Darryl Romijn

Darryl Romijn, un yu di Kòrsou di 35 aña, nasé na Aruba, a krese na Kòrsou, i awor residente na Ulanda ku famia na Boneiru, ta hiba nos den un biahe di selebrashon di nos kultura, nos hendenan i nos pais, kaminda su lombrishi ta derá. Darryl ta konosí riba diferente plataforma di medionan sosial, manera TikTok, Instagram i Facebook. E tin mas o ménos sinku kompania kreativo, un pa kada dia di siman, kaminda e ta inkorporá diferente aspekto di e islanan i duna bida na nos identidat karibense.

Ken ta Darryl

Darryl ta konta ku e tin 16 aña ta bibá na Ulanda. El a bai na aña 2010 ku un meta pa studia i traha riba su futuro. Su promé aña el a kuminsá ku e estudio di komunikashon, pero lihé el a realisá ku esaki no tabata un kaminda ku a kuadra kuné. Manera hopi hende na Kòrsou, ora bo ta riba isla bo no semper tin un imágen kla di kiko e estudionan ta enserá enrealidat. Ora bo yega Ulanda, bo ta mira e mundu akadémiko for di un otro bachi, mas konkreto, mas kompetitivo, mas direkto.

Den su di dos aña el a disidí buska un direkshon nobo, i asina el a kuminsá ku International Business, un estudio ku a kuadra mihó ku su manera di pensa i su ambishon. El a sigui e trayekto te ora el a gradua for di Hogeschool Utrecht.

Darryl ta bisa ku mayoria hende konosé su nòmber for di Kunuku Spices òf di Antiano.nl, pero pa e, tur kos a kuminsá den su último aña di estudio. Huntu ku su pareha, enbes di hasi un stazje tradishonal pa su tésis, nan a tuma un otro paso i nan a kuminsá nan mes negoshi. E negoshi ei a bira nan “afstuderen”, nan graduashon for di skol i te dia di awe e ta funshoná. E negoshi a bai asina bon, ku despues ku nan a gradua, nan no a regresá un trabou normal, nan a sigui traha riba nan mes. Awor, kasi 10 aña despues, Darryl tin su propio gym na Utrecht, su promé gran negoshi, un lugá kaminda el a kombiná disiplina, salú i salú mental. For di e base ei, mas oportunidat a kuminsá presentá.

Ora e negoshinan a kuminsá kana, Darryl a sinti un deseo mas profundo,  hasi algu ku no ta solamente pa su mes, pero pa su rais, pa su kultura. Asina e ku su pareha a kuminsá pensa: “kon nos por selebrá ken nos ta, unda nos ta bin for di dje, i kon nos por mustra e kultura karibense na un mundu mas grandi.” I for di e pregunta ei, un kapítulo nobo a kuminsá den nan bida.

Gym

Darryl ta konta ku e konsepto di su gym ta basta úniko den su manera di pensa i traha. Ora nan a kuminsá, mayoria hende ku tende e palabra gym lo a pensa riba e modelo komersial, kaminda tur kos ta riba kompetensia di preis: “ken ta mas barata, ken tin mas aparato, ken tin mas miembro.” Pero Darryl a tuma un otro kaminda. El a bai riba un konsepto di un semi-premium strength gym ku ta pone e hende sentral, e hende ku ke entrená pa ta mas saludabel, mas fuerte, i mas balansá den bida.

Den e mesun espasio bo por haña atletanan di nivel mundial, pero tambe hende ku ta drenta un gym pa promé bia. E diferensia ta ku e hende no ke entrená den un ambiente komersial kaminda tur hende ta wak otro, kompará otro, i sinti preshon. E gym di Darryl ta un komunidat. Un lugá kaminda hende ta komprometé pa logra nan mes metanan, pa krese huntu, i pa sostené otro.

