ORANJESTAD.-Informashon ku Kuerpo Polisial di Aruba ta suministrá ta indiká ku awe mainta, djadumingu, pa mas o ménos 6:05 sentral di polis a risibi notifikashon di un aksidente ku a tuma lugá na altura di Motorworld riba e kaminda di Camacuri.
E promé informashon ku a yega na polis ta bisa ku un outo a bòltu i un persona a keda pegá bou di e vehíkulo. E promé patruya ku a yega na e sitio a konstatá ku di bèrdat tin un persona pegá bou di un outo Nissan Cube pretu ku number A-61366. Mesora a pidi asistensia di ambulans, mirando e situashon di e shofùr. Lamentablemente no por a hasi nada mas e shofùr aki.
7:10 Dòkter di polis dr. Texier a konstatá morto di shofùr Reina Rosalinda Caroline Roga, nase na Aruba 22 september 1990 (33 aña di edat).
Spesialistanan di Tráfiko i tambe polis tékniko a presentá na e sitio pa asina por hasi e investigashonnan nesesario. Slachtofferhulp tambe tabata presente pa duna asistensia na e famia. Kuerpo Polisial Aruba ta manda palabranan di kondolensia na famia di e víktima.
