Update: Botika CMC ta solamente pa pashènt i personal di hospital
CMC ta mustra ku nan a tuma nota di e akshon di parti di botikanan na Kòrsou i mesora ta indiká ku e botika di CMC ta keda habrí, pero e botika den CMC ta eksklusivamente pa pashèntnan hospitalisá i pa e personal. Pashèntnan eksterno no por akudí na botika di CMC.
Update: Informashon di último momentu ku EXTRA a risibi ta indiká ku minister Silvania ta invitá tur trahadó di botika pa topa kuné na Plasa Wilhemina den Punda pa asina e por papia ku nan.
Botikanan den akshon
WILLEMSTAD.-Klientenan ku a yega botika awe mainta a topa un papel pega na porta ku ta indiká ku awe TUR botika na Kòrsou ta será. Botikanan su kana a yena i a disidí ku ta basta awor. A tene tur botika será awe. Extra a tuma nota ku nèt trahadó di un kas di hende grandi a yega pa tuma remedi pa nan klientenan, pero mester a bira bai atrobe sin por a haña e remedinan. E situashon aki no mester ta un sorpresa pasobra basta dia kaba ku botikanan ta reklamando ku nan no por sigui den e situashon aktual. Botikanan a pidi pa subi e ‘receptregelvergoeding’ di 7 florin pa 10 florin pa nan por sobrebibí, pero no tin un desishon riba esei ainda. E papel riba porta ta mustra ku den kaso di emergensia por akudí na Curaçao Medical Center (CMC).
E promé punto di reklamo di parti di botikanan ta ku nan ta trahando ketu bai abase di tarifanan di 2001, pues tarifanan 22 aña bieu. Na di dos lugá nan ta reklamá ku nunka a indeksá nan tarifanan miéntras ku tur gastu si a sigui subi. Ademas e pakete di SVB kual gobièrnu ta kubri ta bira dia pa dia mas delegá, pues ménos produkto ta keda kubrí. Botikanan ta haña ku nan ta brinda servisio profeshonal i nan no tin influensia riba preisnan. Nan ta entrega pampers sin haña niun pago pa esei i meskos nan ta haña niun pago pa saku pa entrega produktonan.
Botikanan no ta haña pago pa nan trabou di preparashon i muchu ménos pa nan servisio di warda. Botikanan ta mustra ku nan tin un skarsedat grandi di personal i ta kontribuí ku trabounan atministrativo di SVB. Ademas nan ta traha huntu ku SVB pa yuda redukshon di gastu. E kòrta gastu te yega wesu. Ta basta awor!
Botikanan ta indiká ku nan ta habri atrobe na momentu ku nan haña un oumentu temporal di gastunan pa e servisio farmaseutiko profeshonal ku nan ta brinda.