No tin niun spil i no tin distraishon. Tur kos ta focus riba entrenamentu, riba bo salú físiko i mental, i di e manera aki bo por sinti bo kontentu ku bo kurpa segun bo ta bira mas grandi. E ideanan aki, ku tempu, a kuminsá influensia mas gym den Ulanda, ku awor tambe ta implementá e mesun konsepto.

Darryl ta bisa ku tabata tin oportunidat pa sigui krese i habri mas lokalidatnan, pero na e momento ei COVID a yega, e industria di gym tabata e industria ku mas reakshon negativo. Esaki a hasi ku invertí den un otro lugá tabata hopi difísil. Apesar di esei, e soño di ekspanshon ta den nan mente.

Pero na e otro banda, Darryl ta bisa, ku e gym aki ta basta grandi, ta drai hopi bon, i pa awor no tin un nesesidat real pa habri un di dos. Aparte di esaki, Darryl i su pareha ta pone hopi balor riba nan kalidat di bida. Nan tin un yu di dos aña i un beibi di tres luna. E ta bisa ku bo por keda traha i traha, pero ora bo yega na e último fase di bida, bo no ta bisa: “mare mi por a traha mas,” sino: “mare mi a pasa mas tempu ku mi famia.”

Den e promé añanan, nan tabata traha entre 70 te 80 ora pa siman. Nan a pone tur nan energia, tempu i kurason den e proyekto. Awor, nan por mira e fruta di e trabou duru ei. E gym tin mas o ménos 700 miembro, hendenan ku ta entrená serio, ku ta drenta no solamente pa hasi ehersisio, pero pa forma parti di un komunidat ku ta empuhá otro pa bira un mihó vershon di su mes.

Kunuku Spices

Kunuku Spices a nase den un momento inesperá, e promé simannan di COVID, ora e gym mester a sera di un dia pa otro. Tabata un periodo yen di pregunta riba futuro, riba sostenibilidat, riba “kiko ta bai pasa awor?” Lockdown a krea silensio riba e kaya, pero den kas e tabata un tempu di reflekshon i reinvershon. No solamente Darryl a haña mas ora, pero tambe un nesesidat urgente pa diversifiká su forma di entrada, pa pensa mas largu, mas profundo, mas kreativo.

Dos kos a inspirá e promé simia di Kunuku Spices. Promé, e deseo di hasi algu ku ta serka di su kultura. Darryl ta un Antiano orguyoso. El a nase na Aruba, a krea su bida na Kòrsou, i tin famia na tur tres isla. Tur aña e ta biaha entre nan, e gusta sinti e aroma, i sabor di kas. E kier a traha algu pa su hendenan, algu ku por konektá e diáspora ku e kurason di e islanan.

Di dos, e kier a hasi e proyekto huntu ku su ruman grandi i su mihó amigu di skol básiko, un amistat ku ta manera un ruman. Su ruman tabata un shèf, i manera hopi otro den e industria di horeka, su restorant tambe a sera durante lockdown. Asina nan a sinta huntu i puntra nan mes: “Kiko nos por hasi pa traha huntu, pa yuda otro, i alabes selebrá nos hendenan?”

Den kas, úniko kos ku tabata posibel pa hasi pa otro tabata kushiná. For di e mesun kushina ei a sali e idea pa krea un seasoning blend ku ta hasi e kuminda krioyo mas aksesibel pa hendenan na Ulanda. Un manera pa laga e aroma di Karibe drenta den un kas den Utrecht, Rotterdam òf Amsterdam. Nan a sera kabes huntu, i a kuminsá pensa kon nos por selebrá nos kultura for di un bòter chikí yen di sabor.

Mas balor pa kushina Karibense

Darryl ta kere ku kushina Karibense no ta risibí e balor ku e meresé. Segun e, nos tin un di e kushinanan  mas riku ku tin un meskla di diferente kultura ku a forma nos plato, nos aroma, i nos identidat. “Ban krea algu ku nos por bende, pero alabes selebrá nos kuminda i mustra nos kultura na otro,” esei tabata e idea sentral.

