NEW YORK, AP.- Un kandela den e sistema di èrko i kalentamentu den Trump Tower na Manhattan a provoká huma i a laga tres persona heridá. Asina bomberonan a informá.
E kandela a kuminsá alrededor di 7’or di mainta djaluna den e edifisio kaminda e kas i ofisinanan komersial di presidente Donald Trump ta keda, segun informashon di e departamento.
Dos sivil i un bombero a wòrdu atendé pa leshon ku no a pone nan bidanan na riesgo. E bomberonan a tarda mas o ménos un ora pa paga e kandela.
E presidente tabata den Kas Blanku na momentu di e insidente aki. Esaki a pasa durante oranan trempan di mainta.
“Tabatin un kandela chikitu den un toren di èrko den Trump Tower”, asina e yu di e presidente, Eric a Tweet. “E departamento di Bombero di New York a yega den kuestion di algun minüt i a hasi un trabou inkreibel. E hòmber i muhénan di #FDNY ta e berdadero héroenan i meresé nos mas sinsero agradesimentu”.
E presidente republikano a anunsiá su kandidatura den Trump Tower na 2015, kaminda esaki tabata su kas pa mas di 30 aña.
