Informashon den bario riba situashon ENNIA
WILLEMSTAD.-Un grupo di penshonado i aseguradonan di e kompania ENNIA tabata presentá djarason anochi den sentro di bario Janwé, pa haña informashon riba desaroyonan rondó di ENNIA. Manera ta konosí gobièrnu di Kòrsou a disidí ku ta opta pa likidashon kontrolá di ENNIA-Leven. Quincy Girigorie (PAR) i Alicia Blonk (abogado) a splika nan punto di bista i kiko ta e posibel senarionan.
Girigorie a papia entre otro riba e pago ku tabata hasi na komisarionan di ENNIA kual a resultá di ta mas o ménos 53.000 florin pa aña. Ademas e komisarionan aki tabata haña bónus tambe. A paga pues 18.7 mion na e komisarionan i 13.6 mion na bónus.
Tambe Girigorie a papia kiko a sosodé for di 2018 te awor aki, kaminda a menshoná e akshonnan di Banko Sentral pa ku e areglo di emergensia i ponementu di beslag riba pertenensianan di Ansary su kompanianan únikamente na e instituto finansiero Merril Lynch na Merka.
Banko Sentral a entrega dos keho unu na 2018 i e otro na 2019 na Ministerio Publiko. Pa loke ta trata e daño a splika ku lo no por paga penshun di un grupo selekto di penshonado ku ta 30 mil di e 50.000 klientenan.
Tambe a para ketu na e trayekto di gobièrnu pa solushoná e problema. Abogado Alicia Blonk a papia di e keho ku a keda entrega, e responsabilidat penal i tambe e prosedura konforme art. 15.
Blonk a duna di konosé ku e ta dispuesto pa representá e grupo di hendenan ku ke kuminsá un prosedura kontra OM den kua ta bai obligá OM pa aselerá e proseso di denunsia ku a keda hasí pa Banko Sentral. Tambe lo pidi pa pone beslag riba bienes di Hushang Ansary i su partidarionan lokal i internashonal.
Den un splikashon mas dirigí a tuma e ehèmpel si sentensia kontra Ansary indiká ku e doño mester paga bèk 600 mion enbes di 1001 miar. Esaki lo nifiká ku tur penshonado di ENNIA lo mester entregá un parti di nan penshun pasobra 600 mion no lo no ta sufisiente. Pa loke ta trata e artíkulo 15 ta asina ku esei lo duna e garantia na tur penshonado i futuro penshonadonan pa nan haña na derecho di risibi nan penshun 100%.
Ku e presentashon aki ke logra ku aseguradonan ta sera kabes i laga Alicia Blonk representá nan den un kaso den korte. Naturalmente lo tin gastu embolbi di abogado.