Ora Kunuku Spices a sali riba medionan sosial, nan a risibí reakshon mesora. Nan a bai loko riba plataformanan.” Hende tabata manda mensahe, pidi, kompartí, i kumpra. Poko poko, nan a bira mas rekonosí komo e “yònkumannan” di Kunuku Spices, e karanan di un marka ku tabata mas ku un produkto: e tabata un mensahe di kas, di rasa, i di orguyo.

Su ruman hòmber ta e kara ku bo ta mira den e videonan, e shèf ku ta papia, kushiná, i konektá ku e públiko. Darryl ta mas patras di e kortina, ta kordiná, plania, i traha strategia. Esaki tabata un desishon konsiente, pa pone e karisma i e eksperensia di e shèf dilanti di e kámara, miéntras e mes ta move patras. Nan ta bisa ku aunke e negoshi no lo a bai bon, nan lo tabata kontentu di por a kuminsá algu balioso i pasa mas tantu tempu huntu.

Segun Darryl, e ingredientenan ta for di Europa mes. Kòrsou no tin un produkshon na gran eskala, i nan a purba haña salu for di Boneiru, pero e sistema no tabata fásil. Tin hopi hende ku ta pidi pa Kunuku Spices eksportá na Antia, pero Darryl ta firme riba un prinsipio: “mi no ke pa niun hende paga 40 òf 50 euro djis pa un bòter di sasón.” Pa e, Kunuku Spices no ta solamente un negoshi. E ta un puente entre kultura i aksesibilidat, entre sabor i hustisia, entre kas i mundu.

Antiano.nl

Antiano ta un plataforma ku ta bishitá otro kompanianan, un otro proyekto ku ta selebrá Antiano na Ulanda. “Antianonan tin hopi talento i kreatividat,” e ta bisa. “Ora nos kuminsá un idea, nos ta pone e kurason i e pashon den dje, i resultado semper ta grandi.” Hopi hende ta pèrdè oportunidat pa motibu ku e komunidat no konosé e persona, i nan kompania. E konsepto di Antiano ta netamente pa duna e Antiano balor i visibilidat. “Pa logra esaki, nos a pensa riba un sistema sentral ku ta fasilitá e eksposishon di talento. Nos no mester dependé di medionan di Ulanda pa logra krea e impakto; hopi hende Ulandes ta gran amante di Kòrsou i ta apresiá nos kultura, pero no ku nos mester di nan.” Antiano ta firme riba nan ideologia i nan manera di krea eksposishon, i no mester di ahuste pa risibí otro kultura, e ta algu di nos i pa nos.

“Si nos publiká algu tur dia mes, nos por mantené e kontinuidat pa 4 aña largu den diferente industria, pa konektá ku kliente nobo i pa duna hendenan un plataforma pa mustra nan talento. Ora nos tur yuda otro, nos tur por krea oportunidat.” Darryl ta kontentu ku e ta mira nos hendenan krese, i ta enfatisá ku ora nos komunidat traha huntu, nos por logra un eksposishon ku berdaderamente ta hopi grandi i keda ta keda algu di nos.

Chuchubi Books

Un otro negoshi ku Darryl tin ta Chuchubi Books, ku e meta pa yuda famianan na Ulanda siña nan yu nos kultura i nos idioma. E konsepto di Chuchubi Books ta pa siña Papiamentu di un manera alegre i inklusivo, pa tur famia por komprondé i kompartí e idioma ku nan yunan desde ku nan ta chikitu. “Mi a pensa riba mi mes situashon. Un yu di Kòrsou kasá ku Ulandes i bibá na Ulanda, i ora bo tin un reto ku e idioma i e kultura di bo yu, bo ta sinti kon e merkado ta trese un nesesidat pa hasi algu ku ta yuda otro famia tambe.” Huntu ku un amiga, Stephanie Maduro, nan a traha Chuchubi Books, ku e promé edishon un buki di lèter A pa Z pa e muchanan siña álfabèt i palabranan den Papiamentu, pa nan por konosé un tiki mas di nos isla na un forma stimulante.

