. Si lei ta bisa ku ora bo ta traha ku kímiko bo mester ta protehá, pa bo no haña problema ku pulmon, bo tin lei pa kana kuné. Den e situashon aktual e problema ta grandi pasobra no tin hende ta kontrolá i ménos sanshoná.
E hende ta hasi loke e ke i si esun no gusta, e bai i tin otro ta drenta. Esei ta e situashon labor awor aki i no mester ta asina pasobra tur tin derechi riba trabou. Trabou ainda na Kòrsou ta manera un fabor pero e mester kambia i bira un derechi.
“Nos tur tin derechi riba trabou. Laga nos komo partido respetá otro, balorá otro, pasobra abo tin mester di mi i ami tin mester di bo”. Ku esaki Nivillac a enfatisá ku pa nan e lucha no a kaba. Nan ta 10 aña leu i nan ta sigui. Nan tin sufisiente energia pa sigui dal bai, te ora logra hasi pueblo di Kòrsou konsiente kiko Arbo ta para pe.
Ora sa kiko ta pasa na boka di trabou ta un berpùt
Teniendo na kuenta ku leinan laboral na Kòrsou ta laga hopi di deseá pa no bisa ku nan no tei mes, Arthur Nivillac a bisa EXTRA ku no ta promé bes e ta trese e preokupashon aki dilanti. Ta na múltiple okashon el a duna entrevista i purba trese e preokupashon aki dilanti.
El a bisa ku su pashon i amor pa Kòrsou ta grandi, sino e lo a ba laga e lugá aki masha dia, pasobra na Hulanda e lo ta e mihó arbospesialista bon pagá. Pero komo e ta stima e lugá aki, el a keda komo e úniko spesialista laboral na Kòrsou. ‘Mi ta roga, mi a pidi mi a sklama te awe niun hende no ta tende mi. Te awe niun parlamentu, niun minister ni di awor ni di kua bai te bin, no a tende mi. Arbo no ta nan prioridat. Mi ta bisa semper ku turismo, ekonomia ta nos prioridat pero ken ta esun ku tin di trata e turista, ken tin di hari, ken ta esun ku tin di trata bon. Bo ke bisa mi trata nan bon, mi mester ta motivá i mi mester ta kontentu, pero mi situashon laboral mester ta oké, sino hamas mi por hari ni duna e servisio ku bo ke”, Arthur Nivillac a opservá.
Si duna e trahadó loke e meresé, esaki lo lanta for di su kama felis i kontentu i e ta bai e èkstra mail tur dia. Pero e trahadó no ta bai èkstra mail aki. Ora Arthur Nivillac papia ku e trahadónan, ta un berpùt di kiko ta pasando den nos boka di trabou. E ta reta kada minister ku ta karga e timon di labor si nan sa kiko ta pasando den nos boka di trabou. E si sa pasobra su dosiernan ta yen, e ta hende ku mi ta registrá tur kos.
E ke sa ken ta parlamentarionan pasobra el a wak nan na televishon pero nunka niun hende a papia kuné ni aserk’é. Nunka, te awe 10 aña despues, e úniko kos ku ta tende ta ku gobièrnu ta bisa ku nan tin nan arbodienst i no ta mira dikon nan tin di papia ku otro arbodienst. “I mi ta haña ta tristu pasobra mi tei, mi ta yu di Kòrsou, mi a nase aki, mi a studia i mi a bin bek. I mi tambe tin derechi di tin di mi arbodienst”, Arthur Nivillac a enfatisá.
Optima skèrpi i servisio profeshonal
Ku 10 aña di eksistensia di Optima Arbodienst su fundadó Arthur Nivillac a bisa EXTRA ku su eksperensia ku doño di trabou ta tremendo. Su públiko, su empresanan ku e ta traha kuné ta esnan priva i serka nan tin mas konosementu kiko ta un arbodienst i nan ta para habri pa kambio. E empresa privá tambe ta hasi hopi fout, pero nan ta habri. Nan ta mas habri pa kambio. Ora bo aserka nan, nan no ta bisa bu no drenta, nan ta habri porta pa bo sinta. “I den mi 10 añanan di eksistensia, mi no tin mag di bisa ku mi empresanan no ta skucha mi. E empresanan privá partikular ta eksihí resultado. Nan ta eksihí dokumentashon, nan ta eksihí pa por duna nan kada kuartal kiko bo ta hasiendo i bo mester tin éksito ku nan problemanan. Nan no ta tuma e kosnan sin mas pasobra nan ta paga pa e servisio, pero komo nan ta paga pa e servisio nan tin e derechi di eksihí. I nan ta sòru di tene ami komo Optima hopi skèrpi pa mi keda bai e èkstra ‘mile’ i no kai sintá, pasobra niun hende no ta puntra mi nada ni sifra te pa mi bira laks” i esei segun Nivillac ta netamente loke e gusta, pa e keda skèrpi i pa e duna un servisio profeshonal, netamente loke Optima Arbodienst ta para pe.
