WILLEMSTAD.- Minister Charles Cooper huntu ku Servisio pa Obra Públiko (OW) ta anunsiá ku entrante djamars 11 di aprel, trabounan di rekonstrukshon ta bai kuminsá riba Kaminda Andre J.E. Kusters, i e krusada na altura di Kaya W.F.G. Mensing den Zeelandia.
Trabounan lo tin un durashon di 4 siman. Kontratista Curaçaose Wegenbouw Maatschappij (CWM) ta enkargá ku trabounan i e lo traha di 8 or mainta pa 4 or di atardi.
Debí na mal estado di e kamindanan menshoná, OW lo bai hasi trabounan di rekonstrukshon riba e karetera aki. E trabounan lo konsistí di asfaltamentu di e kaminda, i pasa pipanan di desague, i atendé ku e situashon na e sitio pa evitá ku áwaseru ta kai i keda para einan.
E krusada Kaya W.F.G. Mensing i Kaminda Andre J.E. Kusters lo wòrdu será kompletamente. Outomobilistanan mester hasi uso di rutanan alternativo por yega na nan destinashon. Lo tin bòrchi i barínan ku lo guia outomobilistanan. OW ta hasi un apelashon na tur outomobilista pa kore ku koutela i gradisí adelantá.