Bo mester kuminsá un kaminda i si bo kuminsá lat, bo ta mira ku e ta bira mas difísil den futuro. Aktualmente, tin dos buki riba kaminda pa yuda hóben di tur edat siña Papiamentu. Esaki ta hopi relevante nan pa Darryl, paso e tambe ta tata i ta tuma su trabou komo tata hopi na serio. Ta bunita pa mira bo yu konektá ku bo lenga den manera natural i dibertido.

Business Coach

Banda di tur e kompanianan aki, Darryl I su kasá ta duna kurso na komersiantenan. Pa e, ku su eksperensia ku diferente negoshi ku el a  kuminsá for di nada, den diferente industria, i e konosementu ku el a gana durante e añanan aki; ta sigur di balor agregá pa yuda otro komersiantenan. E focus ta hóben i antiano ku ta kere den nan idea, pero ku mester di un kuadro korekto pa por bira mas eksitoso.

Por ehèmpel, na e momento aki  Darryl ta guia e wega di mesa Rei den Mei, pa nan por krese i bira un negoshi mas grandi i eksitoso. E merkado antiano ta hopi grandi, pero tambe tin europeo ku ta apresiá nos kultura i produkto. Darryl ta konta un historia di un gai ku yama David, un europeo ku ta stima Kòrsou masha hopi mes, ku tur aña e ta biaha pa Kòrsou i tin un tatoo di e bandera di Kòrsou riba su man. David a asta siña su tata ku traha pastechi i awor tur luna nan ta traha pastechi huntu.

Darryl ta kere firme ku nos antiano tin tur e ingredientenan pa ta un di e gruponan mas eksitoso na mundu, pero ta nesesario pa tin un bon kuadro pa por kanalisá e talento den un bachi positivo. Segun Darryl, nos por bira Wakanda: tur e konosementu, kreatividat, i pashon ku nos tin por lanta nos islanan den un manera positivo. Tur hende ke kome, tur hende ke yuda otro.

I mas importante, Darryl ya ta purba di hasi esaki den tur su kompanianan. E meta ta pa kontagiá otro, pa bin ku inovashon i un kultura ku ta keda promové.

Plan pa futuro

Darryl tin un vishon pa  futuro. E ta bisa, “mi tin un plan di 40 aña. Na e momento aki mi tin 35 aña, kemen e tin 6 aña pa e traha riba su otro deseonan.” Den e próksimo 6 aña, e tin dos meta spesífiko ku lo e enfoká riba dje. E ta bisa ku e ta bendishoná ku e manera ku el a manehá su negoshinan, di kual ta duna e hopi mas oportunidat i disponibilidat, pero tambe e ta kere ku responsabilidat na kas ta prioridat; e no ke mata su mes ku trabou pa despues no por duna mesun tantu atenshon na su famia. Segun e, ora ku e famia bira mas stabil, ku nan a kustumá ku un famia di kuater, e por kontinuá i tin un balansa den bida personal i profeshonal. Su mishon ta por sigui kontribuí na selebrashon di nos kultura, elevando nos nòmber i nos identidat kultural.

Wak negoshi di dos banda

Darryl ta enfatisá ku bo por wak negoshi di dos banda:” bo mester sòru pa bo negoshi ta na òrdu i pa aki 10 aña e ta eksistí ainda, komo bo tin un kompromiso ku bo mes i bo klientenan.” Pero e parti humano ta mas importante. E ta promové ku bo mester kere den bo mes, mira kada triunfo chikí komo un triunfo grandi, i ta orguyoso di bo mes. Bida ta muchu kòrtiku pa warda pa selebrá. Tur e kosnan chikí ku bo logra ta yuda bo yega mas serka di bo logronan mas grandi. Selebrá bo mes i ta habrí pa e hendenan rondó di bo por selebrá bo éksitonan.