WILLEMSTAD.- Djaweps 17 di mart 2022, alrededor di 23.26’or di anochi, Sentral di Polis a risibí informashon di un kaso di ladronisia ku ta tumando lugá na un establesimentu den área di Groot Davelaar.
E unidat di U.S.T. ku a yega na e sitio a sorprendé tres hòmber sospechoso nèt na momentu ku nan tabata purba hòrta na e establesimentu. Na e momentu ei a surgi un persiguishon den e vehikulo tras di e trio i un di e sospechosonan S.P.B., di 26 aña di edat, nase na Kòrsou, a logra bula for di e vehíkulo. Den área di Steenrijk polis a logra detené.
Despues e persiguishon a kontinuá i den área di Punda a logra para e vehíkulo. For di e investigashon ku polis a hasi na e sitio a resultá ku e tres hòmbernan sospechoso aki a purba fòrsa porta di un kònteiner ku tabata na e establesimentu. Na e sitio a detené e hòmbernan sospechoso, R.F.S., di 24 aña di edat i R.R.P., di 28 aña di edat, tur dos nase na Kòrsou, pa e kaso ariba menshoná. Durante di e persiguishon polis a haña i konfiská algun atributo ku a wòrdu usá pa por a kometé e ladronisia.
A presentá e trio dilanti di un fiskal ouksiliar ku a ordená su enkarselamentu pendiente di mas investigashon.
